ଚୀନକୁ ଆମେରିକାର ଧମକ : ଯୁଦ୍ଧରେ ଋଷକୁ ସାହଯ୍ୟ କଲେ ମିଳିବ ଭୟଙ୍କର ଫଳ

ୱାସିଂଟନ : ୟୁକ୍ରେନ-ଋଷ ଯୁଦ୍ଧକୁ ପୁରିଗାଲା ୩ ସପ୍ତାହ । କିନ୍ତୁ ଏପର୍ଯ୍ୟନ୍ତ ଏହାର କୌଣସି ସମାଧାନର ବାଟ ବାହାରି ପାରିଲାନାହିଁ । ଏହି ଯୁଦ୍ଧରେ କିଛି ଦେଶ ୟୁକ୍ରେନକୁ ସମର୍ଥନ କରୁଥିବା ବେଳେ, ଅନ୍ୟ କିଛି ଦେଶ ଋଷକୁ ସମର୍ଥନ କରୁଥିବାର ଦେଖିବାକୁ ମିଳୁଛି । ଏହି ପ୍ରସଙ୍ଗରେ ଚୀନ ମଧ୍ୟ ଋଷକୁ ସମର୍ଥନ କରିବା କଥା ଶୁଣା ଯାଇଛି । ଏଣୁ ଚୀନକୁ ଚେତାବନୀ ଶୁଣାଇଛି ଆମେରିକା । ଚୀନ ଯଦି ଏହି ଯୁଦ୍ଧରେ ରୁଷକୁ ସାମରିକ ଓ ଅନ୍ୟ କୌଣସି ଉପାୟରେ ସହାୟତା କରେ ତେବେ ଚୀନକୁ ଉଚିତ ଶାସ୍ତି ଦିଆଯିବ ।

ଆମେରିକାର ପରରଷ୍ଟ୍ର ସଚିବ ଆନ୍ଥୋନି ବ୍ଲିନକେନ ଏକ ସାମ୍ବାଦିକ ସମ୍ମିଳନୀରେ କହିଛନ୍ତି ଯେ ଚୀନ ସିଧାସଳଖ ରୁଷକୁ ସହାୟତା କରିବାକୁ ବିଚାର କରୁଥିବା କଥା ଜଣାପଡ଼ିଛି । ଏହା ବେଶ ଚିନ୍ତାର ବିଷୟ । ଏହି ପ୍ରସଙ୍ଗକୁ ନେଇ ରାଷ୍ଟ୍ରପତି ଜୋ ବାଇଡେନ ଶୁକ୍ରବାର ଚୀନ ରାଷ୍ଟ୍ରପତି ସି ଜିନ ପିଙ୍ଗଙ୍କ ସହ କଥାହେବେ । ଏଥି ସହ ଯଦି ଚୀନ ଋଷକୁ ସାହାଯ୍ୟ କରେ ବା କୌଣସି ଅସ୍ତ୍ରଶସ୍ତ୍ର ଦିଏ ତେବେ ଚୀନକୁ ଏହାର ଫଳାଫଳ ଭୋଗିବାକୁ ପଡିବ ।

ଚୀନକୁ ସିଧାସଳଖ ଧମକ ଦେଇଛନ୍ତ ବରିଷ୍ଠ ଆମେରିକୀୟ ଅଧିକାରୀ । ସେ ଆହୁରି ମଧ୍ୟ କହିଛନ୍ତି ଯେ ରୁଷ ସହ ଚୀନର ସ୍ବତନ୍ତ୍ର ବନ୍ଧୁତା ରହିଛି । ଏଣୁ ଏହି ଯୁଦ୍ଧ ବନ୍ଦ ପାଇଁ ପୁଟିନଙ୍କୁ ବୁଝାଇବା ପାଇଁ ଚୀନର ଦାୟିତ୍ବ ମଧ୍ୟ ଅଧିକ ରହିଛି । କିନ୍ତୁ ଚୀନ ଏପରି କରିବା ପରିବର୍ତ୍ତେ ଋଷର ଏପରି କାର୍ଯ୍ୟକୁ ନିନ୍ଦା କରୁନାହିଁ  ।