ମାଲକାନଗିରି: ବାତ୍ୟା ‘ଅର୍ଣ୍ଣବ’ର ପ୍ରଭାବକୁ ସର୍ବନିମ୍ନ କରିବା ପାଇଁ ପ୍ରଶାସନ ପକ୍ଷରୁ ଉଦ୍ୟମ ଜୋରଦାର କରାଯାଇଥିବା ବେଳେ, ମଙ୍ଗଳବାର ଦିନ ଓଡ଼ିଶା ସରକାରଙ୍କ ମନ୍ତ୍ରୀ ନିତ୍ୟାନନ୍ଦ ଗଣ୍ଡ ମାଲକାନଗିରି ଜିଲ୍ଲାରେ ବାତ୍ୟା ମୁକାବିଲା ପ୍ରସ୍ତୁତି ଏବଂ ଜରୁରୀକାଳୀନ ବ୍ୟବସ୍ଥାର ସମୀକ୍ଷା କରିଛନ୍ତି।
ଜିଲ୍ଲା ଗସ୍ତ ସମୟରେ, ମନ୍ତ୍ରୀ ଶ୍ରୀ ଗଣ୍ଡ ମାଥିଲି ବ୍ଲକ ଅନ୍ତର୍ଗତ ଢୁଙ୍ଗିଆପୁଟ ଠାରେ ଥିବା ବହୁମୁଖୀ ବାତ୍ୟା ଆଶ୍ରୟସ୍ଥଳୀ ପରିଦର୍ଶନ କରିଥିଲେ ଏବଂ ବିପଦପୂର୍ଣ୍ଣ ଅଞ୍ଚଳରେ ରହୁଥିବା ଲୋକଙ୍କ ପାଇଁ କରାଯାଇଥିବା ବ୍ୟବସ୍ଥାର ଯାଞ୍ଚ କରିଥିଲେ।
ବରିଷ୍ଠ ଆଇଏଏସ୍ (IAS) ଅଧିକାରୀ ୟେଦୁଲା ବିଜୟ ଏବଂ ଜିଲ୍ଲାପାଳଙ୍କ ଉପସ୍ଥିତିରେ, ମନ୍ତ୍ରୀ ଆଶ୍ରୟସ୍ଥଳୀଗୁଡ଼ିକରେ ଖାଦ୍ୟ, ପାନୀୟ ଜଳ ଏବଂ ସ୍ୱାସ୍ଥ୍ୟସେବାର ଉପଲବ୍ଧତା ସମ୍ପର୍କରେ ସମୀକ୍ଷା କରିଥିଲେ।
ସମ୍ଭାବ୍ୟ ବନ୍ୟା ପରିସ୍ଥିତିର ମୁକାବିଲା ପାଇଁ ‘ଓଡ଼ିଶା ବିପର୍ଯ୍ୟୟ ଦ୍ରୁତ କାର୍ଯ୍ୟାନୁଷ୍ଠାନ ବାହିନୀ’ (ODRAF) ଦଳକୁ ନିୟୋଜିତ କରିବାକୁ ପ୍ରଶାସନକୁ ନିର୍ଦ୍ଦେଶ ଦିଆଯାଇଛି। ଏହା ସହିତ, ପାଙ୍ଗାମ ପୋଲ ଉପରେ କଡ଼ା ନଜର ରଖିବାକୁ କୁହାଯାଇଛି, କାରଣ ଏହି ସ୍ଥାନଟି ଉପରେ ବିଶେଷ ତଦାରଖ ଆବଶ୍ୟକ ବୋଲି ଚିହ୍ନଟ କରାଯାଇଛି।
ପ୍ରଶାସନ ପକ୍ଷରୁ କୌଣସି ପ୍ରକାରର ଜୀବନହାନି ନ ହେବା (zero casualties) ଲକ୍ଷ୍ୟ ରଖାଯାଇଥିବା ବେଳେ, ଅଧିକାରୀମାନଙ୍କୁ ସତର୍କ ରହିବାକୁ ଏବଂ ଜରୁରୀକାଳୀନ ମୁକାବିଲା ବ୍ୟବସ୍ଥା ସୁନିଶ୍ଚିତ କରିବାକୁ ନିର୍ଦ୍ଦେଶ ଦିଆଯାଇଛି।
ମନ୍ତ୍ରୀ ଶ୍ରୀ ଗଣ୍ଡ ଜନସାଧାରଣଙ୍କୁ ସତର୍କ ରହିବାକୁ ଏବଂ ବିନା ଭୟଭୀତ ହୋଇ ପ୍ରଶାସନ ଦ୍ୱାରା ଜାରି କରାଯାଇଥିବା ପରାମର୍ଶଗୁଡ଼ିକୁ ପାଳନ କରିବାକୁ ଅନୁରୋଧ କରିଛନ୍ତି। ସେ ଆହୁରି ମଧ୍ୟ କହିଛନ୍ତି, ବାତ୍ୟା ଅର୍ଣ୍ଣବର ସମ୍ଭାବ୍ୟ ପ୍ରଭାବକୁ ଦୃଷ୍ଟିରେ ରଖି ଆମ ସରକାର ସମସ୍ତ ପ୍ରକାର ପ୍ରସ୍ତୁତି ସଂପୂର୍ଣ୍ଣ କରିସାରିଛନ୍ତି। ଦକ୍ଷିଣ ଓଡ଼ିଶାର ଗଞ୍ଜାମ, ଗଜପତି, କୋରାପୁଟ, ମାଲକାନଗିରି ଓ ରାୟଗଡ଼ା ଜିଲ୍ଲାରେ ଏହି ବାତ୍ୟାର ପ୍ରଭାବ ସର୍ବାଧିକ ରହିବ ବୋଲି ଆକଳନ କରାଯାଇଛି। ତେଣୁ ଏହି ପାଞ୍ଚ ଜିଲ୍ଲା ଉପରେ ସରକାର ବିଶେଷ ତୀକ୍ଷ୍ମ ନଜର ରଖିଛନ୍ତି। ମାଲକାନଗିରି ଜିଲ୍ଲାରେ ଉପସ୍ଥିତ ରହି ପ୍ରତ୍ୟେକ ପରିସ୍ଥିତି ଉପରେ ନିରନ୍ତର ନଜର ରଖିଛି। ରାଜ୍ୟ ସରକାର ଏବଂ ଜିଲ୍ଲା ପ୍ରଶାସନ ମିଳିତ ଭାବେ ସମନ୍ୱୟ ରକ୍ଷା କରି ଏହାର ମୁକାବିଲା ପାଇଁ ସଂପୂର୍ଣ୍ଣ ସଜାଗ ରହିଛୁ।
ଜିଲ୍ଲାର ସମ୍ପୂର୍ଣ୍ଣ ସ୍ଥିତି ଉପରେ ଆମର ନଜର ରହିଛି। ପାଣିପାଗ ବିଭାଗର ସୂଚନା ଅନୁଯାୟୀ ପ୍ରତିଟି ପରିବର୍ତ୍ତନକୁ ଆକଳନ କରି ଆବଶ୍ୟକ ପଦକ୍ଷେପ ନିଆଯାଉଛି। କେହି ଭୟଭୀତ ହେବାର ଆବଶ୍ୟକତା ନାହିଁ। ସରକାର ଆପଣମାନଙ୍କ ସହ ଅଛନ୍ତି। ମୋର ସମସ୍ତଙ୍କୁ ଅନୁରୋଧ, ଗୁଜବରେ ବିଶ୍ୱାସ କରନ୍ତୁ ନାହିଁ, କେବଳ ସରକାରୀ ସୂଚନା ଉପରେ ଭରସା କରନ୍ତୁ।ବାତ୍ୟା ଅର୍ଣ୍ଣବର ସମ୍ଭାବ୍ୟ ପ୍ରଭାବକୁ ଦୃଷ୍ଟିରେ ରଖି ମାଲକାନଗିରି ଜିଲ୍ଲାର ମାଥିଲିରେ ଉଦ୍ଧାରକାରୀ ଦଳମାନଙ୍କ ସହ ସାକ୍ଷାତ କରିଛି ଏବଂ ସେମାନଙ୍କର ପ୍ରସ୍ତୁତି ସମ୍ପର୍କରେ ବିସ୍ତୃତ ସମୀକ୍ଷା କରିଛି। ଉଦ୍ଧାର ଦଳମାନଙ୍କ ପାଖରେ ଥିବା ଉପକରଣ, ଯାନବାହନ ଓ ଅନ୍ୟାନ୍ୟ ଜରୁରୀ ସାମଗ୍ରୀର ସ୍ଥିତି ଯାଞ୍ଚ କରିଛି।
ବିପଦସଂକୁଳ ଅଞ୍ଚଳରେ ଦଳମାନଙ୍କୁ କେଉଁଠି ମୁତୟନ କରାଯିବ, ଆବଶ୍ୟକ ପଡ଼ିଲେ ଲୋକମାନଙ୍କୁ କିପରି ଶୀଘ୍ର ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯିବ ଏବଂ ବିଭିନ୍ନ ବିଭାଗ ମଧ୍ୟରେ ସମନ୍ୱୟ କିପରି ରକ୍ଷା କରାଯିବ, ସେ ସମ୍ପର୍କରେ ମଧ୍ୟ ଆଲୋଚନା ହୋଇଛି। ମାଥିଲି ଭଳି ଦୁର୍ଗମ ଓ ସମ୍ବେଦନଶୀଳ ଅଞ୍ଚଳରେ ବର୍ଷା ଓ ପବନର ପ୍ରଭାବରେ ଯୋଗାଯୋଗ ବ୍ୟବସ୍ଥା ବ୍ୟାହତ ହେବାର ଆଶଙ୍କା ଥିବାରୁ, ଗଛ ପଡ଼ିଲେ ରାସ୍ତା ସଫା କରିବା, ବିଦ୍ୟୁତ୍ ଓ ଯୋଗାଯୋଗ ବ୍ୟବସ୍ଥା ଶୀଘ୍ର ପୁନଃସ୍ଥାପନ କରିବା ଏବଂ ଆବଶ୍ୟକ ପଡ଼ିଲେ ଚିକିତ୍ସା ସହାୟତା ପହଞ୍ଚାଇବା ପାଇଁ ଦଳମାନଙ୍କୁ ସମ୍ପୂର୍ଣ୍ଣ ପ୍ରସ୍ତୁତ ରହିବାକୁ ନିର୍ଦ୍ଦେଶ ଦିଆଯାଇଛି।
ମାଲକାନଗିରି ଜିଲ୍ଲାରେ ଲଗାତାର ବର୍ଷା ହେବାର ଆଶଙ୍କା ଥିବାରୁ, ପୋଟେରୁ ବ୍ରିଜ୍ ନିକଟକୁ ଯାଇ ସେଠାକାର ସମ୍ପୂର୍ଣ୍ଣ ସ୍ଥିତି ଓ ନଦୀର ଜଳସ୍ତର ଦେଖିଛି। ପୋଟେରୁ ନଦୀର ବର୍ତ୍ତମାନର ଜଳସ୍ତର, ଏହାର ବୃଦ୍ଧି ହାର ଏବଂ ବିପଦ ସ୍ତର ଆଦି ସମ୍ପର୍କରେ ଆଲୋଚନା ଓ ସୂଚନା ନେଇଛି। ବ୍ରିଜ୍ ଓ ଏହାର ଆଖପାଖ ଅଞ୍ଚଳର ସୁରକ୍ଷା ବ୍ୟବସ୍ଥା ମଧ୍ୟ ଯାଞ୍ଚ କରାଯାଇଛି। ବର୍ଷା ଅଧିକ ହେଲେ ଜଳସ୍ତର ଦ୍ରୁତ ଗତିରେ ବୃଦ୍ଧି ପାଇପାରେ। ତେଣୁ ଜଳସ୍ତର ଉପରେ ନିରନ୍ତର ନଜର ରଖିବା, ବିପଦ ସ୍ତର ନିକଟତର ହେଲେ ତୁରନ୍ତ ଆବଶ୍ୟକୀୟ ପଦେକ୍ଷପ ନେବା ଏବଂ ଦରକାର ପଡ଼ିଲେ ବ୍ରିଜ୍ ଦେଇ ଯାତାୟାତ ସ୍ଥଗିତ ରଖିବା ପାଇଁ ଅଧିକାରୀମାନଙ୍କୁ ନିର୍ଦ୍ଦେଶ ଦିଆଯାଇଛି।