ଫୁଟବଲ୍ ରେ ଭାରତର ଐତିହାସିକ ବିଜୟ

ପାକିସ୍ତାନକୁ ମାତ୍ ଦେଇ ଫୁଟବଲ୍‌ରେ ଭାରତର ଐତିହାସିକ ବିଜୟ। ଶେଷ ମୁହୂର୍ତ୍ତର ଗୋଲ୍‌ରେ ବଦଳିଗଲା ମ୍ୟାଚ୍‌ର ଚିତ୍ର। ପ୍ରଥମାର୍ଦ୍ଧରେ ପଛୁଆ ରହିବା ପରେ ଦ୍ୱିତୀୟାର୍ଦ୍ଧରେ ଚମତ୍କାର ପ୍ରତ୍ୟାବର୍ତ୍ତନ କରି ଚିରପ୍ରତିଦ୍ୱନ୍ଦ୍ୱୀ ପାକିସ୍ତାନକୁ ୨–୧ ଗୋଲ୍‌ରେ ପରାସ୍ତ କରିଛି ଟିମ୍ ଇଣ୍ଡିଆ। ଢାକାରେ ଅନୁଷ୍ଠିତ ସାଫ୍ ଚାମ୍ପିୟନସିପ୍ ଫାଇନାଲ୍‌ରେ ଏହି ବିଜୟ ସହ ଦଶମ ଥର ପାଇଁ ଟ୍ରଫି ହାତେଇଛି ଭାରତ। ଏଥିସହ କ୍ରମାଗତ ତୃତୀୟ ଥର ଚାମ୍ପିୟନ୍ ହୋଇ ଟାଇଟଲ୍ ଜିତିବାରେ ହ୍ୟାଟ୍ରିକ୍ ଅର୍ଜନ କରିଛି ଦଳ। ବିଶେଷ କଥା ହେଉଛି, ଦ୍ୱିତୀୟ ଧାଡ଼ିର ଖେଳାଳିଙ୍କୁ ନେଇ ପଡ଼ିଆକୁ ଓହ୍ଲାଇଥିବା ଭାରତ ଏହି ବଡ଼ ସଫଳତା ହାସଲ କରିଛି।

ମ୍ୟାଚ୍‌ର ପ୍ରଥମାର୍ଦ୍ଧରେ ପାକିସ୍ତାନ ଦଳର ପ୍ରଦର୍ଶନ ଅଧିକ ପ୍ରଭାବଶାଳୀ ରହିଥିଲା। ଆରମ୍ଭରୁ ଆକ୍ରମଣାତ୍ମକ ଖେଳି ଭାରତୀୟ ରକ୍ଷଣଭାଗ ଉପରେ ଚାପ ପକାଇଥିଲା ପାକିସ୍ତାନ। ପ୍ରଥମ ୩୦ ମିନିଟ୍‌ରେ ଦଳ ୯ଟି ସଟ୍ ମାରିଥିବା ବେଳେ ଭାରତ ମାତ୍ର ୨ଟି ସଟ୍ ଖେଳିଥିଲା। ୩୫ତମ ମିନିଟ୍ ପରେ ଭାରତ କିଛି ସୁଯୋଗ ସୃଷ୍ଟି କରିଥିଲେ ମଧ୍ୟ ଗୋଲ୍ କରିପାରିନଥିଲା।

ଶେଷରେ ପ୍ରଥମାର୍ଦ୍ଧର ଇଞ୍ଜୁରି ଟାଇମ୍‌ରେ ଭାରତକୁ ଝଟକା ଦେଇଥିଲା ପାକିସ୍ତାନ। ୪୫+୧ ମିନିଟ୍‌ରେ ଆଲମଗୀର ଗାଜି ଏକ ଚମତ୍କାର ରାଇଟ୍ ଫୁଟ୍ ସଟ୍ ଜରିଆରେ ଗୋଲ୍ କରି ଦଳକୁ ୧–୦ରେ ଆଗୁଆ କରିଥିଲେ। ଜୁନୈଦ ଶାହଙ୍କ କ୍ରସ୍ ଡିଫ୍ଲେକ୍ଟ ହୋଇ ଗାଜିଙ୍କ ପାଖରେ ପହଞ୍ଚିବା ପରେ ସେ ବଲ୍‌କୁ ସିଧା ଗୋଲ୍‌ପୋଷ୍ଟର ଦୂର କୋଣକୁ ପଠାଇ ଦେଇଥିଲେ।

ତେବେ ଦ୍ୱିତୀୟାର୍ଦ୍ଧରେ ଭାରତର ଖେଳରେ ବଡ଼ ପରିବର୍ତ୍ତନ ଦେଖିବାକୁ ମିଳିଥିଲା। ଗୋଲ୍ ପରିଶୋଧ କରିବାକୁ ଦଳ ଲଗାତାର ଆକ୍ରମଣ କରିଥିଲା। ୫୯ତମ ମିନିଟ୍‌ରେ ମ୍ୟାଚ୍‌ର ମୋଡ଼ ବଦଳିଯାଇଥିଲା। ଭାରତୀୟ ଖେଳାଳି ବ୍ରିସନ୍ ଫର୍ଣ୍ଣାଣ୍ଡିଜ୍‌ଙ୍କୁ ବିପଜ୍ଜନକ ଟ୍ୟାକଲ୍ କରିବାରୁ ପାକିସ୍ତାନର ଜୁନୈଦ ଶାହଙ୍କୁ ରେଫରି ସିଧାସଳଖ ରେଡ୍ କାର୍ଡ ଦେଖାଇଥିଲେ। ଫଳରେ ବାକି ମ୍ୟାଚ୍‌ରେ ୧୦ ଜଣ ଖେଳାଳିଙ୍କୁ ନେଇ ଖେଳିଥିଲା ପାକିସ୍ତାନ।

ଏହି ସୁଯୋଗର ଫାଇଦା ଉଠାଇବାକୁ ବିଳମ୍ବ କରିନଥିଲା ଭାରତ। ରେଡ୍ କାର୍ଡର ଠିକ୍ ପର ମିନିଟ୍‌ରେ ଅର୍ଥାତ୍ ୬୦ତମ ମିନିଟ୍‌ରେ ସୁହେଲ ଅହମ୍ମଦ ଭଟ୍ଟ ଗୋଲ୍ କରି ସ୍କୋର୍‌କୁ ୧–୧ କରିଥିଲେ। ଲ୍ହୁଙ୍ଗଡିମ୍ ଖୈମିନଥାଙ୍ଗଙ୍କ ଫ୍ରି–କିକ୍ ଓ ମ୍ୟାକାର୍ଟନ୍ ନିକ୍ସନ୍‌ଙ୍କ ଟଚ୍ ପରେ ବଲ୍ ସୁହେଲଙ୍କ ପାଖରେ ପହଞ୍ଚିଥିଲା। ସେ ଏହାକୁ ଗୋଲ୍‌ପୋଷ୍ଟ ଭିତରକୁ ପଠାଇ ଭାରତକୁ ସମାନ ସ୍ଥିତିକୁ ଫେରାଇ ଆଣିଥିଲେ।

ଗୋଲ୍ ବରାବର ହେବା ପରେ ମଧ୍ୟ ଭାରତର ଆକ୍ରମଣ ଜାରି ରହିଥିଲା। ୬୪ତମ ମିନିଟ୍‌ରେ ପାକିସ୍ତାନ ଦଳ ପକ୍ଷରୁ ଆଲମଗୀର ଗାଜି ଓ ଅବଦୁଲ୍ଲା ଇକବାଲଙ୍କୁ ପରିବର୍ତ୍ତନ କରାଯାଇଥିଲେ ମଧ୍ୟ ଭାରତୀୟ ଖେଳାଳିଙ୍କ ଚାପ କମିନଥିଲା। ଶେଷରେ ୮୮ତମ ମିନିଟ୍‌ରେ ସନ୍ଦୀପ ମାଣ୍ଡି ହେଡର୍ ଜରିଆରେ ଦ୍ୱିତୀୟ ଗୋଲ୍ କରି ଭାରତକୁ ୨–୧ରେ ଆଗୁଆ କରିଥିଲେ। ଏହି ଗୋଲ୍ ହିଁ ଭାରତର ବିଜୟ ନିଶ୍ଚିତ କରିଥିଲା।

ଏହି ବିଜୟ ସହ ସାଫ୍ ଚାମ୍ପିୟନସିପ୍‌ରେ ଭାରତ ନିଜର ଦଶମ ଟାଇଟଲ୍ ହାସଲ କରିଛି। ଏହା ପୂର୍ବରୁ ଦଳ ୧୯୯୩, ୧୯୯୭, ୧୯୯୯, ୨୦୦୫, ୨୦୦୯, ୨୦୧୧, ୨୦୧୫, ୨୦୨୧ ଓ ୨୦୨୩ରେ ଚାମ୍ପିୟନ୍ ହୋଇଥିଲା। ଏଥର ମଧ୍ୟ ଟ୍ରଫି ଜିତି ଲଗାତାର ତିନିଟି ସଂସ୍କରଣରେ ଚାମ୍ପିୟନ୍ ହେବାର ଗୌରବ ହାସଲ କରିଛି ଟିମ୍ ଇଣ୍ଡିଆ।