ଆଗଲପୁର ପୋଲିସ ସୀମା ଅନ୍ତର୍ଗତ ରୋଥ ଗ୍ରାମରୁ ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି । ଯେଉଁଠାରେ ତାସ୍ ଖେଳ ସମୟରେ ଝଗଡ଼ା ପରେ ଜଣେ ୧୪ ବର୍ଷୀୟ ନାବାଳକକୁ ଅନ୍ୟ ଜଣେ ନାବାଳକ ହତ୍ୟା କରିଛି। ମୃତକ ଜଣକ ରୋଥ ଗ୍ରାମର ରମେଶ ପଟେଲଙ୍କ ପୁଅ ସାହିଲ ପଟେଲ । ରିପୋର୍ଟ ଅନୁଯାୟୀ, ସାହିଲ ଏବଂ ତାଙ୍କ ବନ୍ଧୁ କୁନାଲ ବରିହା, ସକାଳ ପ୍ରାୟ ୧୧ଟା ବେଳେ ଗାଁ କ୍ଲବରେ ତାସ୍ ଖେଳୁଥିଲେ। ସାହିଲ ଏବଂ କୁନାଲଙ୍କ ମଧ୍ୟରେ କେଉଁ ଏକ କଥାକୁ ନେଇ ଯୁକ୍ତିତର୍କ ହୋଇଥିଲା । ଯାହା ପରେ କୁନାଲ ଘରକୁ ଯାଇ ଏକ ଛୁରୀ ନେଇ ଫେରି ଆସି ସାହିଲକୁ ଛୁରା ମାରିଥିଲେ।
ସାହିଲ ଘଟଣାସ୍ଥଳେ ପଡ଼ିଯାଇଥିଲା ଏବଂ ତାଙ୍କୁ ଆଗଲପୁର ଡାକ୍ତରଖାନାକୁ ନିଆଯାଇଥିଲା । ଯେଉଁଠାରେ ଡାକ୍ତରମାନେ ତାଙ୍କୁ ମୃତ ଘୋଷଣା କରିଥିଲେ। ଏହି ଘଟଣା ରୋଥ ଗ୍ରାମରେ ଉତ୍ତେଜନା ସୃଷ୍ଟି କରିଥିଲା, ସ୍ଥାନୀୟ ଲୋକମାନେ ଅଭିଯୁକ୍ତକୁ ତୁରନ୍ତ ଗିରଫ କରିବା ଦାବିରେ ଆଗଲପୁର ଥାନା ବାହାରେ ପ୍ରତିବାଦ କରିଥିଲେ। ଘଟଣାରେ ପୋଲିସ ମୃତଦେହ ଜବତ କରି ଏକ ହତ୍ୟା ମାମଲା ରୁଜୁ କରିଛି। ଅଭିଯୁକ୍ତ ନାବାଳକକୁ ହେପାଜତକୁ ନିଆଯାଇଛି ଏବଂ ମୃତଦେହକୁ ପୋଷ୍ଟମର୍ଟମ ପାଇଁ ବଲାଙ୍ଗିରର ଭୀମା ଭୋଇ ମେଡିକାଲ କଲେଜକୁ ପଠାଯାଇଛି। ପରିସ୍ଥିତିର ମୂଲ୍ୟାଙ୍କନ କରିବା ପାଇଁ ଏସଡିପିଓ ସରୋଜ ଉପାଧ୍ୟାୟ ଘଟଣାସ୍ଥଳ ପରିଦର୍ଶନ କରିଛନ୍ତି।