ଜାତୀୟ ସାମାଜିକ ସହାୟତା କାର୍ଯ୍ୟକ୍ରମ (NSAP) ଅଧୀନରେ ପେନ୍ସନ ପାଉଥିବା ହିତାଧିକାରୀମାନଙ୍କ ଆଧାର ସଂଖ୍ୟାକୁ ବ୍ୟାଙ୍କ ଖାତା ସହ ତୁରନ୍ତ ଲିଙ୍କ କରିବା ପାଇଁ ଓଡ଼ିଶା ସରକାରଙ୍କ ସାମାଜିକ ସୁରକ୍ଷା ଏବଂ ଦିବ୍ୟାଙ୍ଗ ସଶକ୍ତିକରଣ ବିଭାଗ (SSEPD) ସମସ୍ତ ଜିଲ୍ଲାପାଳ ଓ ଜିଲ୍ଲା ମାଜିଷ୍ଟ୍ରେଟଙ୍କୁ ନିର୍ଦ୍ଦେଶ ଜାରି କରିଛି ।
୨୦୨୬-୨୭ ଆର୍ଥିକ ବର୍ଷରୁ NSAP ପେନ୍ସନ SNA-SPARSH ପ୍ଲାଟଫର୍ମ ମାଧ୍ୟମରେ ଆଧାର ଆଧାରିତ ପେମେଣ୍ଟ ବ୍ୟବସ୍ଥାରେ ପ୍ରଦାନ କରାଯାଉଛି । ବର୍ତ୍ତମାନ ପର୍ଯ୍ୟନ୍ତ ରାଜ୍ୟର ୩ ଲକ୍ଷ ୩୫ ହଜାର ୮୫୦ ଜଣ ପେନ୍ସନ ଭୋଗୀଙ୍କ ଆଧାର ସଂଖ୍ୟା ସେମାନଙ୍କ ବ୍ୟାଙ୍କ ଖାତା ସହ ସଂଯୁକ୍ତ ହୋଇନାହିଁ । ଏହି କାରଣରୁ ଭବିଷ୍ୟତରେ SNA-SPARSH ପୋର୍ଟାଲ ମାଧ୍ୟମରେ ସେମାନଙ୍କ ପେନ୍ସନ ପ୍ରଦାନରେ ବାଧା ସୃଷ୍ଟି ହୋଇପାରେ । ଅନେକ ପେନ୍ସନଭୋଗୀ ବୟସ୍କ କିମ୍ବା ଶଯ୍ୟାଶାୟୀ ଥିବାରୁ ବ୍ୟାଙ୍କକୁ ଯାଇ ଆଧାର ଅପଡେଟ କରିପାରୁ ନାହାନ୍ତି । ତେଣୁ ଜିଲ୍ଲା ପ୍ରଶାସନକୁ ଏପରି ହିତାଧିକାରୀମାନଙ୍କୁ ଚିହ୍ନଟ କରି ଆବଶ୍ୟକ ସହଯୋଗ ପ୍ରଦାନ କରିବାକୁ କୁହାଯାଇଛି ।
ଏହା ସହ ଆଧାର ଲିଙ୍କିଂ ପୂର୍ବରୁ Aadhaar Seeding ଓ e-KYC ପ୍ରକ୍ରିୟା ସମ୍ପୂର୍ଣ୍ଣ କରିବାକୁ ମଧ୍ୟ ନିର୍ଦ୍ଦେଶ ଦିଆଯାଇଛି । ବ୍ଲକସ୍ତରର ଆଧାର ଅପରେଟର ଓ ଆଧାର କୋଅର୍ଡିନେଟରମାନେ ଏହି କାର୍ଯ୍ୟରେ ସହଯୋଗ କରିବେ ବୋଲି ପତ୍ରରେ କୁହାଯାଇଛି । ଯେଉଁ NSAP ପେନ୍ସନଭୋଗୀଙ୍କ ଆଧାର ଏପର୍ଯ୍ୟନ୍ତ ବ୍ୟାଙ୍କ ଖାତା ସହ ଲିଙ୍କ ହୋଇନାହିଁ, ସେମାନେ ଶୀଘ୍ର ନିଜ ବ୍ୟାଙ୍କ କିମ୍ବା ସମ୍ପର୍କିତ ସେବା କେନ୍ଦ୍ରରେ ଯୋଗାଯୋଗ କରି ଆଧାର ଲିଙ୍କିଂ ଓ e-KYC ପ୍ରକ୍ରିୟା ସମ୍ପୂର୍ଣ୍ଣ କରିବାକୁ ସରକାର ପରାମର୍ଶ ଦେଇଛନ୍ତି ।