ଭାରତର ବିସ୍ମୟ ବାଳକ ବୈଭବ ସୂର୍ଯ୍ୟବଂଶୀ ଆଉ ଏକ କୀର୍ତ୍ତିମାନ ରେକର୍ଡ

ଭାରତର ବିସ୍ମୟ ବାଳକ ବୈଭବ ସୂର୍ଯ୍ୟବଂଶୀ ଆଉ ଏକ କୀର୍ତ୍ତିମାନ ରେକର୍ଡ । ଭାରତ ଏ ବନାମ ଶ୍ରୀଲଙ୍କା ଏ ମଧ୍ୟରେ ଖେଳାଯାଉଥିବା ଟ୍ରାଇ ସିରିଜ୍ ଫାଇନାଲରେ ବୈଭବ ବିସ୍ଫୋରଣ ଦେଖିବାକୁ ମିଳିଛି । ଲିଷ୍ଟ ଏ କ୍ରିକେଟରେ ବିଶ୍ୱ ରେକର୍ଡ କରିଛନ୍ତି ୧୫ ବର୍ଷୀୟ ବୈଭବ । ୧୧ ବଲରେ ଦ୍ରୁତ ଅର୍ଦ୍ଧଶତକ ହାସଲ କରିଛନ୍ତି । ୩୨୪ ଷ୍ଟ୍ରାଇକ ରେଟରେ ୨୯ ବଲରେ ୯୪ ରନର ବିସ୍ଫୋରକ ଇନିଂସ ଖେଳିଛନ୍ତି ବ୍ୟାଟିଂ ସେନ୍ସସେସନ୍ ବୈଭବ । ଯେଉଁଥିରେ ୧୦ଟି ଚୌକା ଏବଂ ୮ଟି ଛକା ସାମିଲ । ଏହା ସହିତ ୨୦ ବର୍ଷର ରେକର୍ଡ ଭାଙ୍ଗିଛନ୍ତି ବୈଭବ ।

ଆଇପିଏଲ ପରେ ବ୍ୟାଟ୍ ଶାନ୍ତ ଥିଲା । ବଡ଼ ଇନିଂସ ଖେଳିବାରେ ବିଫଳ ହୋଇଥିଲେ । ଟିମ୍ ଇଣ୍ଡିଆରେ ସ୍ଥାନ ମିଳିବା ଉପରେ ପ୍ରଶ୍ନ ଉଠିଥିଲା । କିନ୍ତୁ ଏବେ ଗର୍ଜିଛି ବିସ୍ମୟ ବୈଭବ ସୂର୍ଯ୍ୟବଂଶୀଙ୍କ ବ୍ୟାଟ୍ । ଆଜି ଟ୍ରାଇ ସିରିଜର ଫାଇନାଲ ମ୍ୟାଚରେ ଶ୍ରୀଲଙ୍କା ଏ ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେବା ପରେ ୧୫ ବର୍ଷୀୟ ଓପନର୍ ବୈଭବ ଶ୍ରୀଲଙ୍କା ବୋଲରମାନଙ୍କ ଉପରେ ଭୟଙ୍କର ଆକ୍ରମଣ ଆରମ୍ଭ କରିଥିଲେ। ସେ ମାତ୍ର ୧୧ଟି ବଲ୍‌ରେ ଅର୍ଦ୍ଧଶତକ ପୂରଣ କରିଥିଲେ । ଏହି ଅସାଧାରଣ କୃତିତ୍ୱ ସହିତ ସୂର୍ଯ୍ୟବଂଶୀ ୨୦୦୫ ମସିହାରେ ଶ୍ରୀଲଙ୍କାର କୌଶଲ୍ୟ ୱିରାରତ୍ନେ ସ୍ଥାପନ କରିଥିବା ୧୨ ବଲ୍‌ରେ ସବୁଠାରୁ ଦ୍ରୁତ ଅର୍ଦ୍ଧଶତକର ବିଶ୍ୱ ରେକର୍ଡକୁ ଭାଙ୍ଗିଦେଇଥିଲେ ।

ସେହିପରି ଛକା ମାରିବାରେ ଗେଲ୍ ଏବଂ ରସେଲଙ୍କୁ ପଛରେ ପକାଇଲେ ବୈଭବ । ଗୋଟିଏ ସିଜିନରେ ସର୍ବାଧିକ ୬୦ ଛକା ମାରି ଇତିହାସ ରଚିଲେ । ୨୦୧୨ରେ କ୍ରିସ୍ ଗେଲ୍ ୫୯ଟି ଛକା ମାରିଥିଲେ । ରସେଲ୍ ୨୦୧୯ରେ ୫୨ଟି ଛକା ମାରିଥିଲେ । ପୂର୍ବରୁ ୧୬ ବଲରୁ ଅର୍ଦ୍ଧଶତକ ପୂରଣ କରିଥିଲେ ବୈଭବ ସୂର୍ଯ୍ୟବଂଶୀ । ୨୯ ବଲରେ ୯୭ ରନ୍ ହାସଲ କରିଥିଲେ ବୈଭବ ।