ବାତ୍ୟା ‘ଆକଭାନ୍’ ମୁକାବିଲା ପ୍ରସ୍ତୁତିର ସମୀକ୍ଷା କଲେ ମନ୍ତ୍ରୀ ସୁରେଶ ପୂଜାରୀ

୩ଟି ଜିଲ୍ଲା ପାଇଁ ୬.୫ କୋଟି ଟଙ୍କା ମଞ୍ଜୁର

ଭୁବନେଶ୍ୱର: ରାଜସ୍ୱ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ ସମ୍ଭାବ୍ୟ ବାତ୍ୟା ମୁକାବିଲା ଏବଂ ଜନସାଧାରଣଙ୍କ ସୁରକ୍ଷା ପାଇଁ ରାଜ୍ୟର ପ୍ରସ୍ତୁତି ସମ୍ପର୍କରେ ସମୀକ୍ଷା କରିଛନ୍ତି। ରାଜ୍ୟ ଜରୁରୀକାଳୀନ ପରିଚାଳନା କେନ୍ଦ୍ର (SEOC) ଠାରେ ଅନୁଷ୍ଠିତ ଏହି ଉଚ୍ଚସ୍ତରୀୟ ବୈଠକରେ ସମ୍ଭାବ୍ୟ ପାଣିପାଗ ସ୍ଥିତି, ଜିଲ୍ଲାସ୍ତରୀୟ ପ୍ରସ୍ତୁତି ତଥା ଉଦ୍ଧାର ଓ ରିଲିଫ୍ ବ୍ୟବସ୍ଥା ଉପରେ ଆଲୋଚନା କରାଯାଇଛି।

ଜନସାଧାରଣଙ୍କ ଜୀବନ ରକ୍ଷାକୁ ସର୍ବାଧିକ ପ୍ରାଥମିକତା ଦେଇ ସମନ୍ୱିତ ଓ ସତର୍କତାମୂଳକ ପଦକ୍ଷେପ ଗ୍ରହଣ କରିବାକୁ ମନ୍ତ୍ରୀ ସମସ୍ତ ବିଭାଗକୁ ନିର୍ଦ୍ଦେଶ ଦେଇଛନ୍ତି।

ମୁଖ୍ୟ ନିଷ୍ପତ୍ତି ଓ ପ୍ରସ୍ତୁତି:

ପ୍ରସ୍ତୁତି, ଲୋକଙ୍କୁ ସ୍ଥାନାନ୍ତର ଏବଂ ଜରୁରୀକାଳୀନ ବ୍ୟବସ୍ଥା ପାଇଁ ଜିଲ୍ଲାପାଳମାନଙ୍କୁ ୬.୫ କୋଟି ଟଙ୍କା ମଞ୍ଜୁର କରାଯାଇଛି। ଆସନ୍ତା ବାତ୍ୟା ‘ଆକଭାନ୍’ (AKVAN) ର ସମ୍ଭାବ୍ୟ ପ୍ରଭାବକୁ ଦୃଷ୍ଟିରେ ରଖି, ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରିବା ଏବଂ ବାତ୍ୟା ମୁକାବିଲା ପାଇଁ ଗଞ୍ଜାମ ଜିଲ୍ଲାପାଳଙ୍କୁ ୫ କୋଟି ଟଙ୍କା, ଗଜପତି ଜିଲ୍ଲାପାଳଙ୍କୁ ୧ କୋଟି ଟଙ୍କା ଏବଂ ମାଲକାନଗିରି ଜିଲ୍ଲାପାଳଙ୍କୁ ୫୦ ଲକ୍ଷ ଟଙ୍କା ପ୍ରଦାନ କରାଯାଇଛି।

ଭାରତୀୟ ତଟରକ୍ଷା ବାହିନୀ (Indian Coast Guard) ସହ ସମନ୍ୱୟ: ପାରାଦୀପ ସ୍ଥିତ କୋଷ୍ଟ ଗାର୍ଡ ଏୟାର ଏନକ୍ଲେଭ୍, ଡିଏଚ୍‌କ୍ୟୁ-୭ (DHQ-7) ଏବଂ ଗୋପାଳପୁର ଷ୍ଟେସନକୁ ସତର୍କ ରହିବାକୁ ଅନୁରୋଧ କରାଯାଇଛି। ଉଦ୍ଧାର କାର୍ଯ୍ୟ ପାଇଁ ବିମାନ, ଜାହାଜ, ଡଙ୍ଗା ଏବଂ ଯୋଗାଯୋଗ ବ୍ୟବସ୍ଥାକୁ ପ୍ରସ୍ତୁତ ରଖାଯାଇଛି। ସମୁଦ୍ରରେ ଥିବା ମତ୍ସ୍ୟଜୀବୀମାନଙ୍କୁ ସତର୍କ କରାଯାଇଛି, ଉପକୂଳବର୍ତ୍ତୀ ଜିଲ୍ଲା ପ୍ରଶାସନ ଓ ସାମୁଦ୍ରିକ ପୋଲିସ (Marine Police) ସହ ସମନ୍ୱୟ ସ୍ଥାପନ କରାଯାଇଛି ଏବଂ ନୋଡାଲ ଅଧିକାରୀମାନଙ୍କର ୨୪ ଘଣ୍ଟିଆ ଯୋଗାଯୋଗ ବିବରଣୀ SEOC କୁ ପ୍ରଦାନ କରାଯାଇଛି।

ଜିଲ୍ଲା ସ୍ତରୀୟ ସ୍ଥାନାନ୍ତରଣ ଯୋଜନା: କୌଣସି ପ୍ରକାରର ଜୀବନହାନିକୁ ଏଡ଼ାଇବା ପାଇଁ, ପୁରୀ, ଗଞ୍ଜାମ, ଗଜପତି, ରାୟଗଡ଼ା, କନ୍ଧମାଳ, ନବରଙ୍ଗପୁର, ବରଗଡ଼, ଝାରସୁଗୁଡ଼ା, ସୁନ୍ଦରଗଡ଼, କୋରାପୁଟ ଏବଂ ମାଲକାନଗିରି ଜିଲ୍ଲାର ଜିଲ୍ଲାପାଳମାନଙ୍କୁ ବ୍ଲକ ଓ ସହରାଞ୍ଚଳ ସ୍ଥାନୀୟ ସଂସ୍ଥା (ULB) ଭିତ୍ତିକ ସ୍ଥାନାନ୍ତରଣ ଯୋଜନା ତୁରନ୍ତ ରାଜ୍ୟ ଜରୁରୀକାଳୀନ ପରିଚାଳନା କେନ୍ଦ୍ର (SEOC) ରେ ଦାଖଲ କରିବାକୁ ନିର୍ଦ୍ଦେଶ ଦିଆଯାଇଛି। ଏହି ଯୋଜନାରେ ବିପଦପୂର୍ଣ୍ଣ ଗ୍ରାମ/ୱାର୍ଡଗୁଡ଼ିକର ଚିହ୍ନଟ; ଶିଶୁ, ବରିଷ୍ଠ ନାଗରିକ, ଗର୍ଭବତୀ ମହିଳା ଏବଂ ଭିନ୍ନକ୍ଷମ ବ୍ୟକ୍ତିଙ୍କ ତାଲିକା; ବାତ୍ୟା ଆଶ୍ରୟସ୍ଥଳୀର କ୍ଷମତା; ବିକଳ୍ପ ପରିବହନ ମାର୍ଗ; ଖାଦ୍ୟ, ପାନୀୟ ଜଳ, ପରିମଳ ଓ ଆଲୋକ ବ୍ୟବସ୍ଥା; ଏବଂ ଆଶ୍ରୟସ୍ଥଳୀ ସ୍ତରରେ ନିୟୋଜିତ ନୋଡାଲ ଅଧିକାରୀଙ୍କ ବିବରଣୀ ଅନ୍ତର୍ଭୁକ୍ତ ରହିବ।

ରେଳ ସମନ୍ୱୟ: ରେଳ ଯାତ୍ରୀଙ୍କ ସୁରକ୍ଷା ଏବଂ ଜରୁରୀକାଳୀନ ସାମଗ୍ରୀ ପରିବହନ ନିମନ୍ତେ ‘ରାଜ୍ୟ ରେଳ ସମନ୍ୱୟ ସେଲ୍’ (State Rail Coordination Cell) କୁ ପୂର୍ବତଟ ରେଳବାଇ (East Coast Railway) ସହିତ ନିରନ୍ତର ଯୋଗାଯୋଗ ରଖିବାକୁ ନିର୍ଦ୍ଦେଶ ଦିଆଯାଇଛି। ବିପଦପୂର୍ଣ୍ଣ ରେଳ ଟ୍ରାକ୍, ପୋଲ ଏବଂ ଭୂସ୍ଖଳନ ପ୍ରବଣ ଅଞ୍ଚଳଗୁଡ଼ିକର ଯାଞ୍ଚ ଉପରେ ଗୁରୁତ୍ୱ ଦିଆଯାଇଛି। ଆବଶ୍ୟକ ପଡ଼ିଲେ ଟ୍ରେନ୍ ଚଳାଚଳକୁ ନିୟନ୍ତ୍ରଣ କିମ୍ବା ବାତିଲ କରିବା; ଷ୍ଟେସନରେ ଅଟକି ରହିଥିବା ଯାତ୍ରୀଙ୍କ ପାଇଁ ପାନୀୟ ଜଳ, ଚିକିତ୍ସା ସୁବିଧା ଓ ବିକଳ୍ପ ବିଦ୍ୟୁତ୍ ଯୋଗାଣର ବ୍ୟବସ୍ଥା କରିବା; ଏବଂ ୨୪ ଘଣ୍ଟିଆ ନୋଡାଲ ଅଧିକାରୀ ନିଯୁକ୍ତ କରିବା ଉପରେ ଧ୍ୟାନ ଦିଆଯାଇଛି।

ORSAC ଦ୍ୱାରା ଭୂସ୍ଖଳନ ପ୍ରବଣ ଅଞ୍ଚଳ ଚିହ୍ନଟ: ଭୂସ୍ଖଳନ ପ୍ରବଣ ଅଞ୍ଚଳଗୁଡ଼ିକୁ ଚିହ୍ନଟ କରିବା ପାଇଁ, ଉପଗ୍ରହ ଚିତ୍ର (satellite images) ଏବଂ GIS ଭିତ୍ତିକ ତଥ୍ୟର ବିଶ୍ଳେଷଣ କରି ଆବଶ୍ୟକ ସୂଚନା ପ୍ରଦାନ କରିବାକୁ ଓଡ଼ିଶା ସ୍ପେସ୍ ଆପ୍ଲିକେସନ୍ ସେଣ୍ଟର (ORSAC) ର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀଙ୍କୁ ଅନୁରୋଧ କରାଯାଇଛି।

ଏହି ସୂଚନା ଗଜପତି, ଗଞ୍ଜାମ, ରାୟଗଡ଼ା, କନ୍ଧମାଳ, ମାଲକାନଗିରି ଏବଂ କୋରାପୁଟର ଜିଲ୍ଲାପାଳମାନଙ୍କ ସହ ତୁରନ୍ତ ଅଂଶୀଦାର କରାଯିବ, ଯାହାଦ୍ୱାରା ଭୂସ୍ଖଳନ ପ୍ରବଣ ଅଞ୍ଚଳରେ ରହୁଥିବା ଅସୁରକ୍ଷିତ ବ୍ୟକ୍ତିମାନଙ୍କୁ ଆଗୁଆ ଚିହ୍ନଟ କରାଯାଇ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇପାରିବ।

ବୈଠକରେ ଗୁରୁତ୍ୱ ଦିଆଗଲା ଯେ, ସମସ୍ତ ବିଭାଗ ଏବଂ ଜିଲ୍ଲା ପ୍ରଶାସନ ନିର୍ଦ୍ଧାରିତ ସମୟସୀମା ମଧ୍ୟରେ ପ୍ରସ୍ତୁତି ସମ୍ପୂର୍ଣ୍ଣ କରନ୍ତୁ, ନିଜ ନିଜ ବିଭାଗ ପାଇଁ ନୋଡାଲ୍ ଅଧିକାରୀ ନିଯୁକ୍ତ କରନ୍ତୁ ଏବଂ କୌଣସି ଜରୁରୀ ଆବଶ୍ୟକତା କିମ୍ବା ଅଭାବ ଉପୁଜିଲେ ତୁରନ୍ତ ରାଜ୍ୟ ବିପର୍ଯ୍ୟୟ ପରିଚାଳନା କେନ୍ଦ୍ରକୁ ଅବଗତ କରାନ୍ତୁ।