ନୂଆଦିଲ୍ଲୀ: ଦେଶର ଅର୍ଥନୀତିରେ ଜୋରଦାର୍ ପ୍ରଦର୍ଶନ । GDPରେ ଅଭିବୃଦ୍ଧି । ପ୍ରଥମ ତ୍ରୈମାସିକରେ ମୋଟ୍ ଘରୋଇ ଉତ୍ପାଦ (GDP) ଅଭିବୃଦ୍ଧି ୭.୮% । ପରିସଂଖ୍ୟାନ ମନ୍ତ୍ରାଳୟ ପକ୍ଷରୁ ପ୍ରକାଶ ପାଇଲା ତଥ୍ୟ । ଗତବର୍ଷ ପ୍ରଥମ ତ୍ରୈମାସିକରେ GDP ଗ୍ରୋଥ୍ ରେଟ୍ ୬.୫% ଥିଲା । ପ୍ରଥମ କ୍ବାର୍ଟରେର ୬.୫-୭% ଅଭିବୃଦ୍ଧି ଆକଳନ କରାଯାଇଥିଲା । ନିର୍ମାଣ, ସର୍ଭିସ୍, ମାଇନିଂ, କୃଷି କ୍ଷେତ୍ରରେ ଭଲ ଅଭିବୃଦ୍ଧି ଘଟିଛି । ଭାରତ ପୁଣି ଥରେ ବିଶ୍ୱର ଦ୍ରୁତତମ ଅଭିବୃଦ୍ଧିଶୀଳ ପ୍ରମୁଖ ଅର୍ଥନୀତିର ଆଖ୍ୟା ବଜାୟ ରଖିଛି ।
ଆମେରିକା ଦ୍ୱାରା ବିନାଶକାରୀ ଶୁଳ୍କ ଲାଗୁ କରିବା ପୂର୍ବରୁ ଏହା ଗତ ପାଞ୍ଚ ତ୍ରୈମାସିକରେ ସର୍ବାଧିକ । ସରକାରୀ ତଥ୍ୟ ମୁତାବକ ଚଳିତ ଆର୍ଥିକ ବର୍ଷ ୨୦୨୫-୨୬ର ପ୍ରଥମ ତ୍ରୈମାସିକରେ ମୋଟ ଘରୋଇ ଉତ୍ପାଦ ଅଭିବୃଦ୍ଧି ମୁଖ୍ୟତଃ କୃଷି କ୍ଷେତ୍ରର ଭଲ ପ୍ରଦର୍ଶନ କାରଣରୁ ସମ୍ଭବ ହୋଇଛି । କୃଷି କ୍ଷେତ୍ର ବ୍ୟତୀତ ନିର୍ମାଣ, ସର୍ଭିସ୍, ମାଇନିଂ ରେ ଭଲ ଅଭିବୃଦ୍ଧି ହୋଇଛି । ଭାରତ ସବୁଠାରୁ ଦ୍ରୁତ ଅଭିବୃଦ୍ଧିଶୀଳ ପ୍ରମୁଖ ଅର୍ଥନୀତି ଭାବରେ ରହିଛି, କାରଣ ଏପ୍ରିଲ-ଜୁନ୍ ଅବଧିରେ ଚୀନର GDP ଅଭିବୃଦ୍ଧି ୫.୨ ପ୍ରତିଶତ ରହିଥିଲା । ତଥ୍ୟ ଅନୁଯାୟୀ, ପୂର୍ବ ସର୍ବାଧିକ GDP ଅଭିବୃଦ୍ଧି ୨୦୨୪ ଜାନୁଆରୀ-ମାର୍ଚ୍ଚରେ ୮.୪ ପ୍ରତିଶତ ରହିଥିଲା । କୃଷି କ୍ଷେତ୍ର ୩.୭ ପ୍ରତିଶତ ଅଭିବୃଦ୍ଧି ରେକର୍ଡ କରିଛି, ଯାହା ପୂର୍ବ ଆର୍ଥିକ ବର୍ଷ ଏପ୍ରିଲ-ଜୁନ୍ ଅବଧିରେ ମାତ୍ର ୧.୫ ପ୍ରତିଶତ ଥିଲା।
ଆର୍ଥିକ ବର୍ଷ ୨୦୨୫-୨୬ର ପ୍ରଥମ ତ୍ରୈମାସରେ ନୋମିନାଲ୍ ଜିଡିପିରେ ୮.୮% ଅଭିବୃଦ୍ଧି ରହିଛି । କୃଷି ଏବଂ ଏହା ସହ ଜଡ଼ିତ କ୍ଷେତ୍ରଗୁଡ଼ିକରେ ରିୟଲ୍ GVA ଅଭିବୃଦ୍ଧି ହାର ୩.୭ ପ୍ରତିଶତ ରହିଛି, ଯାହା ପୂର୍ବ ଆର୍ଥିକ ବର୍ଷର ସମାନ ତ୍ରୈମାସିକରେ ୧.୫ ପ୍ରତିଶତ ଅଭିବୃଦ୍ଧି ଥିଲା । ସେକେଣ୍ଡ୍ରି ସେକ୍ଟର, ବିଶେଷକରି ଉତ୍ପାଦନ କ୍ଷେତ୍ରରେ ୭.୭ ପ୍ରତିଶତ ଏବଂ ନିର୍ମାଣ ୭.୬ ପ୍ରତିଶତ ଅଭିବୃଦ୍ଧି ରହିଛି । ଖନନ କ୍ଷେତ୍ରରେ -୩.୧ ପ୍ରତିଶତ ଓ ବିଜୁଳି, ଗ୍ୟାସ, ଜଳ ଯୋଗାଣ ଓ ଅନ୍ୟ ଉପଯୋଗୀ ସେବା କ୍ଷେତ୍ରରେ ୦.୫ ପ୍ରତିଶତ ଅଭିବୃଦ୍ଧି ରେକର୍ଡ କରାଯାଇଛି ।