ଆଇପିଏଲ୍ ୨୦୨୬ର ୫୩ତମ ମ୍ୟାଚ୍ରେ ଚେନ୍ନାଇର ଦମ୍ଦାର ବିଜୟ ହୋଇଛି । ଚେନ୍ନାଇର ଏମ୍ଏ ଚିଦାମ୍ବରମ ଷ୍ଟାଡିୟମରେ ଘରୋଇ ଦଳ ଲକ୍ଷ୍ନୌ ସୁପର ଜାଏଣ୍ଟସ୍କୁ ୫ ୱିକେଟ୍ରେ ପରାସ୍ତ କରିଛି । ଚେନ୍ନାଇ ଦଳ ୨୦୪ ରନ୍ର ବିଜୟ ଲକ୍ଷ୍ୟ ନେଇ ବ୍ୟାଟିଂ କରିଥିଲା । ୧୯.୨ ଓଭରରେ ୫ଟି ୱିକେଟ୍ ହରାଇ ୨୦୮ ରନ୍ ସଂଗ୍ରହ କରି ବିଜୟ ହୋଇଛି ଚେନ୍ନାଇ ।
ପ୍ରଥମେ ବ୍ୟାଟିଂ କରିଥିବା ଲକ୍ଷ୍ନୌ ଏକ ବିଶାଳ ସ୍କୋର ଛିଡ଼ା କରିଥିଲା । ଜୋଶ୍ ଇଙ୍ଗଲିସ ମାତ୍ର ୩୩ ବଲରେ ୮୫ ରନ (୧୦ ଚୌକା, ୬ ଛକା) କରି ଚେନ୍ନାଇ ବୋଲରଙ୍କୁ ନାକେଦମ୍ କରିଦେଇଥିଲେ। ତାଙ୍କ ଯୋଗୁଁ ଲକ୍ଷ୍ନୌ ପାୱାରପ୍ଲେରେ ୯୧/୧ ର ସ୍କୋର କରିଥିଲା । ମଧ୍ୟକ୍ରମରେ ବ୍ୟାଟିଂ ବିପର୍ଯ୍ୟୟ ଘଟିଥିଲେ ମଧ୍ୟ ଶାହବାଜ ଅହମ୍ମଦ ୪୩ (୨୫) ରନ କରି ଦଳୀୟ ସ୍କୋରକୁ ୨୦୦ ପାର୍ କରାଇଥିଲେ । ଚେନ୍ନାଇ ପକ୍ଷରୁ ଓଭରଟନ ଚମତ୍କାର ବୋଲିଂ କରି ୩ଟି ଗୁରୁତ୍ୱପୂର୍ଣ୍ଣ ୱିକେଟ୍ ଅଖତିଆର କରିଥିଲେ।
୨୦୪ ରନର ବିଶାଳ ଲକ୍ଷ୍ୟକୁ ପିଛା କରି ଚେନ୍ନାଇ ୧୯.୨ ଓଭରରେ ବିଜୟ ହାସଲ କରିଥିଲା । ଚେନ୍ନାଇର ଯୁବ ତାରକା ଉର୍ଭିଲ ପଟେଲ ଆଜିର ମ୍ୟାଚ୍ର ଅସଲି ହିରୋ ଥିଲେ। ମାତ୍ର ୧୩ ବଲ୍ ରେ ଉର୍ଭିଲ ଅର୍ଦ୍ଧଶତକ ହାସଲ କରି ଆଇପିଏଲ୍ ଇତିହାସର ଯୁଗ୍ମ-ଦ୍ରୁତତମ ଅର୍ଦ୍ଧଶତକର ରେକର୍ଡ କରିଛନ୍ତି । ସେ ମୋଟ ୨୩ ବଲ୍ରେ ୬୫ ରନ କରିଥିଲେ । ରୁତୁରାଜ ଗାୟକୱାଡ୍ ୪୨ ରନ କରି ଗୋଟିଏ ପଟେ ପାଳିକୁ ସମ୍ଭାଳି ରଖିଥିଲେ । ସାମସନ ୨୮ ରନ କରିଥିବା ବେଳେ କାର୍ତ୍ତିକ ଶର୍ମା ୨୦ ରନ କରିଥିଲେ । ଦୁବେ ୭ ବଲରୁ ୧୫ ରନ କରିଥିବାବେଳେ ପ୍ରଶାନ୍ତ ବୀର ୧୨ ବଲରୁ ୧୮ ରନ କରିଛନ୍ତି ।
