ଭୁବନେଶ୍ୱର : ଦୁର୍ଗାପୂଜାରେ ନୂଆପଲ୍ଲୀ ନୂଆସାହିରେ ସଙ୍କଟମୋଚନ ମହାବୀରଙ୍କୁ ଆରାଧନା କରାଯିବ । ମାହାବୀରଙ୍କ ଏହି ଭବ୍ୟ ପୂଜାରେ ରହିଛି ନିଆରା କାହାଣୀ । ଏଠାରେ ଉଭୟ ନର ଓ ବାନର ଏକାଠି ସାମିଲ ହୁଅନ୍ତି । ପ୍ରତି ବର୍ଷ ସପ୍ତମୀ ଦିନ ମହାବୀରଙ୍କ ପୂଜା ଆରମ୍ଭ ହେବା ବେଳକୁ କେଉଁ ଆଡୁ ଅଚାନକ ବହୁ ବନାର ଦଳ ଆସି ଯାଆନ୍ତି । ମନ୍ଦିର ପାଚେରୀରେ ବସି ପୂଜା ଆରମ୍ଭଠୁ ଭୋଗ ପର୍ଯ୍ୟନ୍ତ ଚାହିଁ ରହିଥାନ୍ତି । ପୁଣି ପୂଜା ପରେ ଭୋଗ ଖାଇ ଚାଲିଯାଆନ୍ତି । ଏମିତି ପ୍ରତି ବର୍ଷ ଏଠାରେ ପ୍ରଭୁଙ୍କ ମହାତ୍ମ୍ୟ ରହିଛି । ତେବେ ଏ ବର୍ଷ ମଧ୍ୟ ବାନର ଦଳ ପୂଜାରେ ସାମିଲ ହେବେ ବୋଲି ମଣ୍ଡପ ସଦସ୍ୟ ଆଶା ରଖିଛନ୍ତି ।
ନୂଆପଲ୍ଲୀ ନୂଆସାହି ମହାବୀର ପୂଜା କମିଟିର ପୂଜା ୧୩ ବର୍ଷରେ ପହଞ୍ଚିଛି । ଏ ବର୍ଷର ମୂଖ୍ୟ ଆକର୍ଷଣ ସାଜିବ ଆଲୋକିକରଣ । ଏଚଡିଏଫ୍ସି ବ୍ୟାଙ୍କ ପାଖରୁ ନୂଆସାହି ଆଖଣ୍ଡଳମଣୀ ମନ୍ଦିର ପର୍ଯ୍ୟନ୍ତ ଦୁଇ ପାଶ୍ୱର୍ରେ ଆଲୋକରେ ଝଲସିବ ପୁରା ଅଞ୍ଚଳ । ତେବେ ଏଠାରେ ୨ଟି ବଡ ଲାଇଟ ଗେଟ ଓ ୪୦ଟି ବୋର୍ଡ ଲାଇଟ ଲାଗିବ । ଏ ନେଇ ଆରମ୍ଭ ହୋଇସାରିଛି ପ୍ରସ୍ତୁତି । ଏହା ସହ ମହାବୀରଙ୍କ ୧୨ ଫୁଟ ଉଚ୍ଚତାର ମୃଣ୍ମୟୀ ମୂର୍ତ୍ତି କୋଲକାତାରୁ କାରିଗର ଆସି ତିଆରି କରୁଛନ୍ତି । ସପ୍ତମୀରେ ମାଆ ବିମଳାଙ୍କ ଠାରୁ ଆଜ୍ଞାମାଳା ଆସିବା ପରେ ମହାବୀରଙ୍କ ଆବାହନ କରିଯିବ । ସପ୍ତମୀ, ଅଷ୍ଟମୀ ଓ ନବମୀରେ ଖେଚୁଡି ଭୋଗ କରାଯିବ ।
ପୂଜାରେ ଆଉ ଏକ ଆକର୍ଷଣ ସାଜିବ ପ୍ରଜାପତି ବ୍ରହ୍ମକୁମାରୀ ସଦସ୍ୟଙ୍କ ବିଭିନ୍ନ ଦେବାଦେବୀଙ୍କ ବେଶ । ସପ୍ତମୀ, ଅଷ୍ଟମୀ ଓ ନବମୀ ଦିନ ପୂଜା ପେଣ୍ଡାଲରେ ସେମାନେ ବିଭିନ୍ନ ଦେବାଦେବୀଙ୍କ ବେଶ ହୋଇ ଠିଆ ହେବେ । ଏହି ଅବସରରେ ସାଂସ୍କୃତିକ କାର୍ଯ୍ୟକ୍ରମର ବ୍ୟବସ୍ଥା ମଧ୍ୟ ହୋଇଛି । ତେବେ ସପ୍ତମୀ ଦିନ ମେଲୋଡି ହେବ । ଅଷ୍ଟମୀରେ ସେହି ଅଞ୍ଚଳର କୁନି ପିଲାଙ୍କ ମଧ୍ୟରେ ନୃତ୍ୟ ପ୍ରତି ଯୋଗିତା ହେବ । ଏହା ସହ ଲାଫିଂ କ୍ଲବର ସଦସ୍ୟମାନେ ନୃତ୍ୟ ପରିବେଷଣ କରିବେ । ନବମୀରେ ଭଜନ ସମାରୋହ ଓ ଦଶମୀରେ ସମ୍ବଲପୁରୀ ନୃତ୍ୟ ସହ ବାଦ୍ୟ ପରିବେଷଣ ହେବ । ଭସାଣି ଦିନ ଡିଜେ ଓ ଢୋଲ ବଜାଇ ପ୍ରଭୁଙ୍କୁ ବେଶ ଧୁମଧାମରେ ମେଲାଣି ଦିଆଯିବ । ତେବେ ପୂଜାର ସୁରକ୍ଷା ଦୃଷ୍ଟିକୋଣରୁ ୪ଟି ସିସିଟିଭି ମଧ୍ୟ ଲାଗିବ ।