ଭୁବନେଶ୍ୱର: ମହାଳୟା ଅବସରରେ ଶନିବାର ଦିନ ଓଡ଼ିଶାର ରାଜ୍ୟପାଳ ଡ. ହରିବାବୁ କମ୍ଭମପତି ଏବଂ ପ୍ରଥମ ମହିଳା ଜୟଶ୍ରୀ କମ୍ଭମପତି ସମ୍ବଲପୁରସ୍ଥିତ ମା’ ସମଲେଶ୍ୱରୀ ମନ୍ଦିର ପରିଦର୍ଶନ କରି ଦେବୀଙ୍କ ନିକଟରେ ପୂଜାର୍ଚ୍ଚନା କରିଥିଲେ।ରାଜ୍ୟପାଳ ରାଜ୍ୟବାସୀଙ୍କ ସମୃଦ୍ଧି, ସୁଖ ଏବଂ କଲ୍ୟାଣ ପାଇଁ ପ୍ରାର୍ଥନା କରିଥିଲେ। ମହାଳୟା ଅବସରରେ ମା’ ସମଲେଶ୍ୱରୀଙ୍କୁ ପବିତ୍ର ‘ଧବଳମୁଖୀ ବେଶ’ରେ ସଜ୍ଜିତ କରାଯାଇଥିଲା।
ଏହି ସ୍ୱତନ୍ତ୍ର ବେଶରେ ଦେବୀଙ୍କ ଦର୍ଶନ ପାଇଁ ମନ୍ଦିରରେ ହଜାର ହଜାର ଭକ୍ତଙ୍କ ସମାଗମ ହୋଇଥିଲା। ପଶ୍ଚିମ ଓଡ଼ିଶାର ମୁଖ୍ୟ ଆଧ୍ୟାତ୍ମିକ କେନ୍ଦ୍ର ଭାବେ ପରିଚିତ ଏହି ମନ୍ଦିରରେ ମହାଳୟା ଅବସରରେ ଏକ ସ୍ୱତନ୍ତ୍ର ଧାର୍ମିକ ପରିବେଶ ଦେଖିବାକୁ ମିଳିଥିଲା। ଏହା ପୂର୍ବରୁ, ରାଜ୍ୟପାଳ ହୀରାକୁଦ ବନ୍ଧ ମଧ୍ୟ ପରିଦର୍ଶନ କରିଥିଲେ ଏବଂ ମହାନଦୀ ଉପରେ ନିର୍ମିତ ଏହି ବିଶାଳ ବନ୍ଧ ଓ ଏହାର ବିସ୍ତୃତ ଜଳଭଣ୍ଡାର ବୁଲି ଦେଖିଥିଲେ।
