ଯାଜପୁର: ନାବାଳିକାଙ୍କୁ ଦୁଷ୍କର୍ମ ଓ ପରେ ଗର୍ଭପାତ କରାଇବା ଘଟଣାରେ ଯାଜପୁର ରୋଡ୍ ଗୋଶାଳା ଛକରେ ଥିବା ଘରୋଇ ନର୍ସିଂହୋମ୍କୁ ସିଲ୍ କରାଯିବ। ଏନେଇ ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀ (CDMO) ସୂଚନା ଦେଇ କହିଛନ୍ତି ଯେ, ଆସନ୍ତା ୨୦ ତାରିଖ ପର୍ଯ୍ୟନ୍ତ ଡେଡ୍ଲାଇନ୍ ଦିଆଯାଇଛି। ଘରୋଇ ନର୍ସିଂହୋମ୍ ଆଇନ୍ର ଉଲ୍ଲଙ୍ଘନ ହୋଇଥିବାରୁ ଏହାକୁ ସିଲ୍ କରାଯିବ। ଏହି ଘଟଣାରେ ଯାଜପୁର ଜିଲ୍ଲାର ଜଣେ ୭୦ ବର୍ଷୀୟ ଠିକାଦାରଙ୍କୁ ପୋଲିସ ଗିରଫ କରିଛି। ଅଭିଯୋଗ ଅନୁଯାୟୀ, ସେ ତାଙ୍କ ନାବାଳିକା ଘରୋଇ ସହାୟିକାଙ୍କୁ ଦୀର୍ଘଦିନ ଧରି ଯୌନ ନିର୍ଯାତନା ଦେଇ ଆସୁଥିଲେ, ଯାହାର ପରିଣାମରେ ସେ ଅନ୍ତସତ୍ୱା ହୋଇଥିଲେ। ପରେ ତାଙ୍କୁ ଗର୍ଭପାତ ପାଇଁ ବାଧ୍ୟ କରାଯାଇଥିବା ଅଭିଯୋଗ ହୋଇଛି।
ଏହି ମାମଲାରେ ୬ ମାସ ଗର୍ଭବତୀ ନାବାଳିକାଙ୍କ ଗର୍ଭପାତ କରାଇଥିବା ଘରୋଇ ହସ୍ପିଟାଲର ମ୍ୟାନେଜିଂ ଡାଇରେକ୍ଟରଙ୍କୁ ମଧ୍ୟ ଗିରଫ କରାଯାଇଛି। ହସ୍ପିଟାଲର ଜଣେ କର୍ମଚାରୀ ସରକାରୀ ସ୍ୱାସ୍ଥ୍ୟକର୍ମୀଙ୍କୁ ଖବର ଦେବା ପରେ ଘଟଣାଟି ସାମ୍ନାକୁ ଆସିଥିଲା। ପୀଡ଼ିତାଙ୍କୁ ଯାଜପୁର ‘ସକ୍ଷୀ ଘର’ରେ CWO ଦ୍ୱାରା କାଉନ୍ସେଲିଂ କରାଯାଉଛି। ସୂଚନା ମିଳିଛି ଯେ, ପୀଡ଼ିତା ଆସନ୍ତା ମାଟ୍ରିକ୍ ପରୀକ୍ଷା ଦେବା ପାଇଁ ପ୍ରଶାସନଙ୍କୁ ଅନୁମତି ମାଗିଛନ୍ତି।
ପୋଲିସ ମାମଲାରେ Protection of Children from Sexual Offences Act (ପକସୋ ଆଇନ) ଧାରା ୪ ଓ ୬ ସହିତ Bharatiya Nyaya Sanhita (ବିଏନଏସ) ଧାରା ୭୦(୨) ଓ ୮୯ ଅନୁଯାୟୀ ମୋକଦ୍ଦମା ରୁଜୁ କରିଛି। ଉଭୟ ଅଭିଯୁକ୍ତଙ୍କୁ ଯାଜପୁର ରୋଡ୍ କୋର୍ଟରେ ହାଜର କରାଯାଇଥିଲା। କୋର୍ଟ ସେମାନଙ୍କ ଜାମିନ ନାମଞ୍ଜୁର କରି ବିଚାର ବିଭାଗୀୟ ହାତଜକୁ ପଠାଇଛି।ଘଟଣାରେ ନାବାଳିକାଙ୍କ ଗର୍ଭପାତ କରିଥିବା ଡାକ୍ତରଙ୍କୁ ପୋଲିସ ଖୋଜୁଥିବା ବେଳେ ତଦନ୍ତ ଜାରି ରହିଛି। ଆଗାମୀ ଦିନରେ ଆହୁରି କିଛି ଲୋକଙ୍କ ଗିରଫ ସମ୍ଭାବନା ଥିବା ପୋଲିସ ସୂଚନା ଦେଇଛି।