ବୃନ୍ଦାବନର ପ୍ରସିଦ୍ଧ ସନ୍ଥ ପ୍ରେମାନନ୍ଦ ମହାରାଜଙ୍କ ଜୀବନ ପ୍ରତି ରହିଛି ବିପଦ। ତାଙ୍କ ସୁରକ୍ଷାକୁ ନେଇ ଶ୍ରୀକୃଷ୍ଣ ଜନ୍ମଭୂମି ସଂଘର୍ଷ ନ୍ୟାସର ଅଧ୍ୟକ୍ଷ ଦିନେଶ ଶର୍ମା ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ଚିଠି ଲେଖି ପ୍ରେମାନନ୍ଦ ମହାରାଜଙ୍କୁ ସୁରକ୍ଷା ଯୋଗାଇ ଦେବାକୁ ଦାବି କରିଛନ୍ତି। ଆଶ୍ରମ ଭିତରେ ଦୁଇଟି ଗୋଷ୍ଠୀ ସୃଷ୍ଟି ହୋଇଥିବା ଏବଂ କିଛି ମାଫିଆ ତତ୍ତ୍ୱ ମହାରାଜଙ୍କୁ କ୍ଷତି ପହଞ୍ଚାଇପାରନ୍ତି ବୋଲି ସେ ଅଭିଯୋଗ କରିଛନ୍ତି।
ଦିନେଶ କହିଛନ୍ତି, ପ୍ରେମାନନ୍ଦ ମହାରାଜଙ୍କ ଜୀବନ ପ୍ରତି ବିପଦ ରହିଛି। ଏହି କାରଣରୁ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ଚିଠି ଲେଖି ତାଙ୍କ ସୁରକ୍ଷା ନିଶ୍ଚିତ କରିବାକୁ ଦାବି କରାଯାଇଛି। ଆଶ୍ରମ ପରିସର ଏବଂ ତାହା ସହ ଜଡ଼ିତ କିଛି ସ୍ଥାନରେ ଏବେ ଦୁଇଟି ଗୋଷ୍ଠୀ କାର୍ଯ୍ୟ କରୁଛି।
ଗୋଟିଏ ଗୋଷ୍ଠୀରେ ପ୍ରକୃତ ସାଧୁସନ୍ଥ ରହିଛନ୍ତି। ସେମାନେ ପ୍ରେମାନନ୍ଦ ମହାରାଜଙ୍କ ସହ ଆଶ୍ରମଠାରୁ ପ୍ରାୟ ୨୦ କିଲୋମିଟର ଦୂର ଯମୁନା କୂଳରେ ରହି ଭଜନ, ସାଧନା ଓ ତପସ୍ୟା କରୁଛନ୍ତି। ଅନ୍ୟ ଗୋଷ୍ଠୀରେ ଭୂମାଫିଆ ଓ ଶିଶୁ ସମ୍ପର୍କିତ ମାଫିଆ ତତ୍ତ୍ୱ ରହିଥିବା ସେ ଅଭିଯୋଗ କରିଛନ୍ତି।
ଦିନେଶ ଶର୍ମାଙ୍କ ଅଭିଯୋଗ ଅନୁସାରେ, ଏହି ଗୋଷ୍ଠୀ ଆଶ୍ରମ ସହ ଜଡ଼ିତ ପ୍ରାୟ ୧୫ଟି ଛୋଟବଡ଼ ଆଶ୍ରମ ଉପରେ ଦଖଲ କରିଛି। ଯମୁନା ଖାଦର ଅଞ୍ଚଳର ଜମି ବିକ୍ରିକରି କୋଟି କୋଟି ଟଙ୍କାରୁ ଆରମ୍ଭ କରି ଶହ ଶହ କୋଟି ଟଙ୍କାର ସମ୍ପତ୍ତି ସଂଗ୍ରହ କରାଯାଇଥିବା ମଧ୍ୟ ସେ ଅଭିଯୋଗ ଆଣିଛନ୍ତି। ଏହି ଅଭିଯୋଗଗୁଡ଼ିକର ସ୍ୱାଧୀନ ଯାଞ୍ଚ ହେବା ଦରକାର ବୋଲି ସେ ଦାବି କରିଛି ।