ୱାସିଂଟନ: ଆମେରିକାର ସ୍ପେସ୍ ଏଜେନ୍ସି ନାସା ଏବଂ ୟୁରୋପୀୟ ସ୍ପେସ୍ ଏଜେନ୍ସି ଇଏଏସର ସୋଲାର ଅର୍ବିଟର ସୂର୍ୟ୍ୟଙ୍କର ନିକଟତମ ଚିତ୍ର ଏବେ ହସ୍ତଗତ ହୋଇଛି । ଏହି ସୋଲାର ଅର୍ବିଟର ପ୍ରଥମ ଥର ପାଇଁ ଏଜେନ୍ସିଙ୍କୁ ତଥ୍ୟ ପଠାଇଛି । ୯ ଫେବୃଆରୀ ୨୦୨୦ ରେ ଲଞ୍ଚ କରାଯାଇଥିଲା ଏହି ସୋଲାର ଅର୍ବିଟର । ଏଥିରେ ଇଏଏସ ଏବଂ ନାସା ସହଯୋଗରେ ସୂର୍ୟ୍ୟ ଅଧ୍ୟୟନ ପାଇଁ ଏହାକୁ ପଠାଯାଇଥିଲା । ଜୁନ୍ ମଧ୍ୟ ଭାଗରେ ସୂର୍ୟ୍ୟର ଖୁବ ନିକଟ ଦେଇ ଏହି ଅର୍ବିଟର ଅତିକ୍ରମ କରିଥିଲା ।
ନାସାର ପ୍ରୋଜେକ୍ଟ ବୈଜ୍ଞାନିକ ହୋଲି ଗିଲବର୍ଟ କହିଛନ୍ତି, ଆମେ ବର୍ତ୍ତମାନ ପର୍ୟ୍ୟନ୍ତ ସୂର୍ୟ୍ୟଙ୍କ ଯେତେ ଫଟୋ ପାଇଛୁ ଏହା ସବୁଠାରୁ ନିକଟତମ ଫଟୋ । କମ ସମୟ ମଧ୍ୟରେ ଅଧିକ ଭଲ ଫଳାଫଳ ପାଇବାକୁ ଆଶା କରୁନାହାଁନ୍ତି । କିନ୍ତୁ ‘ସୋଲାର ଅର୍ବିଟର୍ ଏକ ଭଲ ଆରମ୍ଭ କରିଛି’ ଯାହା ଆମର ଆଶାକୁ ବଢାଇ ଦେଇଛି ବୋଲି ସେ ସୂଚନା ଦେଇ କହିଛନ୍ତି ।
ସୋଲାର ଅର୍ବିଟର୍ ଦ୍ୱାରା ପଠାଯାଇଥିବା ଚିତ୍ରଗୁଡ଼ିକ ଅତ୍ୟନ୍ତ ସୁନ୍ଦର ହୋଇଛି । ଏଥିରେ ଅଗଣିତ ବଡ଼ ଏବଂ ଛୋଟ ଅଗ୍ନିର ଶିଖା ସବୁ ଜାଗାରେ ଦେଖାଯାଉଛି । ଯେତେବେଳେ ଅର୍ବିଟର ଏହି ଚିତ୍ରଗୁଡ଼ିକ ନେଇଥିଲା, ସେତେବେଳେ ଅର୍ବିଟର ସୂର୍ୟ୍ୟଠାରୁ ପ୍ରାୟ ୭ କୋଟି ୭୦ ଲକ୍ଷ କିଲୋମିଟର ଦୂରରେ ଥିଲା ।
ବୈଜ୍ଞାନିକମାନେ ଏହି ନିଆଁକୁ ‘କ୍ୟାମ୍ପଫାୟାର’ ବୋଲି କହିଛନ୍ତି, ଯଦିଓ ଏହି କ୍ୟାମ୍ପଫାୟାରଗୁଡିକ କ’ଣ ଏବଂ ସୂର୍ୟ୍ୟଙ୍କୁ ଉଜ୍ଜ୍ୱଳ କରିବା ପାଇଁ ସେମାନେ କିପରି ଉପଯୁକ୍ତ ତାହା ଏପର୍ୟ୍ୟନ୍ତ ସ୍ପଷ୍ଟ ହୋଇନାହିଁ । ଆନ୍ତର୍ଜାତୀୟ ପ୍ରୋଜେକ୍ଟ ସୋଲାର ଅର୍ବିଟରରେ ୬ ଟି ଇମେଜିଙ୍ଗ୍ ଟୁଲ୍ ଅଛି, ଯାହାର ପ୍ରତ୍ୟେକଟି ଟୁଲ୍ ସୂର୍ୟ୍ୟର ବିଭିନ୍ନ ଦିଗ ଉପରେ ଅଧ୍ୟୟନ କରୁଛି । ସୋଲାର ଅର୍ବିଟରରେ ଏକ ଅତ୍ୟଧିକ ଅତି ବାଇଗଣୀ ଇମେଜର ସ୍ଥାପନ କରାଯାଇଛି । ବୈଜ୍ଞାନିକମାନେ ଆଶା କରୁଛନ୍ତି ଯେ ଏହି ଅର୍ବିଟର ଆଉ ଟିକେ ସୂର୍ୟ୍ୟଙ୍କ ନିକଟକୁ ଆସିବାବେଳେ ସୂର୍ୟ୍ୟଙ୍କ ମଧ୍ୟରେ ଘଟୁଥିବା ସୌର ପବନର ସଂରଚନାକୁ ମଧ୍ୟ ଦେଖାଯାଇପାରେ ।
