କ୍ରିକେଟ୍ ପ୍ରେମୀଙ୍କ ପାଇଁ ଆସିଛି ବଡ଼ ଖୁସି ଖବର। ପୁଣିଥରେ ବିଶ୍ୱ କ୍ରିକେଟ୍ର ମହାକୁମ୍ଭ ଆୟୋଜନ କରିବ ଭାରତ। ୨୦୩୧ ମସିହାର ଆଇସିସି ଦିନିକିଆ ବିଶ୍ୱକପ୍ ଆୟୋଜନ ଦାୟିତ୍ୱ ଭାରତକୁ ମିଳିଛି। ଏହି ମେଗା ଟୁର୍ଣ୍ଣାମେଣ୍ଟରେ ଭାରତ ସହ ବାଂଲାଦେଶ ମଧ୍ୟ ସହ-ଆୟୋଜକ ରହିବ। ଆଇସିସିର ନୂଆ ଘୋଷଣା ଅନୁଯାୟୀ, ୨୦୩୧ ଅକ୍ଟୋବର ୯ରୁ ନଭେମ୍ବର ୨୩ ତାରିଖ ଯାଏଁ ଏହି ପ୍ରତିଯୋଗିତା ଚାଲିବ। ତେବେ କେଉଁ କେଉଁ ସହରରେ ମ୍ୟାଚ୍ ଖେଳାଯିବ, ସେନେଇ ବିସ୍ତୃତ ସୂଚୀ ପରବର୍ତ୍ତୀ ସମୟରେ ଘୋଷଣା କରାଯିବ।

ଏହି ଆୟୋଜନ ଭାରତୀୟ କ୍ରିକେଟ୍ ପାଇଁ ଏକ ବଡ଼ ସୁଯୋଗ ହେବାକୁ ଯାଉଛି। ଦେଶର ବିଭିନ୍ନ ଷ୍ଟାଡିୟମ୍ରେ ବିଶ୍ୱର ଶ୍ରେଷ୍ଠ ଦଳ ଓ ଖେଳାଳିଙ୍କୁ ଦେଖିବାର ସୁଯୋଗ ପାଇବେ କ୍ରିକେଟ୍ ପ୍ରେମୀ। ଏହା ସହିତ ପର୍ଯ୍ୟଟନ, ହୋଟେଲ୍ ଶିଳ୍ପ ଓ କ୍ରୀଡ଼ା ଭିତ୍ତିଭୂମିକୁ ମଧ୍ୟ ମିଳିପାରେ ନୂଆ ଗତି। ୨୦୨୩ରେ ଭାରତ ଏକକ ଭାବେ ଦିନିକିଆ ବିଶ୍ୱକପ୍ ଆୟୋଜନ କରିଥିବାବେଳେ, ୨୦୩୧ରେ ପୁଣି ଥରେ ବିଶ୍ୱକପ୍ ଆୟୋଜନର ଦାୟିତ୍ୱ ମିଳିବା କ୍ରିକେଟ୍ ଜଗତରେ ଭାରତର ଗୁରୁତ୍ୱକୁ ଦର୍ଶାଉଛି।