ଶୁକ୍ରବାର, ଜୁଲାଇ ୧୦ ତାରିଖରେ ସୁପ୍ରିମକୋର୍ଟରେ ଏକ ବଡ଼ ହଙ୍ଗାମା ହୋଇଥିଲା। କୋର୍ଟରେ ନିଜ ମାମଲା ଯୁକ୍ତି କରୁଥିବା ଜଣେ ବ୍ୟକ୍ତି ଭାରତର ମୁଖ୍ୟ ବିଚାରପତି (CJI)ଙ୍କୁ ଗାଳିଗୁଲଜ କରିଥିଲେ ଏବଂ ଖଣ୍ଡପୀଠ ସମ୍ମୁଖରେ କୋର୍ଟ ରୁମରେ କାଗଜପତ୍ର ଫିଙ୍ଗି ଦେଇଥିଲେ। ସୁପ୍ରିମକୋର୍ଟ କାର୍ୟ୍ୟରେ ବାଧା ସୃଷ୍ଟି କରିବା ପରେ ସୁରକ୍ଷା କର୍ମୀମାନେ ତାଙ୍କୁ ବାହାରକୁ ନେଇଯାଇଥିଲେ। ଏହି ଘଟଣା ସକାଳ ପ୍ରାୟ ୧୧ଟାରେ ବିଚାରପତି କେ.ଭି. ବିଶ୍ୱନାଥନ ଏବଂ ଆଲୋକ ଆରାଧେଙ୍କୁ ନେଇ ଗଠିତ ଖଣ୍ଡପୀଠ ସମ୍ମୁଖରେ ଘଟିଥିଲା।
ସୁପ୍ରିମକୋର୍ଟରେ କାଗଜ ଫିଙ୍ଗି ଦେଇଥିବା ଆବେଦନକାରୀଙ୍କ ନାମ ପ୍ରବାଳ ପ୍ରତାପ। ସେ ଖଣ୍ଡପୀଠ ସମ୍ମୁଖରେ ହାଜର ହୋଇ ନିଜକୁ ସ୍ୱାଧୀନ ବୋଲି ଘୋଷଣା କରିଥିଲେ। ବିଚାରପତିମାନଙ୍କୁ ବିଚାର ବିଭାଗୀୟ ସେବକ ଡାକି ସେ କହିଲେ, ‘ମହାଶୟ ବିଚାର ବିଭାଗୀୟ ସେବକ, ମୁଁ ଆପଣଙ୍କୁ ଲକ୍ଷ୍ନୌର ଏଏସ୍ପିଙ୍କ ବିରୋଧରେ ସାଇବର ଅପରାଧ ସିଣ୍ଡିକେଟ ଚଳାଇବା ପାଇଁ ଏଫଆଇଆର ପଞ୍ଜିକରଣ କରିବାକୁ ନିର୍ଦ୍ଦେଶ ଦେଉଛି।’ ଆବେଦନକାରୀଙ୍କ ବକ୍ତବ୍ୟରେ ଜଷ୍ଟିସ୍ କେ.ଭି. ବିଶ୍ୱନାଥନ୍ ଆଶ୍ଚର୍ୟ୍ୟ ହୋଇ ପଚାରିଲେ, “ଆପଣ ମୋତେ ନିର୍ଦ୍ଦେଶ ଦେଉଛନ୍ତି କି? ଆପଣ ଆମକୁ ନିର୍ଦ୍ଦେଶ ଦେଉଛନ୍ତି କି?”
ବିଚାରପତିଙ୍କଠାରୁ ଏହା ଶୁଣିବା ପରେ, ଆବେଦନକାରୀ ମୁଖ୍ୟ ବିଚାରପତିଙ୍କୁ ଗାଳିଗୁଲଜ କରିବା ଆରମ୍ଭ କଲେ ଏବଂ ପବନରେ କାଗଜପତ୍ର ଫିଙ୍ଗିଲେ, ଯାହା ଶୁଣାଣିରେ ବାଧା ସୃଷ୍ଟି କଲା। କୋର୍ଟ ସୁରକ୍ଷା କର୍ମୀମାନେ ତୁରନ୍ତ ହସ୍ତକ୍ଷେପ କରି ତାଙ୍କୁ କୋର୍ଟରୁମରୁ ବାହାରକୁ ନେଇଗଲେ। ତା’ପରେ ତାଙ୍କୁ କୋର୍ଟରୁମ ଭିତରେ ଥିବା ଡିଏସପିଙ୍କ କାର୍ୟ୍ୟାଳୟରେ କିଛି ସମୟ ପାଇଁ ଅଟକ ରଖାଯାଇଥିଲା।ସୁପ୍ରିମକୋର୍ଟର ଶୁଣାଣିରେ ବାଧା ସୃଷ୍ଟି ହୋଇଥିଲେ ମଧ୍ୟ, ଖଣ୍ଡପୀଠ ଆବେଦନକାରୀଙ୍କ ବିରୁଦ୍ଧରେ ଅବମାନନା କିମ୍ବା ଅନ୍ୟ କୌଣସି ଦଣ୍ଡମୂଳକ କାର୍ୟ୍ୟାନୁଷ୍ଠାନ ଗ୍ରହଣ ନକରିବାକୁ ନିଷ୍ପତ୍ତି ନେଇଥିଲେ। ବିଚାରପତି କହିଥିଲେ, “ସେ ବହୁତ ବିରକ୍ତ। ଏହା ସବୁ ହତାଶାର କାରଣ। ଆମର ତାଙ୍କ ପ୍ରତି କେବଳ ସହାନୁଭୂତି ଅଛି।”