ନୂଆଦିଲ୍ଲୀ: ଋଷର ୟୁକ୍ରେନ ଉପରେ ଆକ୍ରମଣ ଯୋଗୁ ୟୁରୋପୀୟ ଦେଶ ଗୁଡିକ ଋଷିଆ ଉପରେ କଡା କଟକଣା ଜାରି କରିଛନ୍ତି । ଅନ୍ୟପକ୍ଷେ ଋଷିଆ ରିହାତି ମୂଲ୍ୟରେ ଅଶୋଧିତ ତୈଳ ଓ ଗ୍ୟାସ ଭାରତକୁ ଯୋଗାଇ ଦେବାକୁ ପ୍ରସ୍ତାବ ଦେଇଛି । ତେବେ ଭାରତ ସରକାର ଏହି ପ୍ରସ୍ତାବ ଉପରେ ଗୁରୁତର ସହ ଚିନ୍ତା କରୁଛନ୍ତି ବୋଲି ବୈଦେଶିକ ମନ୍ତ୍ରାଳୟ ତରଫରୁ ସୂଚନା ମିଳିଛି ।
ବୈଦେଶିକ ମନ୍ତ୍ରାଳୟର ମୁଖପାତ୍ର ଅରିନ୍ଦମ ବାଗ୍ଚୀ ଏକ ଗଣମାଧ୍ୟମ ଆଲୋଚନାରେ ଏଥିପାଇଁ ବିକଳ୍ପ ମାର୍ଗ ଖୋଲିଥିବାର କହିଛନ୍ତି । ସେ କହିଛନ୍ତି ଅଶୋଧିତ ତୈଳ ଓ ଗ୍ୟାସ ଆମଦାନୀରେ ଭାରତ ଏକ ନିର୍ଭରଶୀଳ ଦେଶ । ଏଣୁ ନିଜର ଆବଶ୍ୟକତା ପୂରଣ ପାଇଁ ବିଭିନ୍ନ ବିକଳ୍ପ ଉପାୟ ଖୋଜା ଯାଇଥାଏ ଏବଂ ୟୁରୋପୀୟ ଦେଶମାନଙ୍କ ଭଳି ଭାରତ ଋଷିଆରୁ ଅଶୋଧିତ ତୈଳ ଓ ଗ୍ୟାସ ଆମଦାନୀ କରିଥାଏ । ମାତ୍ର ଋଷିଆ ଏ କ୍ଷେତ୍ରରେ ଭାରତର ମୁଖ୍ୟ ସ୍ରୋତ ନୁହେଁ ବୋଲି ବାଗ୍ଚୀ ସ୍ପଷ୍ଟ କରିଛନ୍ତି ।
ୟୁକ୍ରେନ ଉପରେ ଆକ୍ରମଣ ଲାଗି ଆମେରିକା ସମେତ ସହଯୋଗୀ ଦେଶମାନେ ଋଷିଆ ବିରୋଧରେ ପ୍ରତିବନ୍ଧକ ଲଗାଇଛନ୍ତି । ଏହାର ମୁକାବିଲା ଲାଗି ଋଷିଆ ନିଜର ତୈଳ ଓ ଗ୍ୟାସ ରପ୍ତାନୀ ବୃଦ୍ଧି କରିବାକୁ ଚେଷ୍ଟା କରୁଛି । ଏହି କାରଣରୁ ଋଷିଆ ରିହାତି ମୂଲ୍ୟରେ ଅଶୋଧିତ ତୈଳ ଓ ଗ୍ୟାସ ଭାରତକୁ ରପ୍ତାନୀ ଲାଗି ପ୍ରସ୍ତାବ ଦେଇଥିବା କଥା ଚର୍ଚ୍ଚା ହେଉଛି । ଏହି ଆମଦାନୀରେ ଆମେରିକା ମୁଖ୍ୟ ପ୍ରତିବନ୍ଧକ ଭାବରେ ଉଭା ହୋଇଥିବା ଜଣାପଡିଛି ।
କଟକଣା ଅନୁସାରେ ନାଟୋ ଦେଶମାନେ ଋଷିଆ ସହିତ ଡଲାର ଆଧାରିତ ନେଣଦେଣକୁ ନିଷିଦ୍ଧ କରିଛନ୍ତି । ଏଣୁ ଋଷିଆ ସହିତ ବ୍ୟାପାର କରିବାରେ ଦେଶମାନଙ୍କୁ ସମସ୍ୟା ହେଉଛି । ବୈଦେଶିକ ମନ୍ତ୍ରାଳୟ ମୁଖପାତ୍ର କହିଛନ୍ତି ଏପରି କିଛି ପଦକ୍ଷେପ ନିଆଗଲେ ଭାରତକୁ ଅନ୍ୟ କୌଣସି ବୈଦେଶିକ ମୁଦ୍ରାର ସହାୟତା ନେବାକୁ ପଡିବ ନାହିଁ କାରଣ ଭାରତୀୟ ଟଙ୍କା ଓ ଋଷ ମୁଦ୍ରା ରୁବେଲର ବିନିମୟକୁ ଦୀର୍ଘ ବର୍ଷରୁ ସ୍ୱୀକୃତି ମିଳିଛି। ଏହି ବିନିମୟ ପ୍ରକ୍ରିୟା ସୋଭିଏତ୍ ସଂଘ ସମୟରୁ ଆରମ୍ଭ ହୋଇଥିଲା । ପରିସ୍ଥିତି ଅନୁରୂପ ଥିବାରୁ ଏହି ପ୍ରକ୍ରିୟାକୁ ପୁଣି ଆରମ୍ଭ କରାଯାଇପାରେ । ତେବେ ଋଷିଆର ଏହି ପ୍ରସ୍ତାବ ଯଦି ଭାରତ ପାଇଁ ବ୍ୟବସାୟ ଉପଯୁକ୍ତ ମନେ ହୁଏ ତେବେ ସରକାର ଏ ଦିଗରେ ନିଶ୍ଚିତ ପଦକ୍ଷେପ ନେବେ ବୋଲି ବୈଦେଶିକ ମନ୍ତ୍ରାଳୟ ମୁଖପାତ୍ର ସୂଚନା ଦେଇଛନ୍ତି ।