ଆଜି ଲୋକସଭାରେ ଆଗତ ହେଲା ୱାକଫ ସଂଶୋଧିତ ବିଲ୍ । ଏହି ବିଲ୍ ରେ କିଛି ଗୁରୁତ୍ୱପୂର୍ଣ୍ଣ ସଂଶୋଧନ କରାଯାଇଛି । ଏହି ବିଲ ଅନୁଯାୟୀ, ସରକାରୀ ସମ୍ପତ୍ତିକୁ ୱାକଫ ସମ୍ପତ୍ତି ଭାବେ ଘୋଷଣା କରାଯାଇଥିଲେ ମଧ୍ୟ ତାହା ଓ୍ବକଫ ସମ୍ପତ୍ତି ଭାବେ ଗଣ୍ୟ ହେବ ନାହିଁ। ଏହା ଓ୍ବକଫ ବୋର୍ଡଙ୍କ ଐତିହାସିକ ଅଧିକାରକୁ ସୀମିତ କରିଛି, ଯିଏ ପୂର୍ବରୁ ଏଭଳି ସମ୍ପତ୍ତି ଦାବି କରିବାର କ୍ଷମତା ରଖିଥିଲେ।
ଏହି ବିଲ ପ୍ରଥମେ ୨୦୨୪ ଅଗଷ୍ଟ ୮ ତାରିଖରେ ଲୋକ ସଭାରେ ଉପସ୍ଥାପନ କରାଯାଇଥିଲା। ଏହାକୁ ଏକ ଯୁଗ୍ମ ସାଂସଦୀୟ କମିଟି (ଜେପିସି) ଦାରା ସମୀକ୍ଷା କରାଯାଇ ଅନୁମୋଦନ ପାଇଁ ଏପ୍ରିଲ ୨, ୨୦୨୫ ରେ ଲୋକ ସଭାରେ ପୁନଃ ଉପସ୍ଥାପନ କରାଯାଇଛି। ସଂସଦୀୟ କାର୍ୟ୍ୟ ମନ୍ତ୍ରୀ କିରଣ ରିଜିଜୁ ଏହି ବିଲ ଉପସ୍ଥାପନ କରିଛନ୍ତି। ଲୋକ ସଭାରେ ଏହାକୁ ପ୍ରବଳ ବିରୋଧ କରିଛନ୍ତି ବିରୋଧୀ। ବିଲ ସମର୍ଥନ କରିବାକୁ ଘୋଷଣା କରିଛନ୍ତି ଜେଡିୟୁ ଓ ତେଲୁଗୁ ଦେଶମ । ତେବେ ଇଣ୍ଡିମେଂଟ ବିତର୍କରେ ଭାଗ ନେଲେ ବି ବିଲ ସପକ୍ଷରେ ଭୋଟ ଦେବନି ବୋଲି କୁହାଯାଉଛି।
ଓ୍ବକଫ ବୋର୍ଡଗୁଡ଼ିକ ଭାରତରେ ୧୯୧୩ ମସିହାରୁ ବ୍ରିଟିଶ ଶାସନ ସମୟରେ ସ୍ଥାପିତ ହୋଇ ଇସଲାମିକ ଅନୁଦାନ (ଓାକଫ) ପରିଚାଳନା କରି ଆସୁଛନ୍ତି। କିନ୍ତୁ ଏହାର ଅଧିକାର ଅତିକ୍ରମ ହେଉଥିବା ଅଭିଯୋଗ ଦୀର୍ଘ ଦିନ ଧରି ଉଠି ଆସୁଛି। ନୂଆ ବିଲ ଅନୁଯାୟୀ, ୱାକଫ ଦାବିକୁ ଜିଲା କଲେକ୍ଟରଙ୍କ ମାଧ୍ୟମରେ ରାଜ୍ୟ ସରକାରଙ୍କୁ ଯାଞ୍ଚ କରିବାକୁ ପଡ଼ିବ, ଯାହା ଏକ ଗୁରୁତ୍ୱପୂର୍ଣ୍ଣ ପରିବର୍ତ୍ତନ।
ଏହି ବିଲ ଭାରତର ହଜାର ହଜାର ସମ୍ପତ୍ତି ଉପରେ ପ୍ରଭାବ ପକାଇବ, ଯାହା ପୂର୍ବରୁ ଓ୍ବକଫ ବୋର୍ଡ ଦାରା ଦାବି କରାଯାଇଥିଲା। ଏହା ଓ୍ବକଫ ବୋର୍ଡଗୁଡ଼ିକର କ୍ଷମତାକୁ ସୀମିତ କରି ସରକାରୀ ସମ୍ପତ୍ତି ଉପରେ ଅଧିକ ନିୟନ୍ତ୍ରଣ ଆଣିବ ବୋଲି ଆଶା କରାଯାଉଛି। ଏହି ବିଲ ଏବେ ରାଜ୍ୟ ସଭାରେ ଉପସ୍ଥାପନ ପାଇଁ ପ୍ରସ୍ତୁତ ହେଉଛି, ଯେଉଁଠାରେ ଏହା ଆହୁରି ଆଲୋଚନା ଓ ବିତର୍କର ସାମ୍ନା କରିବ। ଏହି ପରିବର୍ତ୍ତନକୁ ଅନେକେ ସ୍ବାଗତ କରିଥିବା ବେଳେ, ସରକାର ଏହି ବିଲ୍କୁ ମୁସଲମାନମାନଙ୍କ ସ୍ୱାର୍ଥ ପାଇଁ ଏକ ସଂସ୍କାରମୂଳକ ପଦକ୍ଷେପ ବୋଲି କହିଛନ୍ତି, ବିରୋଧୀ ଦଳ ଏହାର କଡ଼ା ବିରୋଧ କରି କହିଛନ୍ତି ଯେ ଏହି ବିଲ୍ ସମ୍ବିଧାନର ଉଲ୍ଲଂଘନ କରୁଛି ଏବଂ ଧାର୍ମିକ ସ୍ୱାଧୀନତାର ବିରୋଧୀ।