ରାୟଗଡ଼ାର ଅଧିଷ୍ଠାତ୍ରୀ ଦେବୀ ମା ମଝିଘରିଆଣୀ ମନ୍ଦିରର ନଅଟି ଦାନ ବାକ୍ସ (ହୁଣ୍ଡି) ଦୁଇ ମାସର ବ୍ୟବଧାନ ପରେ ଆଜି ଖୋଲାଯାଇଛି। ସୂଚନା ଅନୁଯାୟୀ, ଆଜି ସକାଳ ୧୦ଟାରେ ଏଣ୍ଡାଉମେଣ୍ଟ(Endowment) ବିଭାଗର ଅଧିକାରୀ, ସ୍ଥାନୀୟ ତହସିଲଦାର, RI ଏବଂ ମନ୍ଦିର ପରିଚାଳନା କମିଟିର ସଦସ୍ୟଙ୍କ ଉପସ୍ଥିତିରେ କଡ଼ା ପୋଲିସ ସୁରକ୍ଷା ମଧ୍ୟରେ ହୁଣ୍ଡିଗୁଡ଼ିକ ଖୋଲାଯାଇଥିଲା। ଏହି ପ୍ରକ୍ରିୟାରେ ୧୦୦ରୁ ଅଧିକ କର୍ମଚାରୀ ନିୟୋଜିତ ହୋଇ ଗଣନା ଚାଲିଛି। ଗଣନା ଦଳରେ ବିଭିନ୍ନ ସଂଗଠନର ମହିଳା ଏବଂ ପୁରୁଷ ସ୍ୱେଚ୍ଛାସେବକ ଏବଂ କିଛି ଛାତ୍ର ସାମିଲ ଅଛନ୍ତି।
ଗଣନାରେ ନିୟୋଜିତ ସ୍ୱୟଂ ସହାୟକ ଗୋଷ୍ଠୀର ମହିଳା ସଦସ୍ୟମାନେ କହିଛନ୍ତି ଯେ, ସେମାନେ ଏହି ପ୍ରକ୍ରିୟାର ଅଂଶ ହେବାକୁ ନିଜକୁ ଭାଗ୍ୟବାନ ମନେ କରୁଛନ୍ତି। ମନ୍ଦିର କମିଟି ଏଥର ୫୦ ଲକ୍ଷ ଟଙ୍କାରୁ ଅଧିକ ସଂଗ୍ରହ ଆଶା କରୁଛି। ସକାଳ ୧୦ଟାରେ ଆରମ୍ଭ ହୋଇଥିବା ଗଣନା ଏପର୍ଯ୍ୟନ୍ତ ଜାରି ରହିଛି। ସଂଗୃହିତ ରାଶି ରାୟଗଡ଼ା ୟୁନିଅନ୍ ବ୍ୟାଙ୍କରେ ଜମା କରାଯିବ। ଦାନ ରାଶିରୁ ପ୍ରାପ୍ତ ସୁଧ ମନ୍ଦିରର ପାର୍ଶ୍ୱ ବିକାଶ ଏବଂ ମନ୍ଦିରକୁ ଆସୁଥିବା ଭକ୍ତଙ୍କ ସୁବିଧା ପାଇଁ ଖର୍ଚ୍ଚ କରାଯିବ ବୋଲି ମନ୍ଦିର ପରିଚାଳନା କମିଟିର ଟ୍ରଷ୍ଟ କହିଛି।
ଉଲ୍ଲେଖଯୋଗ୍ୟ ଯେ ପ୍ରାୟ ୬ ମାସ ପୂର୍ବେ, ଜୁନ୍ ୨୯, ୨୦୨୬ରେ ୯ଟି ହୁଣ୍ଡିରୁ ୧ କୋଟି ୨୨ ଲକ୍ଷ ୨୯ ହଜାର ୬୨୩ ଟଙ୍କା ନଗଦ ଏବଂ ୟୁପିଆଇ ମାଧ୍ୟମରେ ୩ ଲକ୍ଷ ୯୭ ହଜାର ୨୩୧ ଟଙ୍କା ସମେତ ମୋଟ ୧ କୋଟି ୨୬ ଲକ୍ଷ ୨୬ ହଜାର ୮୫୪ ଟଙ୍କା, ୩୨ ଗ୍ରାମ ସୁନା, ୧ କିଲୋ ୩୦୦ ଗ୍ରାମ ରୂପା ଏବଂ ୯ଟି ବିଦେଶୀ ମୁଦ୍ରା ସଂଗ୍ରହ କରାଯାଇଥିଲା।