(ଶୁଭସ୍ମିତା ଦାଶ): ଆଉ ଦିନ କେଇଟାର ଅପେକ୍ଷା । ଧରାପୃଷ୍ଠକୂୁ ଅବତରଣ କରିବେ ଜଗତ ଜନୀନ ମା ଦୁର୍ଗା । ସହର ଠାରୁ ଆରମ୍ଭ କରି ଗାଁ ସବୁଆଡ଼େ ମାଙ୍କ ଆଗମନ ପାଇଁ ପ୍ରସ୍ତୁତି ଚାଲିଛି । କାଶତଣ୍ଡୀ ଫୁଲ ମଧ୍ୟ ମା ଙ୍କ ଆଗମନ ବାଟକୁ ଅନାଇ ରହିଛି । ଦଶହରା ଉପଲକ୍ଷେ ବିଭିନ୍ନ ଶକ୍ତିପୀଠରେ ମାଙ୍କ ୧୬ ପୂଜା ଅନୁଷ୍ଠିତ ହେଉଛି । ଅନ୍ୟପଟେ ଆଜି ଠୁ ନବରାତ୍ର ପୂଜା ଆରମ୍ଭ ହୋଇଛି । ବ୍ରତଧାରୀ ମାନେ ଆଜି ଠୁ ମାଙ୍କର ପୂଜା ଅର୍ଚ୍ଚନା କରିବେ । ଘରକୁ ସଫାକରି ମାଙ୍କ ଘଟ ସ୍ଥାପନା କରି ମାଙ୍କ ଆବାହନ କରିବେ । ଏବଂ ସଂଧ୍ୟାରେ ଦାଣ୍ଡିଆ ନୃତ୍ୟ ରେ ନିଜକୁ ହଜାଇବେ । ନବରାତ୍ର ପୂଜାର ଆରମ୍ଭ ରେ କଟକର ଅଧିଷ୍ଠାତ୍ରୀ ଦେବୀ ମା’ ଚଣ୍ଡୀ ଆଜି ଜୟଦୁର୍ଗା ବେଶରେ ଦର୍ଶନ ଦେବେ । ସେହିପରି ଗଡ଼ଚଣ୍ଡୀ ଆଜି କମଳା ବେଶରେ ସଜ୍ଜିତ ହେବେ । ଏହାପୂର୍ବରୁ ଗତକାଲି ଉଗ୍ରତାରା ବେଶରେ ଶ୍ରଦ୍ଧାଳୁଙ୍କୁ ଦର୍ଶନ ଦେଇଥିଲେ ମାଆ କଟକ ଚଣ୍ଡୀ । ସେହିପରି ମାଆ ଗଡ଼ଚଣ୍ଡୀ ରାଜରାଜେଶ୍ୱରୀ ବେଶ ଧାରଣ କରିଥିଲେ । ପ୍ରତିଦିନ ମାଆଙ୍କ ନୂଆ ନୂଆ ବେଶ ଦର୍ଶନ ପାଇଁ ମନ୍ଦିରରେ ଭକ୍ତଙ୍କ ଭିଡ଼ ଲାଗୁଛି । ଅନ୍ୟ ପଟେ ମଧ୍ୟ ମଣ୍ଡପରେ ବି ଜଗଜ୍ଜନନୀଙ୍କ ଆରାଧନା ପାଇଁ ପ୍ରସ୍ତୁତି ଜୋରଦାର । ଆଜିଠୁ ବିଭିନ୍ନ ମଣ୍ଡପରେ ଆରମ୍ଭ ହେବ ମାଆ ଦୁର୍ଗାଙ୍କ ରଙ୍ଗ କାମ । କର୍ମକର୍ତ୍ତାଙ୍କଠାରୁ ମୂର୍ତ୍ତି କାରିଗର ସମସ୍ତେ ବ୍ୟସ୍ତ । ଏହାପୂର୍ବରୁ ଗତକାଲି ପବିତ୍ର ମହାଳୟାରେ କଟକ ସହରର ବିଭିନ୍ନ ପୂଜା ମଣ୍ଡପରେ ଜଗଜ୍ଜନନୀ ମାଦୁର୍ଗାଙ୍କ ପ୍ରତିମାରେ ଖଡିଲାଗି ହୋଇଛି । କେତେକ ପୂଜା ମଣ୍ଡପରେ କେମିକାଲ ବ୍ୟବହାର କରାନଯାଇ ପାରମ୍ପରିକ ଢଙ୍ଗରେ ଖଡିଲାଗି ହୋଇଛି । ଆସନ୍ତା ୧୫ ତାରିଖରେ ଷଷ୍ଠୀ ପୂଜା । ତାପୂର୍ବରୁ ସମସ୍ତ ସାଜସଜା ଓ ଦେବୀଙ୍କ ବେଶଭୂଷା କାମ ଶେଷ କରିବାକୁ ସମସ୍ତେ ବ୍ୟସ୍ତ ।
