ଏସୀୟ କ୍ରୀଡ଼ାର ପୁରୁଷ ହକି ଫାଇନାଲରେ ଦମ୍ଦାର ବିଜୟ ହାସଲ କରିଛି ଭାରତ। ଫାଇନାଲ ମୁକାବିଲାରେ ମାଲେସିଆକୁ ୫-୧ ଗୋଲରେ ପରାସ୍ତ କରି ଭାରତ କ୍ରମାଗତ ଦ୍ୱିତୀୟ ଥର ପାଇଁ ସ୍ୱର୍ଣ୍ଣ ପଦକ ଜିତିଛି। ଏସୀୟ କ୍ରୀଡ଼ା ଇତିହାସରେ ପୁରୁଷ ହକିରେ ଭାରତ ପ୍ରଥମ ଥର ପାଇଁ ନିଜ ସ୍ୱର୍ଣ୍ଣ ପଦକ ବଜାୟ ରଖିବାରେ ସଫଳ ହୋଇଛି। ଏହାସହ ଭାରତୀୟ ପୁରୁଷ ଓ ମହିଳା ହକି ଦଳ ଏକାସାଙ୍ଗରେ ସ୍ୱର୍ଣ୍ଣ ଜିତିବାର ଐତିହାସିକ ସଫଳତା ହାସଲ କରିଛନ୍ତି। ଏହି ବିଜୟ ସହ ଭାରତ ଲସ୍ ଆଞ୍ଜେଲ୍ସ ୨୦୨୮ ଅଲିମ୍ପିକ୍ସ ପାଇଁ ସିଧାସଳଖ ଯୋଗ୍ୟତା ମଧ୍ୟ ହାସଲ କରିଛି।
ମ୍ୟାଚ୍ର ଏକାଦଶ ମିନିଟରେ ଅଧିନାୟକ ହରମନପ୍ରୀତ ସିଂହ ପେନାଲ୍ଟି କର୍ଣ୍ଣରରୁ ଡ୍ରାଗ୍ ଫ୍ଲିକ୍ ଜରିଆରେ ଭାରତକୁ ଅଗ୍ରଣୀ କରାଇଥିଲେ। ତେବେ ୧୪ତମ ମିନିଟରେ ମାଲେସିଆର ଶେଲୋ ସିଲଭେରିଅସ୍ ଗୋଲ୍ କରି ସ୍କୋରକୁ ୧-୧ କରିଥିଲେ। ଦ୍ୱିତୀୟ କ୍ୱାର୍ଟରରେ ଜୁଗରାଜ ସିଂହ ପେନାଲ୍ଟି କର୍ଣ୍ଣରକୁ ଗୋଲରେ ପରିଣତ କରି ଭାରତକୁ ପୁଣିଥରେ ଅଗ୍ରଣୀ କରାଇଥିଲେ। ହାଫ୍ ଟାଇମ୍ ସୁଦ୍ଧା ଭାରତ ୨-୧ରେ ଆଗୁଆ ରହିଥିଲା। ତୃତୀୟ କ୍ୱାର୍ଟରରେ ହାର୍ଦିକ ସିଂହ ପେନାଲ୍ଟି ଷ୍ଟ୍ରୋକ୍ରୁ ଗୋଲ୍ କରି ଭାରତର ଅଗ୍ରଣୀକୁ ୩-୧କୁ ବଢ଼ାଇଥିଲେ। ଶେଷ କ୍ୱାର୍ଟରରେ ଶିଳାନନ୍ଦ ଲାକ୍ରାଙ୍କ ଫିଲ୍ଡ ଗୋଲ୍ରେ ଭାରତ ୪-୧ରେ ପହଞ୍ଚିଥିଲା। ମ୍ୟାଚ୍ ଶେଷ ହେବାକୁ ଆଉ କିଛି ସମୟ ବାକି ଥିବାବେଳେ ହରମନପ୍ରୀତ ପୁଣି ପେନାଲ୍ଟି କର୍ଣ୍ଣରରୁ ଗୋଲ୍ କରି ଭାରତର ବିଜୟକୁ ୫-୧ରେ ନିଶ୍ଚିତ କରିଥିଲେ।
ସାରା ମ୍ୟାଚ୍ରେ ଭାରତୀୟ ଦଳର ଆକ୍ରମଣାତ୍ମକ ପ୍ରଦର୍ଶନ ସାମ୍ନାରେ ମାଲେସିଆ ଚାପରେ ରହିଥିଲା। ଏଥିସହ ଭାରତର ରକ୍ଷଣଭାଗ ମଧ୍ୟ ଦୃଢ଼ ପ୍ରଦର୍ଶନ କରିଥିଲା। ଫଳରେ ଭାରତ ଏକ ଐତିହାସିକ ସ୍ୱର୍ଣ୍ଣ ସହ ଅଲିମ୍ପିକ୍ସ ଯୋଗ୍ୟତା ହାସଲ କରିଛି।
