ହରିପୁର ଓ ଡେଲାଙ୍ଗ ପାର୍ଶ୍ୱକୁ ଯାଉଥିବା ଯାନବାହାନ ଚାଳକଙ୍କ ଉପରେ ଡକାୟତି କରିବା ଉଦ୍ଦେଶ୍ୟରେ ଜଟଣୀ ଅଞ୍ଚଳର ମଣିଆ ଛକ ଶିବ ମନ୍ଦିର ନିକଟରେ କିଛି ଦୁର୍ବୁତ୍ତ ଏକତ୍ରିତ ହୋଇଥିବା ସମ୍ପର୍କରେ ବିଶ୍ୱସ୍ତ ସୂତ୍ରରୁ ସୂଚନା ପାଇଥିଲେ ରାତିରେ ପାଟ୍ରୋଲିଂ କରୁଥିବା ପୋଲିସ୍ ଟିମ୍ । ତୁରନ୍ତ କାର୍ଯ୍ୟାନୁଷ୍ଠାନ ସ୍ୱରୂପ, ପୋଲିସ ଟିମ୍ ଜଟଣୀ ଥାନାଧିକାରୀଙ୍କୁ ସୂଚନା ଦେଇ ତାଙ୍କ ନିର୍ଦ୍ଦେଶକ୍ରମେ ଘଟଣାସ୍ଥଳକୁ ଯାଇ ସତର୍କତାର ସହିତ ପାଞ୍ଚ ଜଣଙ୍କୁ କାବୁ କରିଥିଲେ । ପଚରାଉଚରା ସମୟରେ, ଅଭିଯୁକ୍ତମାନେ ଘଟଣାସ୍ଥଳରେ ସେମାନଙ୍କ ଉପସ୍ଥିତି ସମ୍ପର୍କରେ କୌଣସି ସନ୍ତୋଷଜନକ ଉତ୍ତର ଦେଇପାରି ନଥିଲେ କିନ୍ତୁ ପରବର୍ତ୍ତୀ ସମୟରେ ମୋଟରସାଇକେଲ ଚାଳକ ଏବଂ ଚାରିଚକିଆ ଯାନ ଚାଳକମାନଙ୍କ ଠାରୁ ଡକାୟତି କରିବା ଉଦ୍ଦେଶ୍ୟରେ ସେମାନେ ଏକତ୍ରିତ ହୋଇଥିବା ସ୍ୱୀକାର କରିଥିଲେ । ଘଟଣାସ୍ଥଳରୁ ବିଭିନ୍ନ ମରଣାସ୍ତ୍ର ଓ ଅନ୍ୟାନ୍ୟ ସାମଗ୍ରୀ ଉଦ୍ଧାର କରି ଆଇନଗତ ପ୍ରକ୍ରିୟାରେ ଜବତ କରାଯାଇଥିଲା ।
ଗିରଫ ଯୁବକ ମାନଙ୍କ ପୂର୍ବ ଅପରାଧିକ ରେକର୍ଡ ଯାଞ୍ଚରୁ ଜଣାପଡ଼ିଛି ଯେ, ଅଭିଯୁକ୍ତ ଜିତେନ୍ଦ୍ର ରାଉତରାୟ ଡକାୟତି ଓ ଅସ୍ତ୍ରଶସ୍ତ୍ର ସହିତ ସଂପୃକ୍ତ ମୋଟ ୩ଟି ପୂର୍ବ ଅପରାଧିକ ମାମଲାରେ ଜଡିତ ଥିବା ବେଳେ ଅଭିଯୁକ୍ତ ଅନସାର ସାହା ଡକାୟତି ପ୍ରସ୍ତୁତି, ଚୋରି, ଆକ୍ରମଣ ଓ ଅସ୍ତ୍ରଶସ୍ତ୍ର ଆଇନ ଉଲ୍ଲଂଘନ ସମେତ ମୋଟ ୧୦ଟି ଗୁରୁତର ପୂର୍ବ ଅପରାଧିକ ମାମଲାରେ ଜଡିତ ଅଛି । ଠିକ୍ ସେହିପରି ଅଭିଯୁକ୍ତ ସୁଜିତ କୁମାର ବିଶ୍ୱାଳ ୨ଟି ପୂର୍ବ ଅପରାଧିକ ମାମଲାରେ ଜଡିତ ଥିବା ବେଳେ, ଅଭିଯୁକ୍ତ ଶ୍ୟାମ ସୁନ୍ଦର ବେହେରା ଓ ମନୋଜ କୁମାର ନାୟକଙ୍କ ଅପରାଧିକ ପୂର୍ବାବଲୋକନ ଯାଞ୍ଚଧୀନ ଅଛି । ଅଭିଯୁକ୍ତମାନଙ୍କ ବିରୋଧରେ ପର୍ଯ୍ୟାପ୍ତ ପ୍ରାଥମିକ ପ୍ରମାଣ ସ୍ଥାପିତ ହେବା ପରେ, ସମସ୍ତ ଆଇନଗତ ଔପଚାରିକତା ପୂରଣ କରି ଆଜି ସେମାନଙ୍କୁ କୋର୍ଟକୁ ଚାଲାଣ କରାଯାଇଛି । ଏହି ମାମଲାର ଅଧିକ ତଦନ୍ତ ଜାରି ରହିଛି ବୋଲି ସୂଚନା ଦେଇଛନ୍ତି ଜଟଣୀ ଥାନା ଅଧିକାରୀ ଷ୍ଟାଲିନ କୁମାର ବିଶ୍ଵାଳ I