ଯୁଦ୍ଧ ପାଇଁ ବିଶ୍ୱ ବଜାରରେ ଏବେ ତେଲର ପ୍ରାକୃତିକ ଗ୍ୟାସ୍ର ପ୍ରବଳ ଅଭାବ ଦେଖଇବାକୁ ମିଳୁଛି । ଖାସକରି ଇରାନ ହର୍ମୁଜ୍ ପ୍ରଣାଳୀ ଦେଇ ଜାହାଜ ଚଳାଚଳକୁ ଅବରୋଧ କରିବା ପରଠାରୁ, ଦକ୍ଷିଣ ଏସୀୟ ଏବଂ ୟୁରୋପୀୟ ଦେଶଗୁଡ଼ିକ ପେଟ୍ରୋଲ, ଡିଜେଲ ଏବଂ ଏଲପିଜିର ଅଭାବର ସମ୍ମୁଖୀନ ହୋଇଛନ୍ତି। ଭାରତ, ନେପାଳ ଏବଂ ବାଂଲାଦେଶ ଭଳି ଦେଶଗୁଡ଼ିକ ଏହି ସଙ୍କଟକୁ କମ କରିବା ପାଇଁ ଗୁରୁତ୍ୱପୂର୍ଣ୍ଣ ପଦକ୍ଷେପ ନେଇଛନ୍ତି । କିନ୍ତୁ ପାକିସ୍ତାନ ସ୍ମାର୍ଟ ଲକଡାଉନ୍ ଲାଗୁ କରି ସଙ୍କଟରୁ ବଞ୍ଚିବାକୁ ଚେଷ୍ଟା କରୁଛି ସତ କିନ୍ତୁ ସେଥିରୁ ମଧ୍ୟ ସେ ବର୍ତ୍ତି ପାରି ନାହିଁ । ପ୍ରଧାନମନ୍ତ୍ରୀ ଶାହବାଜ ସରିଫ ମୁଖ୍ୟମନ୍ତ୍ରୀମାନଙ୍କ ସହିତ ଏକ ବୈଠକରେ ଏହା ଘୋଷଣା କରିଛନ୍ତି । ଯେ ପାକିସ୍ତାନ ରେଡିଓ ଅନୁଯାୟୀ, ଶାହବାଜ ସରକାର ପଞ୍ଜାବ, ଖାଇବର ପଖତୁନଖ୍ୱା, ବେଲୁଚିସ୍ତାନ, ଇସଲାମାବାଦ ରାଜଧାନୀ ଅଞ୍ଚଳ, ଗିଲଗିଟ-ବାଲ୍ଟିସ୍ତାନ ଏବଂ ପାକ୍ ଅଧିକୃତ କାଶ୍ମୀର (ପିଓକେ)ରେ ମଙ୍ଗଳବାର ଠାରୁ(ଏପ୍ରିଲ୍ ୭ ତାରିଖ) ରାତି ୮ ଟାରେ ବଜାର, ସପିଂ ମଲ୍ ଏବଂ ବାଣିଜ୍ୟିକ କ୍ଷେତ୍ର ବନ୍ଦ କରିବାକୁ ନିଷ୍ପତ୍ତି ନେଇଛନ୍ତି। ଇସଲାମାବାଦରେ ଶାହବାଜ ସରିଫଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏକ ସମୀକ୍ଷା ବୈଠକରେ ଏହି ନିଷ୍ପତ୍ତି ନିଆଯାଇଛି। ତେବେ ଶେହବାଜ ସରକାର ପ୍ରାଦେଶିକ ସରକାରଙ୍କ ସହିତ ପରାମର୍ଶ କରି, ଖାଇବର ପଖତୁନଖ୍ୱାର ଡିଭିଜନାଲ ମୁଖ୍ୟାଳୟରେ ବଜାର ଏବଂ ସପିଂ ମଲ୍ ରାତି ୯ ଟା ପର୍ଯ୍ୟନ୍ତ ଖୋଲା ରହିବ ବୋଲି ମଧ୍ୟ ନିଷ୍ପତ୍ତି ନେଇଛନ୍ତି। ସେହିପରି, ସମସ୍ତ ଜେନେରାଲ ଷ୍ଟୋର, ଡିପାର୍ଟମେଣ୍ଟ ଷ୍ଟୋର ଏବଂ ସମସ୍ତ ପ୍ରକାରର ମଲ୍ ରାତି ୮ ଟାରେ ବନ୍ଦ ହୋଇଯିବ।
ଏହା ସହିତ, ବେକରି, ରେଷ୍ଟୁରାଣ୍ଟ ଏବଂ ଅନ୍ୟାନ୍ୟ ଖାଦ୍ୟ ଦୋକାନ, ବିବାହ ହଲ୍, ତମ୍ବୁ ଏବଂ ବିବାହ ଏବଂ ଅନ୍ୟାନ୍ୟ କାର୍ଯ୍ୟକ୍ରମ ଆୟୋଜନ କରୁଥିବା ଅନ୍ୟାନ୍ୟ ବାଣିଜ୍ୟିକ ସ୍ଥାନଗୁଡ଼ିକ ରାତି ୧୦ଟା ପରେ ବନ୍ଦ ରହିବ। ବୈଠକରେ ରାତି ୧୦ଟା ପରେ ଘରୋଇ ସମ୍ପତ୍ତି ଏବଂ ଘରେ ବିବାହ ଉତ୍ସବ ଉପରେ ପ୍ରତିବନ୍ଧକ ଲଗାଇବାକୁ ମଧ୍ୟ ନିଷ୍ପତ୍ତି ନିଆଯାଇଛି। ତଥାପି, ମେଡିକାଲ୍ ଷ୍ଟୋର ଏବଂ ଔଷଧ ଦୋକାନଗୁଡ଼ିକୁ ଏହି କଟକଣାରୁ ବାଦ ଦିଆଯାଇଛି। ଏହା ମଧ୍ୟ ସ୍ପଷ୍ଟ କରାଯାଇଥିଲା ଯେ ଏହି କଟକଣାଗୁଡ଼ିକ ମଙ୍ଗଳବାରଠାରୁ କାର୍ଯ୍ୟକାରୀ ହେବ। ଏହା ଅନ୍ତର୍ଗତ ରାତି ୮ଟାରୁ ପାକିସ୍ତାନରେ ଏକ ସ୍ମାର୍ଟ ଲକଡାଉନ୍ ଲାଗୁ କରାଯିବ ବୋଲି ଘୋଷଣା ହୋଇଛି ।