ଚଣ୍ଡିଗଡ: ଲାଞ୍ଚ ନେବା ଅଭିଯୋଗରେ ପଞ୍ଜାବ ଡିଆଇଜି ହରଚରନ ସିଂ ଭୁଲାର ଗିରଫ ହୋଇଛନ୍ତି । ହରଚରନ ସିଂ ଭୁଲାରଙ୍କୁ ଗିରଫ କରିଛି ସିବିଆଇ । ଡିଆଇଜିଙ୍କ ଘରେ ୨୧ ଘଣ୍ଟାର ମାରାଥନ ରେଡ୍ ପରେ ୭ କୋଟି ଟଙ୍କା ଜବତ କରାଯାଇଛି । ଦେଢ଼ କିଲୋ ସୁନା, ୨୨ଟି ଦାମୀ ଘଣ୍ଟା ମଧ୍ୟ ଜବତ ହୋଇଥିବା ସୂଚନା ମିଳିଛି ।
ସୂଚନା ଅନୁସାରେ, ଗତକାଲି ଏକ ମାମଲାକୁ ରଫାଦଫା କରିବାକୁ ଜଣେ ଅଭିଯୋଗକାରୀଙ୍କ ଠାରୁ ୫ ଲକ୍ଷ ଲାଞ୍ଚ ନେବେ ବେଳେ ଆଇପିଏସ୍ ଅଧିକାରୀଙ୍କୁ ସିବିଆଇ ଧରିଥିଲା । ଲାଞ୍ଚ ନେଇ ଧରାପଡ଼ିଥିବା ବରିଷ୍ଠ ଆଇପିଏସ୍ ଜଣଙ୍କ ହେଲେ ପଞ୍ଜାବ ଅନ୍ତର୍ଗତ ରୋପର ରେଞ୍ଜର ଡିଆଇଜି ହରଚରଣ ସିଂହ ଭୁଲ୍ଲାର । ସିବିଆଇ ଚଢାଉ ସମୟରେ ଡିଆଇଜି ଏବଂ ତାଙ୍କ ସହଯୋଗୀଙ୍କ ଘରୁ ୫ କୋଟି ଟଙ୍କା ନଗଦ, ୧.୫ କିଲୋ ସୁନା, ଅନେକ ଫ୍ଲାଟର କାଗଜପତ୍ର, ପ୍ଲଟ ଏବଂ ମର୍ସିଡିଜ୍-ଅଡି ଭଳି ବିଳାସପୂର୍ଣ୍ଣ କାରର ଚାବି ଜବତ କରାଯାଇଥିଲା । ଏପରିକି ଟଙ୍କା ଗଣିବାକୁ ଟଙ୍କା ଗଣା ମେସିନ୍ ମଧ୍ୟ ନିୟୋଜିତ ହୋଇଥିଲା ।
ଅଭିଯୁକ୍ତ ଅଧିକାରୀ ଏବଂ ତାଙ୍କ ସହଯୋଗୀଙ୍କ ବିରୁଦ୍ଧରେ ମାମଲା ରୁଜୁ କରିଛି ସିବିଆଇ। ଅଭିଯୋଗ ହୋଇଛି ଯେ ଡିଆଇଜି ଅଭିଯୋଗକାରୀଙ୍କ ବିରୁଦ୍ଧରେ ଦାୟର ହୋଇଥିବା ଏକ ଏଫଆଇଆର “ନିଷ୍ପତ୍ତି” କରିବା ଏବଂ ତାଙ୍କ ବ୍ୟବସାୟ ବିରୁଦ୍ଧରେ ଆଉ କୌଣସି ଜବରଦସ୍ତି କିମ୍ବା ପ୍ରତିକୂଳ କାର୍ଯ୍ୟାନୁଷ୍ଠାନ ଗ୍ରହଣ ନକରିବା ପାଇଁ ୮ ଲକ୍ଷ ଲାଞ୍ଚ ଏବଂ ନିୟମିତ ମାସିକ ଅବୈଧ ଦେୟ ଦାବି କରିଥିଲେ। ଏହି ପରିମାଣ ଜଣେ ମଧ୍ୟସ୍ଥିଙ୍କ ମାଧ୍ୟମରେ ଦାବି କରାଯାଇଥିବା ଅଭିଯୋଗ ହୋଇଛି।