ଶ୍ରୀନଗର: ପହଲଗାମ ଆତଙ୍କବାଦୀ ଆକ୍ରମଣ ପରେ ଜମ୍ମୁ କାଶ୍ମୀର ପର୍ଯ୍ୟଟନ ଶିଳ୍ପକୁ ବଡ ଧକ୍କା । ଗତ ଏପ୍ରିଲ ୨୨ରେ ପହଲଗାମ ଆକ୍ରମଣ ପରେ ଜମ୍ମୁ କାଶ୍ମୀର ଯିବାକୁ ଆଉ ଇଚ୍ଛା ପ୍ରକାଶ କରୁ ନାହାନ୍ତି ପର୍ଯ୍ୟଟକ । ଗତ ୧୦ ଦିନ ମଧ୍ୟରେ ୯୦ ପ୍ରତିଶତ ପର୍ଯ୍ୟଟକ ବୁକିଂ ବାତିଲ କରିସାରିଲେଣି । ଆତଙ୍କବାଦୀ ମାନେ କେବଳ ପର୍ଯ୍ୟଟକ ପର୍ଯ୍ୟଟକଙ୍କ ହତ୍ୟା କରି ନାହାନ୍ତି ବରଂ କାଶ୍ମୀର ଓ ଦେଶର ଅନ୍ୟ ସ୍ଥାନ ମଧ୍ୟରେ ସ୍ଥାପନ ହେଉଥିବା ସମ୍ପର୍କକୁ ଆଘାତ କରିଛନ୍ତି । ପର୍ଯ୍ୟଟନ ଶିଳ୍ପ ଉପରେ ପ୍ରତିକୂଳ ପ୍ରଭାବ ପକାଇଥିବାବେଳେ ଏହା ଉପରେ ନିର୍ଭର କରୁଥିବା ଲୋକଙ୍କ ମେରୁଦଣ୍ଡ ଭାଙ୍ଗିଦେଇଛି କହିଲେ ଅତ୍ୟୁକ୍ତି ହେବ ନାହିଁ । ଶ୍ରୀନଗରର ପ୍ରସିଦ୍ଧ ଡାଲ ହ୍ରଦର ହାଉସ ବୋଟ ଗୁଡ଼ିକ ପ୍ରାୟ ଖାଲି ପଡ଼ିଛି । କିଛି ଦିନ ପୂର୍ବରୁ ପର୍ଯ୍ୟଟକମାନଙ୍କୁ ହ୍ରଦ ପରିଦର୍ଶନର ମଜା ନେବା ସମୟରେ ପ୍ରବଳ ଭିଡ଼ ହେତୁ ପରସ୍ପର ସହିତ ଧକ୍କା ହେଉଥିବା ବୋଟ ଗୁଡ଼ିକ ଏବେ କୂଳରେ ନିରାଶ ହୋଇ ଠିଆ ହୋଇଛନ୍ତି । ପୃଥିବୀର ଏହି ଭୂସ୍ବର୍ଗର ଚମକ ଏବେ ଉଭାନ ହୋଇଯାଇଛି ।
ପର୍ଯ୍ୟଟକମାନେ ସାଧାରଣତଃ ଡାଲ ହ୍ରଦରେ ଥିବା ନୌକା ଘର ବା ଶିକାରାରେ ରହିବାକୁ ଅଧିକ ପସନ୍ଦ କରିଥାନ୍ତି । ସେମାନେ ଡାଲ୍ ହ୍ରଦରେ ନିର୍ମିତ ବୋଟ୍ ହାଉସରେ ରହିବା ସହ ନୌକାବିହାରର ମଜା ଉଠାଇଥାନ୍ତି । ବୋଟ୍ ହାଉସ ବୁକିଂ ପାଇଁ ପର୍ଯ୍ୟଟକଙ୍କୁ ଲାଇନ ଲଗାଇବାକୁ ପଡୁଥିବାବେଳେ ବର୍ତ୍ତମାନ ସେଗୁଡିକ ଖାଲି ପଡିଛି । ଆତଙ୍କବାଦୀ ଆକ୍ରମଣ ଘଟଣା କାଶ୍ମୀରବାସୀଙ୍କ ଦାନାପାଣି ବନ୍ଦ କରିଦେଇଛି । ପର୍ଯ୍ୟଟନ ଉପରେ ସମ୍ପୂର୍ଣ୍ଣ ନିର୍ଭରଶୀଳ ସ୍ଥାନୀୟ ବାସିନ୍ଦାମାନେ ଏହି ଆକ୍ରମଣକୁ ତୀବ୍ର ନିନ୍ଦା କରିଥିବାବେଳେ ରାଜରାସ୍ତାକୁ ଓହ୍ଲାଇ ଆସି ବିକ୍ଷୋଭ ପ୍ରଦର୍ଶନ କରୁଛନ୍ତି । ତେଣୁ ଆକ୍ରମଣକାରୀ ଏବଂ ସେମାନଙ୍କୁ ଏଭଳି ଅମାନବୀୟ କାର୍ଯ୍ୟରେ ନିୟୋଜିତ କରିଥିବା ବ୍ୟକ୍ତି ଏବଂ ସଂଗଠନ ବିରୋଧରେ ଭାରତ ସରକାର ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସେମାନେ ଦାବି କରିଛନ୍ତି ।