ଚାମ୍ପିଅନ୍ ଭାରତୀୟ ପୁରୁଷ କବାଡ଼ି ଦଳ ସୋମବାର ଦିନ ଆଇଚି ପ୍ରିଫେକ୍ଚରର ଟୋକାଇ ସିଟିଜେନ୍ସ ଜିମ୍ନାସିୟମ୍ରେ ଆୟୋଜକ ଜାପାନକୁ ୪୯-୨୪ ବ୍ୟବଧାନରେ ସହଜରେ ପରାସ୍ତ କରି ନିଜର ଟାଇଟଲ୍ ବଜାୟ ରଖିବା ଅଭିଯାନ ଆରମ୍ଭ କରିଛି। ଏସୀୟ କ୍ରୀଡ଼ାରେ ପ୍ରଥମ ଥର ପାଇଁ ଅଂଶଗ୍ରହଣ କରୁଥିବା ଅୟନ୍ ଲୋହଚାବ୍, ଦେବାଙ୍କ ଦଲାଲ୍ ଏବଂ ଆଶୁ ମଲିକ ଏହି ମ୍ୟାଚରେ ଭାରତର ମୁଖ୍ୟ ଆକ୍ରମଣକାରୀ (ରେଡର୍) ଭାବେ ଉଲ୍ଲେଖନୀୟ ପ୍ରଦର୍ଶନ କରିଥିଲେ। ମଙ୍ଗଳବାର ଦିନ ଭାରତ ନିଜର ଦ୍ୱିତୀୟ ଗ୍ରୁପ୍ ମ୍ୟାଚରେ ଦକ୍ଷିଣ କୋରିଆର ମୁକାବିଲା କରିବ। ପ୍ରତ୍ୟେକ ଗ୍ରୁପର ଶ୍ରେଷ୍ଠ ଦୁଇଟି ଦଳ ସେମିଫାଇନାଲକୁ ଉନ୍ନୀତ ହେବେ।
ଏହି ମ୍ୟାଚରେ ଭାରତୀୟ ଦଳ ଆରମ୍ଭରୁ ହିଁ ଦମଦାର ପ୍ରଦର୍ଶନ କରିଥିଲା । ଏବଂ ଆୟୋଜକ ଦଳକୁ ଦୁଇଥର ‘ଅଲ୍-ଆଉଟ୍’ କରି ୧୮-୨ରେ ଅଗ୍ରଣୀ ହାସଲ କରିଥିଲା। ରେଡର୍ ଆଶୁ ଦଳକୁ ଏକ ଶକ୍ତିଶାଳୀ ଆରମ୍ଭ ଦେବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ। ବିଶେଷକରି ତାଙ୍କର ଏକ ‘ସୁପର ରେଡ୍’ (ଯେଉଁଥିରେ ତିନି ପଏଣ୍ଟ ମିଳିଥିଲା) ଦଳକୁ ପ୍ରାରମ୍ଭିକ ଅଗ୍ରଣୀ ହାସଲ କରିବାରେ ସହାୟକ ହୋଇଥିଲା। ପ୍ରଥମାର୍ଦ୍ଧରେ ଭାରତର ପ୍ରାଧାନ୍ୟ ରହିଥିଲା ଏବଂ ବିରତି ସମୟରେ ଦଳ ୩୧-୯ରେ ଆଗୁଆ ରହିଥିଲା। ଏହି ସମୟ ମଧ୍ୟରେ ଭାରତ ପ୍ରତିପକ୍ଷକୁ ତିନିଥର ‘ଅଲ୍-ଆଉଟ୍’ କରିଥିଲା। ଆଶୁ ମଲିକ ଆକ୍ରମଣ ଭାଗ ସମ୍ଭାଳିଥିବା ବେଳେ ରାହୁଲ ସେଠପାଲ୍ ରକ୍ଷଣଭାଗରେ ଦୃଢ଼ ପ୍ରଦର୍ଶନ କରିଥିଲେ।
ଜାପାନ ମୁଖ୍ୟତଃ ‘ବୋନସ୍ ପଏଣ୍ଟ’ ଜରିଆରେ ପଏଣ୍ଟ ସଂଗ୍ରହ କରିପାରିଥିଲା, କାରଣ ଭାରତ ସମ୍ପୂର୍ଣ୍ଣ ସମୟ ଧରି ସେମାନଙ୍କୁ ଚାପରେ ରଖିଥିଲା। ଖେଳ ପୁନର୍ବାର ଆରମ୍ଭ ହେବାର କିଛି ସମୟ ପରେ, ଭାରତ ଜାପାନକୁ ମ୍ୟାଚର ତୃତୀୟ ‘ଅଲ୍-ଆଉଟ୍’ କରି ୪୦-୧୨ରେ ଅଗ୍ରଣୀ ହୋଇଥିଲା। ତଥାପି, ଜାପାନ ପ୍ରତ୍ୟାବର୍ତ୍ତନ କରିଥିଲା ଏବଂ ସେହି ସମୟ ପରଠାରୁ ଭାରତ ତୁଳନାରେ ଅଧିକ ପଏଣ୍ଟ ହାସଲ କରି ପରାଜୟର ବ୍ୟବଧାନ କମାଇଥିଲା, କିନ୍ତୁ ଭାରତ ନିଜର ଅଗ୍ରଣୀ ସ୍ଥିତି ବଜାୟ ରଖି ବିଜୟ ସହ ମ୍ୟାଚ୍ ଶେଷ କରିଥିଲା।
ଏସୀୟ କ୍ରୀଡ଼ା କବାଡ଼ି ଇତିହାସରେ ଭାରତ ସବୁଠାରୁ ସଫଳ ଦଳ ଅଟେ; ଏଥିରେ ଉପଲବ୍ଧ ମୋଟ ୧୩ଟି ସ୍ୱର୍ଣ୍ଣ ପଦକ ମଧ୍ୟରୁ ଭାରତ ୧୧ଟି ଜିତିଛି। ପୁରୁଷ ଦଳ ୯ଟି ପ୍ରତିଯୋଗିତା ମଧ୍ୟରୁ ୮ଟିରେ ବିଜୟୀ ହୋଇଛି ଏବଂ କେବଳ ୨୦୧୮ ଜାକର୍ତ୍ତା କ୍ରୀଡ଼ାରେ ବ୍ରୋଞ୍ଜ ପଦକ ପାଇଛି। ସେହିପରି ମହିଳା ଦଳ ୪ଟି ପ୍ରତିଯୋଗିତା ମଧ୍ୟରୁ ୩ଟିରେ ସ୍ୱର୍ଣ୍ଣ ପଦକ ଜିତିଥିବାବେଳେ ୨୦୧୮ରେ ରୌପ୍ୟ ପଦକ ହାସଲ କରିଛି।ଏସୀୟ କ୍ରୀଡ଼ାରେ ଜାପାନର ସର୍ବୋତ୍ତମ ପ୍ରଦର୍ଶନ ୨୦୧୦ ଗୁଆଙ୍ଗଜୋ କ୍ରୀଡ଼ାରେ ଦେଖିବାକୁ ମିଳିଥିଲା, ଯେତେବେଳେ ପୁରୁଷ ଦଳ ବ୍ରୋଞ୍ଜ ପଦକ ଜିତିଥିଲା।