ଦିଲ୍ଲୀ ପୋଲିସ ସହ ମମତା ବାନାର୍ଜୀଙ୍କ ମୁହାଁମୁହିଁ, “ରେଡ୍ କାର୍ପେଟ୍ ପରିବର୍ତ୍ତେ ବ୍ଲାକ୍ କାର୍ପେଟ୍ କାହିଁକି?”
ନୂଆଦିଲ୍ଲୀ: ଦିଲ୍ଲୀ ସ୍ଥିତ ବଙ୍ଗ ଭବନ ବାହାରେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଓ ଦିଲ୍ଲୀ ପୋଲିସ ମଧ୍ୟରେ ମୁହାଁମୁହିଁ ପରିସ୍ଥିତି ସୃଷ୍ଟି ହୋଇଛି। ଏସଆଇଆର (SIR) ପ୍ରସଙ୍ଗରେ ମୁଖ୍ୟ ନିର୍ବାଚନ କମିଶନଙ୍କୁ ସାକ୍ଷାତ କରିବା ପାଇଁ ମମତା ଚାହୁଁଥିବା ବେଳେ, ବଙ୍ଗ ଭବନ ଚାରିପାଖରେ ମାତ୍ରାଧିକ ଦିଲ୍ଲୀ ପୋଲିସ ମୁତୟନକୁ ନେଇ ସେ ଅସନ୍ତୋଷ ପ୍ରକାଶ କରିଥିଲେ। ମମତା ବାନାର୍ଜୀ କହିଥିଲେ, “ମୁଁ କୌଣସି ଧାରଣା କିମ୍ବା ପ୍ରତିବାଦକୁ ଆସିନି। ତେବେ ଏତେ ଅତ୍ୟାଚାର କାହିଁକି?” ସେ ପ୍ରଶ୍ନ କରିଥିଲେ ଯେ, କେନ୍ଦ୍ର ଗୃହମନ୍ତ୍ରୀ ପଶ୍ଚିମବଙ୍ଗ ଯାଇଲେ ରାଜ୍ୟ ସରକାର ତାଙ୍କୁ ରେଡ୍ କାର୍ପେଟ୍ରେ ସ୍ୱାଗତ କରେ, କିନ୍ତୁ ବଙ୍ଗର ଲୋକମାନେ କିମ୍ବା ଜନପ୍ରତିନିଧିମାନେ ଦିଲ୍ଲୀ ଆସିଲେ ସେମାନଙ୍କ ପାଇଁ “ବ୍ଲାକ୍ କାର୍ପେଟ୍” ବ୍ୟବହାର କାହିଁକି କରାଯାଉଛି।
ମମତା ଅଭିଯୋଗ କରିଛନ୍ତି ଯେ ପଶ୍ଚିମବଙ୍ଗକୁ ଜାଣିଶୁଣି ବଦନାମ କରାଯାଉଛି ଏବଂ କେନ୍ଦ୍ରୀୟ ଏଜେନ୍ସିଗୁଡ଼ିକ ବିଜେପିର ଇଙ୍ଗିତରେ କାମ କରୁଛନ୍ତି। ସେ ଏହାକୁ ଅପମାନଜନକ ଏବଂ ପକ୍ଷପାତୀ ବ୍ୟବହାର ବୋଲି ଆଖ୍ୟା ଦେଇଛନ୍ତି। ମୁଖ୍ୟମନ୍ତ୍ରୀ ଦିଲ୍ଲୀ ପୋଲିସ ଉପରେ ବଙ୍ଗଳାର ଲୋକଙ୍କୁ ହଇରାଣ କରିବା ଏବଂ ଅତ୍ୟାଚାର କରିବା ଅଭିଯୋଗ ମଧ୍ୟ କରିଥିଲେ। ସେ କହିଥିଲେ ଯେ ପୋଲିସ ସଂଯମତା ଅବଲମ୍ବନ କରିବା ଉଚିତ ଏବଂ ନିର୍ଦ୍ଦୋଷ ଲୋକଙ୍କୁ ଟାର୍ଗେଟ କରିବା ବନ୍ଦ କରିବା ଦରକାର। ମମତା ବାନାର୍ଜୀ ଆହୁରି କହିଛନ୍ତି ଯେ ଦିଲ୍ଲୀ ପୋଲିସ ଓ ଦେଶର ଅନ୍ୟାନ୍ୟ ତଦନ୍ତକାରୀ ସଂସ୍ଥାଗୁଡ଼ିକ ନିରପେକ୍ଷ ଭାବରେ କାମ କରୁନାହାଁନ୍ତି, ବରଂ ସେମାନଙ୍କୁ ରାଜନୈତିକ ଉପକରଣ ଭାବରେ ବ୍ୟବହାର କରାଯାଉଛି। ଏହି ପରିସ୍ଥିତି ଗଣତନ୍ତ୍ର ପାଇଁ ବିପଦଜନକ ବୋଲି ସେ ମତ ପ୍ରକାଶ କରିଛନ୍ତି।