ନୂଆଦିଲ୍ଲୀ: ଋଷ ଉପରେ ଭାରି ପଡ଼ିଛି ୟୁକ୍ରେନ ବିରୋଧରେ ଯୁଦ୍ଧ । ଗତ ୧୯ ଦିନ ଧରି ଋଷ ସେନା ୟୁକ୍ରେନ ଉପରେ ଆକ୍ରମଣ କରିଆସୁଛି ଏବଂ ଏହି ଯୁଦ୍ଧରେ ଉଭୟ ଦେଶ ପ୍ରବଳ କ୍ଷତି ସହ୍ୟ କରୁଛନ୍ତି । ୟୁକ୍ରେନ ବିରୁଦ୍ଧରେ ଯୁଦ୍ଧ କରିବା ନେଇ ଋଷ ଭାରି ଆର୍ଥିକ ସଙ୍କଟ ଦେଇ ଗତି କରୁଛି । ଏହି ଯୁଦ୍ଧରେ କେବଳ ଦୁଇ ଦେଶର ସୈନ୍ୟମାନେ ମୃତ୍ୟୁବରଣ କରିଛନ୍ତି, କେବଳ ତାହା ନୁହେଁ ବରଂ ଦୁଇ ଦେଶକୁ ଏକ ବଡ଼ ଆର୍ଥିକ କ୍ଷତି ମଧ୍ୟ ହୋଇଛି | ଯାହାକୁ ନେଇ ଏବେ ଋଷ ଚୀନ୍ କୁ ଆର୍ଥିକ ସହାୟତା ମାଗିଛି ।
- ଚୀନ୍ କୁ ଆମେରିକାର ଚେତାବନୀ
ଆମେରିକାର ସୁରକ୍ଷା ପରାମର୍ଶଦାତା କହିଛନ୍ତି ଯେ, ୟୁକ୍ରେନ ଉପରେ ହୋଇଥିବା ଆକ୍ରମଣରେ ଋଷ ଚୀନ୍କୁ ଅସ୍ତ୍ରଶସ୍ତ୍ର ମାଗିଛି। ଋଷର ଏହି ପଦକ୍ଷେପ ରୋମରେ ହେବାକୁ ଥିବା ବୈଠକ ପୂର୍ବରୁ ଆମେରିକା ଏବଂ ଚୀନ୍ ସରକାରଙ୍କ ମଧ୍ୟରେ ତିକ୍ତତା ବୃଦ୍ଧି କରିଛି। ଏହି ବାର୍ତ୍ତାଳାପ ପୂର୍ବରୁ ଆମେରିକାର ଜାତୀୟ ସୁରକ୍ଷା ପରାମର୍ଶଦାତା ଜେକେ ସଲିଭାନ ଖୋଲାଖୋଲି ଭାବରେ ଚୀନ୍କୁ ଚେତାବନୀ ଦେଇଛନ୍ତି ଋଷକୁ ବିଶ୍ୱସ୍ତରୀୟ ପ୍ରତିବନ୍ଧକରୁ ରକ୍ଷା ନକରନ୍ତୁ।
ଏହି ବିଶ୍ୱସ୍ତରୀୟ ପ୍ରତିବନ୍ଧକ ଋଷର ଅର୍ଥନୀତିକୁ ଗଭୀର ଭାବରେ ପ୍ରଭାବିତ କରିଛି। ସେ କହିଛନ୍ତି ଯେ, ଆମେ ଏହା ଘଟିବାକୁ ଦେବୁ ନାହିଁ। ଋଷକୁ ଚୀନ୍ର ଆର୍ଥିକ ସହାୟତା ପ୍ରଦାନ ରାଷ୍ଟ୍ରପତି ଜୋ ବିଡେନଙ୍କ ଅନ୍ୟତମ ଚିନ୍ତାର କାରଣ ପାଲଟିଛି । ଆମେରିକାର ଜଣେ ଅଧିକାରୀ କହିଛନ୍ତି ଯେ ନିକଟ ଅତୀତରେ ଋଷ ଚୀନ୍କୁ ସାମରିକ ଉପକରଣ ଏବଂ ଅନ୍ୟାନ୍ୟ ସାହାଯ୍ୟ ମାଗିଛି।
- ବେଜିଂ ଉପରେ ମିଥ୍ୟା ପ୍ରଚାର ଅଭିଯୋଗ
ବିଡେନ୍ ପ୍ରଶାସନ ମଧ୍ୟ ଚାଇନାକୁ ଋଷ ବିଷୟରେ ଭୁଲ ତଥ୍ୟ ବିସ୍ତାର କରୁଥିବା ଅଭିଯୋଗ କରିଛି, ଯାହା ୟୁକ୍ରେନ ଉପରେ ରାସାୟନିକ ଆକ୍ରମଣ କରିବା ପାଇଁ ଋଷର ରାଷ୍ଟ୍ରପତି ଭ୍ଲାଦିମ ପୁଟିନଙ୍କ ସୈନ୍ୟ ବାହିନୀର ଏକ ବାହାନା ସଦୃଶ ହୋଇପାରେ। ଆମେରିକାର ସହାୟତାରେ ୟୁକ୍ରେନ ରାସାୟନିକ ଅସ୍ତ୍ର ଲ୍ୟାବ ଚଳାଉଛି ବୋଲି ବେଜିଂ ଋଷର ମିଥ୍ୟା ଦାବି ପ୍ରଚାର କରୁଛି ବୋଲି ବିଡେନ ପ୍ରଶାସନର ଅଧିକାରୀ କହିଛନ୍ତି।
- ଆମେରିକା ସହିତ ଚୀନର ବୈଠକ
ଚୀନ୍ର ବରିଷ୍ଠ ବୈଦେଶିକ ନୀତି ପରାମର୍ଶଦାତା ୟାଙ୍ଗ ଜିଆଚିଙ୍କ ସହ ଆଲୋଚନାରେ ସଲିଭାନ୍ ନିଶ୍ଚିତ ଭାବରେ ବେଜିଂ ମସ୍କୋକୁ କେତେ ସାହାଯ୍ୟ କରିବ ସେ ବିଷୟରେ ଆଲୋଚନା କରିବେ। ଏହି ଆଲୋଚନା ଉପରେ ଏକ ବିବୃତ୍ତି ଦେଇ ଚୀନ୍ ବୈଦେଶିକ ମନ୍ତ୍ରଣାଳୟର ମୁଖପାତ୍ର ଜାଓ ଲିଜିଆନ୍ ୟୁକ୍ରେନ ବିଷୟରେ ଉଲ୍ଲେଖ କରି କହିଛନ୍ତି ଯେ, ଗତ ନଭେମ୍ବରରେ ଚୀନ୍ ଏବଂ ଆମେରିକାର ମୁଖ୍ୟମାନଙ୍କ ଭର୍ଚୁଆଲ୍ ସମ୍ମିଳନୀରେ ପହଞ୍ଚିଥିବା ଗୁରୁତ୍ୱପୂର୍ଣ୍ଣ ସହମତିକୁ କାର୍ଯ୍ୟକାରୀ କରିବା ଏହି ବୈଠକର ମୁଖ୍ୟ ପ୍ରସଙ୍ଗ ଅଟେ ।
- ଋଷକୁ ଭାରି ପଡ଼ିଲା ୟୁକ୍ରେନ ସହ ଯୁଦ୍ଧ
ୟୁକ୍ରେନ ସହିତ ଯୁଦ୍ଧରେ ରୁଷର ଅନେକ ଆର୍ଥିକ କ୍ଷତି ହୋଇଛି | ୟୁକ୍ରେନ ବିରୋଧରେ ଚାଲିଥିବା ଯୁଦ୍ଧ ପରେ ଦେଶରେ ୬୪୦ ବିଲିୟନ ଡଲାରର ସୁନା ଏବଂ ବୈଦେଶିକ ମୁଦ୍ରା ଭଣ୍ଡାରର ପ୍ରାୟ ଅଧା ଅଂଶ ଫ୍ରିଜ୍ ହୋଇସାରିଛି ବୋଲି ଅର୍ଥମନ୍ତ୍ରୀ ଆଣ୍ଟୋନ୍ ସିଲୁଏନୋଭ କହିଛନ୍ତି। ବର୍ତ୍ତମାନ ଋଷ ଏହାର ଋଣଦାତା ମାନଙ୍କ ଋଣ କିପରି ପରିଶୋଧ କରିବ ତାହା ଏକ ବଡ଼ ପ୍ରଶ୍ନ ହୋଇ ସାମ୍ନାକୁ ଆସିଛି