ବିଜୁ ଜନତା ଦଳର ସଭାପତି ତଥା ଓଡ଼ିଶା ବିଧାନସଭାର ବିରୋଧୀ ଦଳ ନେତା ନବୀନ ପଟ୍ଟନାୟକଙ୍କ ନିର୍ଦ୍ଦେଶ କ୍ରମେ, ଦଳର ଏକ ପ୍ରତିନିଧି ଦଳ କନ୍ଧମାଳ ଜିଲ୍ଲା ଅନ୍ତର୍ଗତ ରାଇକିଆ ବ୍ଲକର ଭୂସ୍ଖଳନ ପ୍ରଭାବିତ ଡାଙ୍ଗେସି ଗ୍ରାମ ଗସ୍ତ କରିବେ। ସେଠାରେ ସେମାନେ ସ୍ଥିତିର ଅନୁଧ୍ୟାନ କରିବା ସହ ପ୍ରଭାବିତ ପରିବାରବର୍ଗଙ୍କ ପ୍ରତି ସମବେଦନା ଜଣାଇବେ।
‘ଅର୍ଣ୍ଣବ’ (Arnab) ବାତ୍ୟା ପରବର୍ତ୍ତୀ ପ୍ରବଳ ବର୍ଷା ଯୋଗୁଁ ଘଟିଥିବା ଏହି ଭୟଙ୍କର ଭୂସ୍ଖଳନ ଘଟଣାରେ ଗୋଟିଏ ପରିବାରର ଏକ ଶିଶୁ ସମେତ ତିନି ଜଣଙ୍କର ମୃତ୍ୟୁ ହୋଇଥିବା ସୂଚନା ମିଳିଛି ଏବଂ ପ୍ରାୟ ୧୨ ଜଣ ବ୍ୟକ୍ତି ଏବେ ମଧ୍ୟ ନିଖୋଜ ଅଛନ୍ତି। ଏହି ପ୍ରତିନିଧି ଦଳରେ ସୁଦାମ ମାରାଣ୍ଡି, ପଦ୍ମନାଭ ବେହେରା ଏବଂ ସାଲୁଗା ପ୍ରଧାନ ସାମିଲ ରହିବେ।
ଗସ୍ତ ସମୟରେ, ପ୍ରତିନିଧି ଦଳ ଶୋକସନ୍ତପ୍ତ ପରିବାରବର୍ଗଙ୍କୁ ଭେଟିବେ, ପ୍ରଭାବିତ ଗ୍ରାମବାସୀଙ୍କ ସହ ଆଲୋଚନା କରିବେ, କ୍ଷୟକ୍ଷତିର ଆକଳନ କରିବେ ଏବଂ ଚାଲିଥିବା ଉଦ୍ଧାର, ରିଲିଫ୍ ଓ ଥଇଥାନ କାର୍ଯ୍ୟର ସମୀକ୍ଷା କରିବେ। ଏହା ସହିତ, ସେମାନେ ପ୍ରଭାବିତ ପରିବାରବର୍ଗଙ୍କ ତୁରନ୍ତ ଆବଶ୍ୟକତାଗୁଡ଼ିକ ଉପରେ ଧ୍ୟାନ ଦେବେ ଏବଂ ଗୁରୁତ୍ୱପୂର୍ଣ୍ଣ ବିଷୟଗୁଡ଼ିକୁ ଦଳୀୟ ନେତୃତ୍ୱଙ୍କ ଦୃଷ୍ଟିକୁ ଆଣିବେ।
ଗସ୍ତ ଶେଷରେ, ପ୍ରତିନିଧି ଦଳ ବିଜୁ ଜନତା ଦଳର ସଭାପତି ଶ୍ରୀ ନବୀନ ପଟ୍ଟନାୟକଙ୍କ ନିକଟରେ ଏକ ବିସ୍ତୃତ ରିପୋର୍ଟ ଦାଖଲ କରିବେ। ଏହି ରିପୋର୍ଟରେ ସେଠାକାର ବାସ୍ତବ ସ୍ଥିତି ସମ୍ପର୍କରେ ଉଲ୍ଲେଖ କରାଯିବା ସହ ପ୍ରଭାବିତ ପରିବାରବର୍ଗଙ୍କ ପାଇଁ ରିଲିଫ୍, ଥଇଥାନ ଏବଂ ସହାୟତା ନିମନ୍ତେ ଆବଶ୍ୟକ ପଦକ୍ଷେପ ଗ୍ରହଣ କରିବାକୁ ସୁପାରିଶ କରାଯିବ।