ଭିଜିଲାନ୍ସ ଜାଲରେ ଜୟପୁରର ଖଣି ଉପନିର୍ଦ୍ଦେଶକ ସତ୍ୟଜିତ ରାଉତ। ଜଣେ ବ୍ୟବସାୟୀଙ୍କଠାରୁ ବାଲି ଲିଜର ଅବଧି ବୃଦ୍ଧି କରିବା ସହ ସ୍ପଟ୍ ଆକ୍ସନ ନ କରିବା ପାଇଁ ୨ ଲକ୍ଷ ଟଙ୍କା ଲାଞ୍ଚ ନେଉଥିବା ବେଳେ ଗତକାଲି ରାତିରେ ତାଙ୍କୁ ଭିଜିଲାନ୍ସ ଟିମ୍ ହାତେନାତ ଧରିଥିଲା। ଏହାପରେ ଆଜି ତାଙ୍କୁ ଗିରଫ କରାଯାଇ କୋର୍ଟ ଚାଲାଣ କରାଯାଇଛି।
ଭିଜିଲାନ୍ସ ଏସପି ଏସ୍. ସୁଶ୍ରୀଙ୍କ ସୂଚନା ଅନୁସାରେ, ସତ୍ୟଜିତ ରାଉତଙ୍କ ନିକଟରୁ ମୋଟ ୬ ଲକ୍ଷ ୯୦ ହଜାର ଟଙ୍କା ଜବତ କରାଯାଇଛି। ସେହିପରି ଆୟବହିର୍ଭୂତ ସମ୍ପତ୍ତି ଠୁଳ ଅଭିଯୋଗକୁ ନେଇ ଜୟପୁର ସମେତ କଟକସ୍ଥିତ ତାଙ୍କ ପୈତୃକ ଘରେ ଚଢ଼ାଉ ଜାରି ରହିଛି। ଏହାସହ ମହାରାଷ୍ଟ୍ରର ନାଗପୁରରେ ଥିବା ତାଙ୍କ ପତ୍ନୀଙ୍କ ବାସଭବନ ଓ କାର୍ଯ୍ୟାଳୟରେ ମଧ୍ୟ ତଦନ୍ତ କରାଯିବ ବୋଲି ଭିଜିଲାନ୍ସ ସୂଚନା ଦେଇଛି।
ସୂଚନାଯୋଗ୍ୟ, ସତ୍ୟଜିତ ରାଉତ ୨୦୧୩ ମସିହାରେ ଜିଓଲୋଜିଷ୍ଟ ଭାବେ ଚାକିରି ଆରମ୍ଭ କରିଥିଲେ। ପରେ ପଦୋନ୍ନତି ପାଇ ସମ୍ବଲପୁର, ବ୍ରହ୍ମପୁର ଓ ଭୁବନେଶ୍ୱରରେ କାର୍ଯ୍ୟ କରିବା ପରେ ୨୦୨୩ ଜୁନ୍ ୩୦ରେ ଜୟପୁରରେ ଖଣି ଉପନିର୍ଦ୍ଦେଶକ ଭାବେ ଯୋଗ ଦେଇଥିଲେ। ବର୍ତ୍ତମାନ ସମଗ୍ର ଘଟଣାର ତଦନ୍ତ ଜାରି ରହିଛି।