ଚଳିତ ବର୍ଷ ବନ୍ୟା ଓ ପ୍ରବଳ ବର୍ଷା ଓଡ଼ିଶାରେ ବ୍ୟାପକ କ୍ଷୟକ୍ଷତି ଘଟାଇଛି। ବନ୍ୟାରେ ଏପର୍ଯ୍ୟନ୍ତ ୭ ଜଣଙ୍କ ଜୀବନ ଯାଇଥିବା ବେଳେ ୯୩ଟି ଗୃହପାଳିତ ପଶୁଙ୍କ ମୃତ୍ୟୁ ଘଟିଛି। ବନ୍ୟା ଓ ଅତ୍ୟଧିକ ବର୍ଷାରେ ରାଜ୍ୟର ୨୬ଟି ଜିଲ୍ଲାର ୩୭ ଲକ୍ଷ ୪୩ ହଜାର ୯୪୩ ଜଣ ପ୍ରଭାବିତ ହୋଇଥିବା ନେଇ ବିଧାନସଭାରେ ରାଜସ୍ୱ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ ତଥ୍ୟ ଦେଇଛନ୍ତି।
ବନ୍ୟାର ପ୍ରଭାବରେ କେବଳ ଜନଜୀବନ ନୁହେଁ, ଚାଷବାସ ଓ ଆବାସିକ ଭିତ୍ତିଭୂମି ମଧ୍ୟ ଗୁରୁତର ଭାବେ ପ୍ରଭାବିତ ହୋଇଛି। ରାଜ୍ୟରେ ୧୮ ହଜାର ୬୭ଟି ବାସଗୃହ କ୍ଷତିଗ୍ରସ୍ତ କିମ୍ବା ଭାଙ୍ଗିଥିବା ବେଳେ ୨ ଲକ୍ଷ ୧୨ ହଜାର ୫୩୩ ହେକ୍ଟର ଫସଲ ନଷ୍ଟ ହୋଇଛି। ଫଳରେ ହଜାର ହଜାର ଚାଷୀ ପ୍ରତ୍ୟକ୍ଷ ଭାବେ କ୍ଷତିର ସମ୍ମୁଖୀନ ହୋଇଛନ୍ତି।
ବନ୍ୟାଜନିତ ବ୍ୟକ୍ତିଗତ ଓ ସମ୍ପତ୍ତିଗତ କ୍ଷତିର ଭରଣା ପାଇଁ ଜିଲ୍ଲାଗୁଡ଼ିକୁ ମୋଟ ୨୩୪ କୋଟି ୮୪ ଲକ୍ଷ ୮୬ ହଜାର ଟଙ୍କା ପ୍ରଦାନ କରାଯାଇଛି। ଏଥିରେ ଗୃହ ନିର୍ମାଣ ସହାୟତା ପାଇଁ ପ୍ରାୟ ୩୩ କୋଟି ୬୩ ଲକ୍ଷ ଟଙ୍କା ଏବଂ ଫସଲହାନୀ ବାବଦରେ ପ୍ରାୟ ୧୫୧ କୋଟି ୯୬ ଲକ୍ଷ ଟଙ୍କା ଦିଆଯାଇଛି।
ସେହିପରି ବନ୍ୟା ପ୍ରଭାବିତ ପରିବାରଙ୍କୁ ପୋଷାକପତ୍ର ଓ ବାସନକୁସନ ବାବଦରେ ମଧ୍ୟ ସହାୟତା ଯୋଗାଇ ଦିଆଯାଇଛି। ପୋଷାକପତ୍ର ପାଇଁ ପ୍ରାୟ ୯ କୋଟି ୪୭ ଲକ୍ଷ ଟଙ୍କା ଏବଂ ବାସନକୁସନ ପାଇଁ ମଧ୍ୟ ୯ କୋଟି ୪୭ ଲକ୍ଷ ଟଙ୍କା ବ୍ୟୟ ହୋଇଛି। ବାଲିଚର ପଡ଼ିଥିବା ଜମିର ପୁନଃରୁଦ୍ଧାର ପାଇଁ ପ୍ରାୟ ୪ କୋଟି ଟଙ୍କାର ବ୍ୟବସ୍ଥା କରାଯାଇଛି।
ବନ୍ୟା ପରେ ତୁରନ୍ତ ରିଲିଫ୍ ବ୍ୟବସ୍ଥା ପାଇଁ ବିପୁଳ ପରିମାଣର ଖାଦ୍ୟ ଓ ଅନ୍ୟାନ୍ୟ ରିଲିଫ୍ ସାମଗ୍ରୀ ମଧ୍ୟ ବଣ୍ଟନ କରାଯାଇଛି। ପ୍ରଭାବିତ ଲୋକଙ୍କ ପାଇଁ ୧୫ ହଜାର ୭୧୫ କୁଇଣ୍ଟାଲ ଚାଉଳ, ୧୨ ହଜାର ୮୬୩ କୁଇଣ୍ଟାଲ ଚୁଡ଼ା, ୧ ହଜାର ୪୪୮ କୁଇଣ୍ଟାଲ ଗୁଡ଼, ୪୧୨୭ ମେଟ୍ରିକ୍ ଟନ୍ ଗୋଖାଦ୍ୟ ଏବଂ ୨୮ ହଜାର ୬୫୧ଟି ପଲିଥିନ୍ ବଣ୍ଟନ କରାଯାଇଛି।
ଚଳିତ ବର୍ଷ ବନ୍ୟାରେ ଜନଜୀବନଠାରୁ ଆରମ୍ଭ କରି ଚାଷବାସ, ଘରଦ୍ୱାର ଓ ପଶୁସମ୍ପଦ ପର୍ଯ୍ୟନ୍ତ ବ୍ୟାପକ କ୍ଷତି ଘଟିଥିବା ଏହି ତଥ୍ୟରୁ ସ୍ପଷ୍ଟ ହୋଇଛି। ବନ୍ୟା ପରବର୍ତ୍ତୀ ପୁନର୍ବାସ ଓ କ୍ଷତିପୂରଣ ପ୍ରକ୍ରିୟା ଜାରି ରହିଥିବା ବେଳେ କ୍ଷତିଗ୍ରସ୍ତ ପରିବାର ଓ ଚାଷୀଙ୍କୁ ସହାୟତା ପହଞ୍ଚାଇବା ଉପରେ ସରକାରୀ ବ୍ୟବସ୍ଥା ଗୁରୁତ୍ୱ ଦେଉଛି।