ପଶ୍ଚିମବଙ୍ଗ ରାଜନୀତିରେ ଏବେ ତୃଣମୂଳ କଂଗ୍ରେସ ଭିତରର ଲଢ଼େଇ ସବୁଠୁ ବଡ଼ ଚର୍ଚ୍ଚାର ବିଷୟ ପାଲଟିଛି। ମଙ୍ଗଳବାର ଦିନ ମମତା ବାନାର୍ଜୀଙ୍କ ନେତୃତ୍ୱାଧୀନ ଶିବିର ବିଦ୍ରୋହୀ ନେତାଙ୍କ ବିରୋଧରେ କଠୋର ଆଭିମୁଖ୍ୟ ଆପଣାଇ ପୂର୍ବତନ ମନ୍ତ୍ରୀ ତଥା କୋଲକାତାର ପୂର୍ବତନ ମେୟର ଫିରହାଦ ହାକିମଙ୍କ ସମେତ ୮ ଜଣ ବରିଷ୍ଠ ନେତାଙ୍କୁ ଦଳରୁ ବହିଷ୍କାର କରିଛି। ଦଳ ପକ୍ଷରୁ ଜାରି ବିବୃତ୍ତିରେ କୁହାଯାଇଛି ଯେ ଏହି ନେତାମାନେ “ଜାଣିଶୁଣି ଦଳ ବିରୋଧୀ କାର୍ଯ୍ୟକଳାପ”ରେ ସାମିଲ ହୋଇଥିଲେ ଏବଂ ଦଳର ଏକତାକୁ କ୍ଷତି ପହଞ୍ଚାଇବାକୁ ଚେଷ୍ଟା କରିଥିଲେ। ବହିଷ୍କୃତ ନେତାଙ୍କ ମଧ୍ୟରେ ଜାଭେଦ ଅହମ୍ମଦ ଖାନ, ଅରୂପ ରାୟ, ଅରୂପ ବିଶ୍ୱାସ, ରଥୀନ ଘୋଷ, ବିପ୍ଳବ ମିତ୍ର, ସବିନା ୟାସମିନ ଏବଂ ସ୍ନେହାଶିଷ ଚକ୍ରବର୍ତ୍ତୀ ଅଛନ୍ତି।
ଏହି ଘଟଣାର ଗୋଟିଏ ଦିନ ପୂର୍ବରୁ ବିଦ୍ରୋହୀ ଗୋଷ୍ଠୀ ଏକ ସ୍ୱତନ୍ତ୍ର ଅଧିବେଶନ ଡାକି ମମତା ବାନାର୍ଜୀଙ୍କୁ ଦଳର ସଭାପତି ପଦରୁ ହଟାଇବା ସହ ଅରୂପ ରାୟଙ୍କୁ ନୂଆ ସଭାପତି ଭାବେ ଘୋଷଣା କରିଥିଲେ। ଏହା ସହିତ ୩୦ ଜଣିଆ ଜାତୀୟ କାର୍ଯ୍ୟକାରୀ କମିଟି ମଧ୍ୟ ଗଠନ କରାଯାଇଥିଲା। ଫିରହାଦ ହାକିମ ଓ ଅରୂପ ବିଶ୍ୱାସଙ୍କୁ ଉପସଭାପତି ଭାବେ ଦାୟିତ୍ୱ ଦିଆଯାଇଥିଲା। ବିଦ୍ରୋହୀ ଶିବିରର ନେତା ରୀତାବ୍ରତ ବାନାର୍ଜୀ ଦାବି କରିଛନ୍ତି ଯେ ଦଳର ବହୁ ସଂଖ୍ୟକ ବିଧାୟକ ଓ ନେତା ସେମାନଙ୍କ ସହ ଅଛନ୍ତି। ସେମାନଙ୍କ କହିବା ଅନୁଯାୟୀ, ଦଳର ୮୦ ବିଧାୟକଙ୍କ ମଧ୍ୟରୁ ପ୍ରାୟ ୬୦ ଜଣଙ୍କ ସମର୍ଥନ ସେମାନଙ୍କୁ ମିଳିଛି। ଏହି ଦାବି ସତ୍ୟ ହେଲେ ଟିଏମସି ପାଇଁ ଏହା ଏକ ବଡ଼ ରାଜନୈତିକ ସଙ୍କଟ ହୋଇପାରେ।
ଅନ୍ୟପଟେ ମମତା ବାନାର୍ଜୀଙ୍କ ଶିବିର ଏହି ବିଦ୍ରୋହକୁ ଦଳ ଭାଙ୍ଗିବାର ଷଡଯନ୍ତ୍ର ବୋଲି କହିଛି। ବହିଷ୍କାର ମାଧ୍ୟମରେ ଦଳ ସ୍ପଷ୍ଟ ସନ୍ଦେଶ ଦେଇଛି ଯେ ଦଳୀୟ ଶୃଙ୍ଖଳା ଭଙ୍ଗ କରୁଥିବା କାହାକୁ ବି ଛାଡ଼ ଦିଆଯିବ ନାହିଁ।
ତେବେ ୧୯୯୮ ମସିହାରେ ମମତା ବାନାର୍ଜୀ ଗଠନ କରିଥିବା ତୃଣମୂଳ କଂଗ୍ରେସ ଏବେ ତାହାର ସବୁଠୁ ବଡ଼ ଆଭ୍ୟନ୍ତରୀଣ ସଙ୍କଟ ଦେଇ ଗତି କରୁଛି। ଆଗାମୀ ଦିନରେ ଏହି ବିଦ୍ରୋହ ଦଳକୁ କେତେ ପ୍ରଭାବିତ କରିବ ଏବଂ ମମତା ବାନାର୍ଜୀ ଏହାକୁ କିପରି ମୁକାବିଲା କରିବେ, ତାହା ଉପରେ ସମସ୍ତଙ୍କ ନଜର ରହିଛି।