ପୁରୀ: ଇଣ୍ଡିଆ ଥ୍ରିଲସ ୱେବସାଇଟ୍ ନାଁରେ ସାଇବର ଥାନାରେ ଫେରାଦ । ପୁରୀ ସାଇବର ଥାନାରେ ଫେରାଦ ହେଲେ ଶ୍ରୀମନ୍ଦିର ସୁରକ୍ଷା ପ୍ରଶାସକ । ୱେବସାଇଟ୍ ଜରିଆରେ ଲୋକଙ୍କୁ ଭକ୍ତଙ୍କୁ ଭ୍ରମିତ କରାଯାଉଥିବା ନେଇ ଅଭିଯୋଗ କରିଛି ଶ୍ରୀମନ୍ଦିର ସୁରକ୍ଷା ପ୍ରଶାସକ । ମହାପ୍ରଭୁଙ୍କ ଦର୍ଶନ ପୂରା ମାଗଣା ରହିଥିଲା ବେଳେ କିପରି ଟଙ୍କା କଥା ଦର୍ଶାଇଲେ ସେ ନେଇ ତଦନ୍ତ କରିବାକୁ ଦାବି କରାଯାଇଛି । ତଦନ୍ତ କରି ତୁରନ୍ତ କାର୍ଯ୍ୟାନୁଷ୍ଠାନ ପାଇଁ ଏତଲାରେ ଦର୍ଶାଇଲା ଶ୍ରୀମନ୍ଦିର ସୁରକ୍ଷା ପ୍ରଶାସକ ।
ସୂଚନା ଅନୁସାରେ, କୋଟି କୋଟି ଜଗନ୍ନାଥ ପ୍ରେମୀଙ୍କ ଭାବାବେଗ ସହିତ ସାଂଘାତିକ ଖେଳ ଖେଳି ଅନଲାଇନ ଆପ୍ ମାଧ୍ୟମରେ ଭକ୍ତଙ୍କୁ ଠାକୁରଙ୍କ ନାଁରେ ଚୂନ ଲଗାଉଛନ୍ତି ଅନଲାଇନ ଆପ୍ ସଂସ୍ଥା । ଇଣ୍ଡିଆ ଥ୍ରିଲସ ୱେବସାଇଟ୍ ମାଧ୍ୟମରେ ଦର୍ଶାଯାଇଛି ଯେ, ଶ୍ରୀମନ୍ଦିରରେ ମହାପ୍ରଭୁଙ୍କ ଦର୍ଶନ, ପୂଜାର୍ଚ୍ଚନା, ନିର୍ମାଲ୍ୟ ସବୁକିଛି ଅନଲାଇନ ମାଧ୍ୟମରେ ଯୋଗାଇ ଦିଆଯିବ । କେବଳ ଏତିକି ନୁହେଁ ବିଭିନ୍ନ ପ୍ରକାରର ପୂଜା ଓ ଦର୍ଶନ ପାଇଁ ମଧ୍ୟ ଭିନ୍ନ ପ୍ରକାରର ମୂଲ୍ୟ ଦେବାକୁ ପଡିବ । ସ୍ୱତନ୍ତ୍ର ଅଭିଷେକ ପୂଜା ପାଇଁ ୭୫୦୦, ତୁଳସୀ ଦାନ ପୂଜା ପାଇଁ ୫୫୦୧, ସାଧାରଣ ଦର୍ଶନ ପୂଜା ପାଇଁ ୨୫୦୦ ଏବଂ ଜଗନ୍ନାଥ, ବଳରାମ, ସୁଭଦ୍ରାଙ୍କ ମିଳିତ ପୂଜା ପାଇଁ ୪୭୫୦ଟଙ୍କା ଦେବାକୁ ପଡ଼ିବ ବୋଲି ୱେବସାଇଟରେ ଉଲ୍ଲେଖ ରହିଛି । ଦେଶ ବାହାର ଭକ୍ତଙ୍କ ପୂଜା ପାଇଁ ଡଲାରରେ ମଧ୍ୟ ଦର ତାଲିକା ପ୍ରକାଶ କରାଯାଇଛି ।