ନୂଆଦିଲ୍ଲୀ: ୧୯ ବର୍ଷରୁ କମ୍ ଏସିଆ କପ୍ ୨୦୨୫ର ଫାଇନାଲ (୫୦ ଓଭର ଫର୍ମାଟ୍) ମ୍ୟାଚ ଭାରତ ଏବଂ ପାକିସ୍ତାନ ମଧ୍ୟରେ ଖେଳାଯିବ। ପ୍ରାୟ ତିନି ମାସ ପୂର୍ବେ ପୁରୁଷ ଜାତୀୟ ଦଳ ମଧ୍ୟରେ ଏସିଆ କପରେ ମଧ୍ୟ ଭାରତ ଏବଂ ପାକିସ୍ତାନ ଟାଇଟଲ ପାଇଁ ମୁହାଁମୁହିଁ ହୋଇଥିଲେ। ୧୯ ବର୍ଷରୁ କମ୍ ବର୍ଗରେ, ଆୟୁଷ ମହାତ୍ରେଙ୍କ ଅଧିନାୟକତ୍ୱରେ ଭାରତ ସେମିଫାଇନାଲରେ ଶ୍ରୀଲଙ୍କାକୁ ପରାସ୍ତ କରିଥିଲା। ସେହିପରି ପାକିସ୍ତାନ ବାଂଲାଦେଶକୁ ପରାସ୍ତ କରି ଫାଇନାଲରେ ପହଞ୍ଚିଥିଲା। ଭାରତୀୟ କ୍ରିକେଟ୍ ଦଳ ଆଠ ଥର ୧୯ ବର୍ଷରୁ କମ୍ ଏସିଆ କପ୍ ଜିତିଛି। ସେମାନେ ଗତ ସଂସ୍କରଣ (୨୦୨୪)ର ଫାଇନାଲରେ ମଧ୍ୟ ପହଞ୍ଚିଥିଲେ କିନ୍ତୁ ଫାଇନାଲରେ ବାଂଲାଦେଶ ଠାରୁ ପରାସ୍ତ ହୋଇଥିଲେ। ୨୦୧୭ ପରେ ପାକିସ୍ତାନ ପ୍ରଥମ ଥର ପାଇଁ ଫାଇନାଲରେ ପହଞ୍ଚିଛି। ଭାରତ ଏବଂ ପାକିସ୍ତାନ ଶେଷ ଥର ପାଇଁ ୨୦୧୪ ମସିହାରେ ୧୯ ବର୍ଷରୁ କମ୍ ଏସିଆ କପ୍ ଫାଇନାଲରେ ପରସ୍ପରକୁ ଭେଟିଥିଲେ, ଯାହାକୁ ଭାରତ ୪୦ ରନରେ ଜିତିଥିଲା।
ଭାରତୀୟ ୧୯ ବର୍ଷରୁ କମ୍ ଦଳ ଏବଂ ପାକିସ୍ତାନ ୧୯ ବର୍ଷରୁ କମ୍ ଦଳ ମଧ୍ୟରେ ଫାଇନାଲ ମ୍ୟାଚ୍ ରବିବାର, ଡିସେମ୍ବର ୨୧ ତାରିଖରେ ଖେଳାଯିବ। ଏହି ମ୍ୟାଚ୍ ଦୁବାଇର ଆଇସିସି ଏକାଡେମୀ ଗ୍ରାଉଣ୍ଡରେ ଖେଳାଯିବ। ଡିସେମ୍ବର ୨୧ ତାରିଖ ସକାଳ ୧୦:୩୦ ରେ ଭାରତୀୟ ସମୟ ଅନୁସାରେ ଆରମ୍ଭ ହେବ ମ୍ୟାଚ । ଟସ୍ ସକାଳ ୧୦:୦୦ ରେ ହେବ। ୧୯ ବର୍ଷରୁ କମ୍ ଏସିଆ କପ୍ ୨୦୨୫ ଫାଇନାଲ୍ ସୋନି ସ୍ପୋର୍ଟସ୍ ନେଟୱାର୍କରେ ସିଧା ପ୍ରସାରଣ କରାଯିବ। ଆପଣ ସୋନି ସ୍ପୋର୍ଟସ୍ ୧ରେ ଟିଭିରେ ମ୍ୟାଚ୍ ସିଧା ଦେଖିପାରିବେ। ମୋବାଇଲ୍ ଏବଂ ଲାପଟପ୍ ବ୍ୟବହାରକାରୀମାନେ ସୋନି ଲିଭ୍ ଆପ୍ କିମ୍ବା ୱେବସାଇଟରେ ମ୍ୟାଚ୍ ସିଧା ଦେଖିପାରିବେ।