ଅଷ୍ଟ୍ରେଲିୟ ଅଲରାଉଣ୍ଡର ଗ୍ଲେନ୍ ମ୍ୟାକ୍ସୱେଲ୍ ଅନ୍ତର୍ଜାତୀୟ କ୍ରିକେଟରୁ ଅବସର ଘୋଷଣା କରିଛନ୍ତି, ଯାହା ଦ୍ୱାରା ସେ ତାଙ୍କର ଆକ୍ରମଣାତ୍ମକ ବ୍ୟାଟିଂ ଏବଂ ଅସାଧାରଣ ସଟ୍ ସହିତ ପ୍ରଶଂସକମାନଙ୍କୁ ମନୋରଞ୍ଜନ କରୁଥିବା କ୍ୟାରିୟରର ଅନ୍ତ ଘଟାଇଛନ୍ତି। ମ୍ୟାକ୍ସୱେଲ୍ ମଙ୍ଗଳବାର ଦି ଫାଇନାଲ୍ ୱାର୍ଡ ପୋଡକାଷ୍ଟର ଏକ ଏପିସୋଡ୍ ସମୟରେ ଏହି ଘୋଷଣା କରିଛନ୍ତି। ତାଙ୍କ ନିଷ୍ପତ୍ତିରେ ଭିକ୍ଟୋରିଆ ପାଇଁ ଘରୋଇ ୫୦ ଓଭର ଏବଂ ଚାରି ଦିନିଆ କ୍ରିକେଟରୁ ତାଙ୍କର ଅବସର ମଧ୍ୟ ଅନ୍ତର୍ଭୁକ୍ତ। ‘ଦି ବିଗ୍ ଶୋ’ ନାମରେ ଜଣାଶୁଣା ମ୍ୟାକ୍ସୱେଲ ୧୪୯ଟି ଦିନିକିଆ, ୧୩୦ଟି ଟି-୨୦ ଏବଂ ସାତଟି ଟେଷ୍ଟ ମ୍ୟାଚ୍ ରେ ଅଷ୍ଟ୍ରେଲିଆର ପ୍ରତିନିଧିତ୍ୱ କରିଥିଲେ। ସେ ଅଷ୍ଟ୍ରେଲିଆର ୨୦୧୫ ଏବଂ ୨୦୨୩ର ଏକଦିବସୀୟ ବିଶ୍ୱକପ୍ ବିଜୟୀ ଦଳର ଅଂଶ ଥିଲେ ଏବଂ ୨୦୨୧ରେ ଦଳର ଟି-୨୦ ବିଶ୍ୱକପ୍ ବିଜୟରେ ମଧ୍ୟ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ।
ବାସ୍ତବରେ ଗତ କିଛି ସମୟ ଧରି ଅଷ୍ଟ୍ରେଲିଆ ଦଳରେ ତାଙ୍କର ଭୂମିକା କମିବାରେ ଲାଗିଥିଲା। ୨୦୨୫ ଜୁନ୍ରେ ସେ ଦିନିକିଆ କ୍ରିକେଟ୍ରୁ ଅବସର ନେଇଥିଲେ। ଏହାପରେ ୨୦୨୬-୨୭ ସିଜନ୍ ପାଇଁ ଅଷ୍ଟ୍ରେଲିଆର କେନ୍ଦ୍ରୀୟ ଚୁକ୍ତି ତାଲିକାରେ ମଧ୍ୟ ତାଙ୍କୁ ସ୍ଥାନ ମିଳିନଥିଲା। ୨୦୨୬ ଫେବ୍ରୁଆରୀ ୨୦ରେ ଓମାନ ବିପକ୍ଷରେ ଟି-୨୦ ବିଶ୍ୱକପ୍ ମ୍ୟାଚ୍ ଥିଲା ଅଷ୍ଟ୍ରେଲିଆ ପାଇଁ ତାଙ୍କର ଶେଷ ଅନ୍ତର୍ଜାତୀୟ ମ୍ୟାଚ୍। ସେହି ମ୍ୟାଚ୍ରେ ୩ ଓଭର ବୋଲିଂ କରି ୧୩ ରନ୍ ଦେଇ ୨ଟି ୱିକେଟ୍ ନେଇଥିଲେ। ଶାରୀରିକ ଫିଟନେସ୍କୁ ଅଧିକ ଗୁରୁତ୍ୱ ଦେବା ଏବଂ ନିଜର ବାକି କ୍ରିକେଟ୍ ଯାତ୍ରାକୁ ଜାରି ରଖିବା ପାଇଁ ସେ ଏହି ନିଷ୍ପତ୍ତି ନେଇଛନ୍ତି। ନିଜ ଘରୋଇ ଗ୍ରାଉଣ୍ଡ୍ ମେଲବର୍ଣ୍ଣ କ୍ରିକେଟ୍ ଗ୍ରାଉଣ୍ଡ୍ରେ ଏକ ବିଦାୟୀ ମ୍ୟାଚ୍ ଖେଳିବାର ଆଶା ରଖିଥିଲେ ମଧ୍ୟ ସେହି ସୁଯୋଗ ତାଙ୍କୁ ମିଳିନାହିଁ।