ଶନିବାର ରୁଷିଆ ୟୁକ୍ରେନର ରାଜଧାନୀ କିଭ୍ ଉପରେ ଡ୍ରୋନ୍ ଏବଂ କ୍ଷେପଣାସ୍ତ୍ର ସାହାଯ୍ୟରେ ଏକ ବଡ଼ ଆକ୍ରମଣ କରିଛି
ରୁଷିଆ-: ଶନିବାର ରୁଷିଆ ୟୁକ୍ରେନର ରାଜଧାନୀ କିଭ୍ ଉପରେ ଡ୍ରୋନ୍ ଏବଂ କ୍ଷେପଣାସ୍ତ୍ର ସାହାଯ୍ୟରେ ଏକ ବଡ଼ ଆକ୍ରମଣ କରିଛି। ଯାହା ଫଳରେ ସହର ସାରା ବିସ୍ଫୋରଣ ଶବ୍ଦ ଶୁଣାଯାଇଛି। ଜୀବନ ବଞ୍ଚାଇବା ପାଇଁ ଜନସାଧାରଣ ଭୂତଳ ମେଟ୍ରୋ ଷ୍ଟେସନରେ ଆଶ୍ରୟ ନେଇଛନ୍ତି। ରୁଷିଆ ଏବଂ ୟୁକ୍ରେନ ମଧ୍ୟରେ କଏଦୀ ବିନିମୟ ଆରମ୍ଭ ହେବାର ମାତ୍ର କିଛି ଘଣ୍ଟା ପରେ ଏହି ଆକ୍ରମଣ ହୋଇଥିଲା । ଗତ ସପ୍ତାହରେ ଇସ୍ତାନବୁଲରେ ଏକ ବୈଠକରେ ଉଭୟ ପକ୍ଷ ମଧ୍ୟରେ ହୋଇଥିବା ବିନିମୟ ଚୁକ୍ତିନାମାର ପ୍ରଥମ ପର୍ଯ୍ୟାୟର ଅଂଶ ସ୍ୱରୂପ ଶହ ଶହ ସୈନିକ ଏବଂ ସାଧାରଣ ଲୋକଙ୍କୁ ମୁକ୍ତ କରାଯାଇଥିଲା। ସ୍ଥାନୀୟ ବାସିନ୍ଦା କହିଛନ୍ତି, ସହରରେ ବୋମାମାଡ଼ ସହିତ ସାଇରନ୍ ବାଜିବା ଲାଗିଥିଲା। ବହୁ ଆପାର୍ଟମେଣ୍ଟ କ୍ଷତିଗ୍ରସ୍ତ ହୋଇଛି। କେତେକ ଘର ଭୁଶୁଡ଼ି ପଡ଼ିଛି।
ଗତ ତିନି ବର୍ଷ ଧରି ରୁଷ ଏବଂ ୟୁକ୍ରେନ ମଧ୍ୟରେ ଯୁଦ୍ଧ ଚାଲିଛି। ଏହି ଯୁଦ୍ଧରେ ପୁଣି ଥରେ ୟୁକ୍ରେନର ରାଜଧାନୀ କିଭ୍ ଉପରେ ଆକ୍ରମଣ କରାଯାଇଛି। ଦୁଇ ଦେଶ ମଧ୍ୟରେ ତିନି ବର୍ଷ ଧରି ଚାଲିଥିବା ଯୁଦ୍ଧରେ ଯୁଦ୍ଧବିରତି ପାଇଁ ସମସ୍ତ ପ୍ରୟାସ ଏପର୍ଯ୍ୟନ୍ତ ବିଫଳ ହୋଇଛି। ୟୁକ୍ରେନ ଉପରେ ପୁଣି ପୁଟିନ ପୁଣି ପ୍ରହାର କରି କିଭ୍ ଉପରେ ବୋମା ବର୍ଷା କରାଇଛନ୍ତି। ରାତାରାତି କିଭ୍ ଉପରେ ଘନ ଘନ ଆକ୍ରମଣ କରିଛି ପୁଟିନ ବାହିନୀ। ଡଜନ ଡଜନ ଡ୍ରୋନ ଆକ୍ରମଣ ସହ ବାଲିଷ୍ଟିକ୍ ମିସାଇଲ ନିକ୍ଷେପ କରିଛି। ସିରିଜ ବିସ୍ଫୋରଣ ସମ୍ପୂର୍ଣ୍ଣ ସହରକୁ ଦୋହଲାଇ ଦେଇଥିଲା ।