ନୂଆଦିଲ୍ଲୀ-: ଜାତିସଂଘରେ ପାକିସ୍ତାନର ପୋଲ ଖୋଲିଲା ଭାରତ । ପାକିସ୍ତାନକୁ ଆତଙ୍କବାଦର ପ୍ରାୟୋଜକ ରାଷ୍ଟ୍ର ଘୋଷଣା କରିବା ପାଇଁ କୂଟନୈତିକ ଭାବରେ କାମ କରିବାର ଦାବି ବୃଦ୍ଧି ପାଉଥିବାବେଳେ ଜାତିସଂଘ ବୈଠକରେ ଭାରତ ରାଷ୍ଟ୍ରଦୂତ ଯୋଜନା ପଟେଲ କହିଛନ୍ତି ପାକିସ୍ତାନ ଆତଙ୍କବାଦକୁ ସମର୍ଥନ ଦେଉଥିବା କ୍ଷେତ୍ରରେ ବିଶ୍ୱ ଆଉ ଆଖି ବନ୍ଦ କରିପାରିବ ନାହିଁ । ପାକିସ୍ତାନ ଆତଙ୍କବାଦକୁ ସମର୍ଥନ କରିବା ସହିତ ସେମାନଙ୍କୁ ପାଣ୍ଠି ଏବଂ ତାଲିମ ଦେଉଛି । ଏହିକଥା ନିଜେ ପାକିସ୍ତାନୀ ପ୍ରତିରକ୍ଷା ମନ୍ତ୍ରୀ ଖ୍ୱାଜା ଆସିଫ୍ ଏକ ସାମ୍ପ୍ରତିକ ଟିଭି ସାକ୍ଷାତକାରରେ ସ୍ୱୀକାର କରିଛନ୍ତି । ତାଙ୍କର ଏହି ଖୋଲା ସ୍ୱୀକାରୋକ୍ତି କାହାରିକି ଆଉ ଅଛପା ନାହିଁ । ଜମ୍ମୁ କାଶ୍ମୀରର ପହଲଗାମରେ ସମ୍ପ୍ରତି ଆତଙ୍କବାଦୀ ଆକ୍ରମଣ ପରେ ସାରା ଦେଶର ନେତା ଏବଂ ସରକାରଙ୍କ ଦ୍ୱାରା ପ୍ରଦାନ କରାଯାଇଥିବା ଦୃଢ଼ ସମର୍ଥନ ପାଇଁ ଭାରତ କୃତଜ୍ଞ ଅଟେ । ଏହା ଆତଙ୍କବାଦ ପ୍ରତି ଅନ୍ତର୍ଜାତୀୟ ସମୁଦାୟର ଶୂନ୍ୟ ସହନଶୀଳତାର ପ୍ରମାଣ ଦେଉଛି । ସେ ସମସ୍ତ ପ୍ରକାରର ଆତଙ୍କବାଦ ଓ ଆତଙ୍କବାଦୀ କାର୍ଯ୍ୟକଳାପକୁ ସ୍ପଷ୍ଟ ଭାବରେ ନିନ୍ଦା କରିବାକୁ ଆହ୍ୱାନ ଦେଇଛନ୍ତି ।
