ରାବଣ ପୋଡ଼ି ଓ ଦୁର୍ଗାପୂଜା ବିସର୍ଜନ ପାଇଁ ସୁରକ୍ଷା ବ୍ୟବସ୍ଥାର ସମୀକ୍ଷା କଲେ ଆଇଜିପି, କେନ୍ଦ୍ରାଞ୍ଚଳ ରେଞ୍ଜ, କଟକ
କଟକ: ଦୁର୍ଗାପୂଜା ଉତ୍ସବର ସଫଳ ସମାପ୍ତି ପରେ କେନ୍ଦ୍ରାଞ୍ଚଳ ରେଞ୍ଜ, କଟକର ଆଇଜିପି ଡକ୍ଟର ସତ୍ୟଜିତ୍ ନାଏକ, ଆଇପିଏସ୍ ଆଜି ବିଜୟା ଦଶମୀରେ ରାବଣ ପୋଡ଼ି/ଦହନ ଏବଂ କେନ୍ଦ୍ର ରେଞ୍ଜର ସମସ୍ତ ଜିଲ୍ଲାରେ ମା’ ଦୁର୍ଗାଙ୍କ ପ୍ରତିମାର ପର୍ଯ୍ୟାୟକ୍ରମେ ବିସର୍ଜନ ନିମନ୍ତେ ସୁରକ୍ଷା ବ୍ୟବସ୍ଥା, ପୁଲିସ ବଳ ମୁତୟନ ଏବଂ ନିରାପତ୍ତା ପଦକ୍ଷେପର ସମୀକ୍ଷା କରିଛନ୍ତି। ବିସର୍ଜନ ଶୋଭାଯାତ୍ରା ପର୍ଯ୍ୟାୟକ୍ରମେ ୨୬ ଅକ୍ଟୋବର ୨୦୨୬ ପର୍ଯ୍ୟନ୍ତ ଜାରି ରହିବ।
ସଂକ୍ଷିପ୍ତ ବିବରଣୀ
କେନ୍ଦ୍ରାଞ୍ଚଳ ରେଞ୍ଜରେ ମା’ ସାରଳା, ମା’ ଚର୍ଚ୍ଚିକା, ମା’ ଭଟ୍ଟାରିକା ଓ ମା’ ସିର୍ଲୋ ପରି ପ୍ରମୁଖ ଶକ୍ତିପୀଠ ସମେତ ମୋଟ ୧,୨୪୩ଟି ପୂଜା ମଣ୍ଡପରେ ଦୁର୍ଗାପୂଜା ଅନୁଷ୍ଠିତ ହୋଇଛି। ଜିଲ୍ଲା ପୁଲିସ, ଜିଲ୍ଲା ପ୍ରଶାସନ, ସ୍ଥାନୀୟ ସଂସ୍ଥା, ପୂଜା କମିଟି ଓ ଅନ୍ୟାନ୍ୟ ସଂପୃକ୍ତ ବିଭାଗ ସହ ନିବିଡ଼ ସମନ୍ୱୟ ରକ୍ଷା କରି ବ୍ୟାପକ ସୁରକ୍ଷା ଓ ଟ୍ରାଫିକ୍ ବ୍ୟବସ୍ଥା କରାଯାଇଛି।
ଶୋଭାଯାତ୍ରାର ସୁରୁଖୁରୁ ଓ ସୁଶୃଙ୍ଖଳିତ ଗତି ସୁନିଶ୍ଚିତ କରିବା ପାଇଁ ରାବଣ ପୋଡ଼ି/ଦହନ ସ୍ଥଳ, ବିସର୍ଜନ ରାସ୍ତା, ସମ୍ବେଦନଶୀଳ ସ୍ଥାନ, ପ୍ରମୁଖ ଛକ ଏବଂ ନିର୍ଦ୍ଧାରିତ ବିସର୍ଜନ ଘାଟ/ସ୍ଥାନରେ ପର୍ଯ୍ୟାପ୍ତ ପୁଲିସ କର୍ମୀ ମୁତୟନ କରାଯାଇଛି। ବରିଷ୍ଠ ଅଧିକାରୀଙ୍କ ତତ୍ତ୍ୱାବଧାନରେ ହୋମଗାର୍ଡ ସହିତ ମୋଟ ୪୩ ପ୍ଲାଟୁନ୍ ପୁଲିସ ବଳ ମୁତୟନ କରାଯିବ।
ବିଶେଷ ଧ୍ୟାନ ଦିଆଯାଉଥିବା ବିଷୟ
– ବିଜୟା ଦଶମୀରେ ରାବଣ ପୋଡ଼ି/ଦହନର ସୁରକ୍ଷିତ ପରିଚାଳନା, ଭିଡ଼ ନିୟନ୍ତ୍ରଣ, ବ୍ୟାରିକେଡିଂ, ନିରାପଦ ଦୂରତା ଓ ସ୍ଥଳରେ ଅଗ୍ନିନିରାପତ୍ତା
– ମିନା ବଜାର ଓ ମେଳା ପଡ଼ିଆ ଅଞ୍ଚଳରେ ସୁରକ୍ଷା
– ପୂଜା ମଣ୍ଡପ ଓ ବିସର୍ଜନ ସ୍ଥାନରେ ଭିଡ଼ ପରିଚାଳନା ଏବଂ ପ୍ରବେଶ/ପ୍ରସ୍ଥାନ ନିୟନ୍ତ୍ରଣ
– ଶୋଭାଯାତ୍ରା ରାସ୍ତାରେ ଟ୍ରାଫିକ୍ ନିୟନ୍ତ୍ରଣ ଓ ପାର୍କିଂ ବ୍ୟବସ୍ଥା
– ଅପ୍ରୀତିକର ଘଟଣା ନିବାରଣ ଓ ସାମ୍ପ୍ରଦାୟିକ ସଦ୍ଭାବନା ରକ୍ଷା
– ମହିଳା, ଶିଶୁ ଓ ବରିଷ୍ଠ ନାଗରିକଙ୍କ ସୁରକ୍ଷା
– ପ୍ରମୁଖ ପୂଜା ମଣ୍ଡପ ଓ ବିସର୍ଜନ ସ୍ଥାନରେ ଆଲୋକ, ଅଗ୍ନିନିରାପତ୍ତା ଓ ସିସିଟିଭି ବ୍ୟବସ୍ଥାଫିଲ୍ଡ ଅଧିକାରୀଙ୍କୁ ନିର୍ଦ୍ଦେଶ
କେନ୍ଦ୍ରାଞ୍ଚଳ ରେଞ୍ଜର ସମସ୍ତ ଏସ୍ପିଙ୍କୁ ସତର୍କ ରହିବା, ସମସ୍ତ ବିଭାଗ ସହ ନିବିଡ଼ ସମନ୍ୱୟ ରକ୍ଷା କରିବା ଏବଂ ବିସର୍ଜନ ସମାପ୍ତ ନହେବା ପର୍ଯ୍ୟନ୍ତ ସିଟ୍ରେପ୍ (SITREP) ଦାଖଲ କରିବାକୁ ଆଇଜିପି ନିର୍ଦ୍ଦେଶ ଦେଇଛନ୍ତି। ପର୍ଯ୍ୟାୟକ୍ରମିକ ବିସର୍ଜନ ନିର୍ଦ୍ଧାରିତ କାର୍ଯ୍ୟସୂଚୀ ଅନୁସାରେ କଠୋର ଭାବେ ସମ୍ପନ୍ନ ହେବା ଉଚିତ ଏବଂ ଘାଟ, ଜଳାଶୟ ଓ ଭିଡ଼ ଥିବା ରାସ୍ତାରେ ସୁରକ୍ଷା ପ୍ରତି ବିଶେଷ ଧ୍ୟାନ ଦିଆଯାଉ ବୋଲି ସେ ଗୁରୁତ୍ୱାରୋପ କରିଛନ୍ତି।
ଜନସାଧାରଣଙ୍କୁ ଅନୁରୋଧ
ନାଗରିକ ଓ ପୂଜା କମିଟିଗୁଡ଼ିକୁ ପୁଲିସ ସହ ସହଯୋଗ କରିବା, ନିର୍ଦ୍ଧାରିତ ରାସ୍ତା ଓ ସମୟ ମାନିବା, ଶୃଙ୍ଖଳା ବଜାୟ ରଖିବା, ଗୁଜବରୁ ଦୂରେଇ ରହିବା ଏବଂ ସମସ୍ତ ସୁରକ୍ଷା ନିର୍ଦ୍ଦେଶ ପାଳନ କରିବାକୁ ଅନୁରୋଧ କରାଯାଉଛି। ଯେକୌଣସି ସନ୍ଦେହଜନକ କାର୍ଯ୍ୟକଳାପ କିମ୍ବା ଜରୁରୀକାଳୀନ ଅବସ୍ଥାରେ ତୁରନ୍ତ ନିକଟତମ ଥାନାକୁ କିମ୍ବା ୧୧୨ ନମ୍ବରରେ ଯୋଗାଯୋଗ କରନ୍ତୁ।
କେନ୍ଦ୍ରାଞ୍ଚଳ ରେଞ୍ଜର ଜନସାଧାରଣ ସର୍ବଦା ସାମ୍ପ୍ରଦାୟିକ ସଦ୍ଭାବନା ଓ ଶାନ୍ତିପୂର୍ଣ୍ଣ ଉତ୍ସବର ଭାବନାକୁ ଉଚ୍ଚ ରଖିଛନ୍ତି। ରାବଣ ପୋଡ଼ି ଓ ବିସର୍ଜନ ମର୍ଯ୍ୟାଦା, ଭକ୍ତି ଓ ଦାୟିତ୍ୱବୋଧ ସହ ସମ୍ପନ୍ନ ହେଉ ବୋଲି ଓଡ଼ିଶା ପୁଲିସ ସମସ୍ତଙ୍କୁ ଅନୁରୋଧ କରୁଛି। ସମସ୍ତ ନାଗରିକଙ୍କ ସୁରକ୍ଷା ଓ ନିରାପତ୍ତା ସୁନିଶ୍ଚିତ କରିବାକୁ ଓଡ଼ିଶା ପୁଲିସ ପ୍ରତିଶ୍ରୁତିବଦ୍ଧ।