ଭୁବନେଶ୍ୱର: ମୁଖ୍ୟ ନିର୍ବାଚନ ଅଧିକାରୀଙ୍କ କାର୍ଯ୍ୟାଳୟ ସୂଚନା ଅନୁଯାୟୀ, ଓଡ଼ିଶାରେ ଭୋଟର ତାଲିକାର ସ୍ୱତନ୍ତ୍ର ଘନିଷ୍ଠ ସଂଶୋଧନ (SIR) ପ୍ରକ୍ରିୟା ଶେଷ ହୋଇଛି ଏବଂ ସୋମବାର ଦିନ ‘ଅନ୍ତିମ ଭୋଟର ତାଲିକା-୨୦୨୬’ ପ୍ରକାଶ ପାଇଛି। ଏହି ତାଲିକା ଅନୁସାରେ ରାଜ୍ୟରେ ମୋଟ ୩,୧୬,୩୨,୭୫୪ ଜଣ ଭୋଟର ରହିଛନ୍ତି। ୧ ଜୁଲାଇ ୨୦୨୬କୁ ଯୋଗ୍ୟତା ନିର୍ଦ୍ଧାରଣ ତାରିଖ ଭାବେ ଗ୍ରହଣ କରି କରାଯାଇଥିବା ଏହି ସଂଶୋଧନ ପ୍ରକ୍ରିୟାରେ, ୫ ଜୁଲାଇରେ ୩,୧୩,୮୭,୦୩୪ ଜଣ ଭୋଟରଙ୍କୁ ନେଇ ଖସଡ଼ା ତାଲିକା ପ୍ରକାଶ ପାଇଥିଲା। SIR ପୂର୍ବରୁ ପଞ୍ଜୀକୃତ ଥିବା ୩,୩୩,୯୯,୫୯୧ ଜଣ ଭୋଟରଙ୍କ ମଧ୍ୟରୁ ୩,୧୩,୮୭,୦୩୪ ଜଣଙ୍କର ତଥ୍ୟ ସଂଗ୍ରହ ଫର୍ମ ଗ୍ରହଣ କରାଯାଇଥିଲା ଏବଂ ୨୦,୧୨,୫୫୭ ଜଣଙ୍କ ନାମ ଖସଡ଼ା ତାଲିକାରୁ ବାଦ୍ ଦିଆଯାଇଥିଲା ବୋଲି ପ୍ରେସ୍ ବିଜ୍ଞପ୍ତିରେ କୁହାଯାଇଛି।
ଯାଞ୍ଚ ପ୍ରକ୍ରିୟା ସମୟରେ ମୋଟ ୫୮,୩୬,୩୯୨ଟି ନୋଟିସ୍ ଜାରି କରାଯାଇଥିଲା; ଏଥିରେ ୧୨,୯୮,୭୭୯ ଜଣ ‘ଅନ୍-ମ୍ୟାପ୍ଡ’ (unmapped) ଭୋଟର ଏବଂ ୪୫,୩୭,୬୧୩ ଜଣ ଭୋଟରଙ୍କ ତଥ୍ୟରେ ତ୍ରୁଟି ଥିବା (logical discrepancies) ମାମଲା ଅନ୍ତର୍ଭୁକ୍ତ ଥିଲା। ନିର୍ଦ୍ଧାରିତ ସମୟ ମଧ୍ୟରେ ମୋଟ ୨,୫୫,୯୯୬ଟି ଦାବି ଓ ଆପତ୍ତି ଗ୍ରହଣ କରାଯାଇ ସେଗୁଡ଼ିକର ସମାଧାନ କରାଯାଇଥିଲା।
ଦାବି, ଆପତ୍ତି ଓ ଅନ୍ୟାନ୍ୟ ଆବେଦନର ସମାଧାନ ପରେ ଖସଡ଼ା ତାଲିକାରେ ୨,୯୦,୪୯୭ ଜଣ ନୂତନ ଭୋଟରଙ୍କୁ ଯୋଡ଼ା ଯାଇଥିଲା ଏବଂ ୪୪,୭୭୭ ଜଣଙ୍କ ନାମ ବାଦ୍ ଦିଆଯାଇଥିଲା, ଫଳସ୍ୱରୂପ ମୋଟ ଭୋଟର ସଂଖ୍ୟାରେ ୨,୪୫,୭୨୦ ଜଣଙ୍କର ନିଟ୍ ବୃଦ୍ଧି ଘଟିଥିଲା। ଅନ୍ତିମ ତାଲିକାରେ ୧,୬୧,୩୦,୩୧୯ ଜଣ ପୁରୁଷ, ୧,୫୪,୯୯,୬୬୧ ଜଣ ମହିଳା ଏବଂ ୨,୭୭୪ ଜଣ ତୃତୀୟ ଲିଙ୍ଗୀ ଭୋଟର ଅନ୍ତର୍ଭୁକ୍ତ ଅଛନ୍ତି।
ରାଜ୍ୟରେ ବର୍ତ୍ତମାନ ୪୫,୨୫୦ ମତଦାନ କେନ୍ଦ୍ର ରହିଛି। ନିର୍ବାଚନ କମିଶନ ଏବଂ ସିଇଓ ଓଡିଶା ୱେବସାଇଟରେ ଉପଲବ୍ଧ ହେବା ସହିତ ନିର୍ବାଚନ କମିଶନ ଏବଂ ସିଇଓ ଓଡିଶା ୱେବସାଇଟରେ ଉପଲବ୍ଧ ହେବା ସହିତ, ନିର୍ବାଚନ କମିଶନଙ୍କ କାର୍ଯ୍ୟାଳୟ ଭୋଟରମାନଙ୍କୁ ତାଲିକାରେ ସେମାନଙ୍କର ନାମ ଏବଂ ବିବରଣୀ ଯାଞ୍ଚ କରିବାକୁ ପରାମର୍ଶ ଦେଇଛି ଏବଂ କହିଛି ଯେ ଅନ୍ତର୍ଭୁକ୍ତ, ସଂଶୋଧନ କିମ୍ବା ବାଦ୍ ଦେବା ପାଇଁ ଆବେଦନ ନିର୍ଦ୍ଧାରିତ ଅନଲାଇନ୍ କିମ୍ବା ଅଫଲାଇନ୍ ପ୍ରକ୍ରିୟା ମାଧ୍ୟମରେ ଦାଖଲ କରାଯାଇପାରିବ।
ସେବା ଭୋଟରଙ୍କ ପାଇଁ ଚୂଡ଼ାନ୍ତ ଭୋଟର ତାଲିକା ମଧ୍ୟ ପ୍ରକାଶିତ ହୋଇଛି, ଯେଉଁଥିରେ ୪୬,୮୧୬ ଜଣ ସେବା ଭୋଟର ଅଛନ୍ତି। ଏହି ତାଲିକା ନିର୍ବାଚନ କମିଶନ ଏବଂ ସିଇଓ ଓଡିଶା ୱେବସାଇଟରେ ଉପଲବ୍ଧ ହେବା ସହିତ, ମତଦାନ କେନ୍ଦ୍ର ଏବଂ ନିର୍ବାଚନ ପଞ୍ଜିକରଣ ଅଧିକାରୀ ଏବଂ ସହକାରୀ ନିର୍ବାଚନ ପଞ୍ଜିକରଣ ଅଧିକାରୀଙ୍କ କାର୍ଯ୍ୟାଳୟରେ ସାଧାରଣ ଯାଞ୍ଚ ପାଇଁ ଉପଲବ୍ଧ।