ପବିତ୍ର କାର୍ତ୍ତିକ ମାସ, ପଞ୍ଚୁକ, କାର୍ତ୍ତିକ ପୂର୍ଣ୍ଣିମା ଏବଂ ଆଗାମୀ ନୂଆବର୍ଷ ପାଳନକୁ ଶାନ୍ତିଶୃଙ୍ଖଳାର ସହ ସମ୍ପନ୍ନ କରିବା ପାଇଁ ଓଡ଼ିଶା ପୋଲିସ ପକ୍ଷରୁ ବ୍ୟାପକ ସୁରକ୍ଷା ଯୋଜନା ପ୍ରସ୍ତୁତ କରାଯାଇଛି। କେନ୍ଦ୍ରାଞ୍ଚଳ ଅଧୀନ ୭ଟି ଜିଲ୍ଲାରେ ଅପରାଧ ନିୟନ୍ତ୍ରଣ, ଭିଡ଼ ପରିଚାଳନା ଓ ଆଇନଶୃଙ୍ଖଳା ବଜାୟ ରଖିବାକୁ ପୋଲିସ ପ୍ରଶାସନ ପକ୍ଷରୁ ସ୍ୱତନ୍ତ୍ର ରଣନୀତି ଆପଣାଯାଇଛି। ରବିବାର ଭୁବନେଶ୍ୱରଠାରେ ଆୟୋଜିତ ସାମ୍ବାଦିକ ସମ୍ମିଳନୀରେ କେନ୍ଦ୍ରାଞ୍ଚଳ ଆଇଜି ଡକ୍ଟର ସତ୍ୟଜିତ ନାୟକ ଏହି ସୂଚନା ଦେଇଛନ୍ତି। କଟକ, ପୁରୀ, ନୟାଗଡ଼, ଖୋର୍ଦ୍ଧା, ଜଗତସିଂହପୁର, କେନ୍ଦ୍ରାପଡ଼ା ଓ ଯାଜପୁର ଜିଲ୍ଲାରେ ସୁରକ୍ଷା ବ୍ୟବସ୍ଥାକୁ ଅଧିକ କଡ଼ାକଡ଼ି କରାଯିବ। ଏଥିପାଇଁ ସମସ୍ତ ଜିଲ୍ଲାର ଏସ୍ପିମାନଙ୍କୁ ସତର୍କ ରହିବା ସହ ନିଜ ନିଜ ଅଞ୍ଚଳରେ ପାଟ୍ରୋଲିଂ ଓ ଅପରାଧ ନିୟନ୍ତ୍ରଣ ବ୍ୟବସ୍ଥାକୁ ଜୋରଦାର କରିବାକୁ ନିର୍ଦ୍ଦେଶ ଦିଆଯାଇଛି।
ଯାଜପୁର ଜିଲ୍ଲାରେ କାଳୀପୂଜା ଓ ଭସାଣି ଶୋଭାଯାତ୍ରାକୁ ଶାନ୍ତିପୂର୍ଣ୍ଣ କରିବା ପାଇଁ ୨୨ ପ୍ଲାଟୁନ୍ ପୋଲିସ ଫୋର୍ସ ମୁତୟନ ହେବେ। ଏହାସହ ୧୦ ଜଣ ଡିଏସ୍ପି ଓ ୬୫ ଜଣ ସବ୍ଇନ୍ସପେକ୍ଟର ମଧ୍ୟ ନିୟୋଜିତ ହେବେ। ପୂଜା ମଣ୍ଡପ, ସମ୍ବେଦନଶୀଳ ସ୍ଥାନ ଓ ଭସାଣି ରୁଟ୍ରେ ସ୍ୱତନ୍ତ୍ର ନଜର ରଖାଯିବ।
କାର୍ତ୍ତିକ ମାସରେ ପୁରୀକୁ ଆସୁଥିବା ହବିଷ୍ୟାଳି ଓ ଭକ୍ତଙ୍କ ସୁରକ୍ଷା ପାଇଁ ୨୬ ପ୍ଲାଟୁନ୍ ପୋଲିସ ଫୋର୍ସ ମୁତୟନ କରାଯିବ। ସେହିପରି ପଞ୍ଚୁକ ଓ କାର୍ତ୍ତିକ ପୂର୍ଣ୍ଣିମା ସମୟରେ ଭକ୍ତଙ୍କ ବିପୁଳ ସମାଗମକୁ ଦୃଷ୍ଟିରେ ରଖି ୬୫ ପ୍ଲାଟୁନ୍ ଫୋର୍ସ ନିୟୋଜିତ ହେବେ।
କଟକର ପ୍ରସିଦ୍ଧ ଧବଳେଶ୍ୱର ମହାଦେବ ପୀଠରେ ମଧ୍ୟ ଭକ୍ତଙ୍କ ସମାଗମକୁ ନଜରରେ ରଖି ସୁରକ୍ଷା ବ୍ୟବସ୍ଥା କରାଯାଇଛି। ଏଠାରେ ୧୬ ପ୍ଲାଟୁନ୍ ପୋଲିସ ଫୋର୍ସ ମୁତୟନ ହେବେ। ଭକ୍ତଙ୍କ ଯାତାୟାତ, ଭିଡ଼ ନିୟନ୍ତ୍ରଣ ଓ ଟ୍ରାଫିକ୍ ପରିଚାଳନା ଉପରେ ପୋଲିସର ନଜର ରହିବ।
କେବଳ ଧାର୍ମିକ ଉତ୍ସବ ନୁହେଁ, ନୂଆବର୍ଷ ପାଳନ ସମୟରେ ମଧ୍ୟ ସୁରକ୍ଷା ବ୍ୟବସ୍ଥାକୁ ଜୋରଦାର କରାଯିବ। ହୋଟେଲ, ରେଷ୍ଟୁରାଣ୍ଟ, ପର୍ଯ୍ୟଟନସ୍ଥଳୀ ଓ ମନୋରଞ୍ଜନ ସ୍ଥାନଗୁଡ଼ିକରେ ପୋଲିସର ସ୍ୱତନ୍ତ୍ର ନଜର ରହିବ। ମଦ୍ୟପ ଗାଡ଼ି ଚାଳନା, ବେପରୁଆ ଗାଡ଼ି ଚାଳନା ଓ ସର୍ବସାଧାରଣ ସ୍ଥାନରେ ବିଶୃଙ୍ଖଳା ସୃଷ୍ଟି କଲେ କଡ଼ା କାର୍ଯ୍ୟାନୁଷ୍ଠାନ ନିଆଯିବ।
ଏହାସହ ଅପରାଧୀ ଓ ଅସାମାଜିକ ବ୍ୟକ୍ତିଙ୍କ ଉପରେ ନଜର ରଖିବାକୁ ପାଟ୍ରୋଲିଂ, ଚେକିଂ ଓ ସର୍ଭିଲାନ୍ସ ବ୍ୟବସ୍ଥାକୁ ଅଧିକ ସକ୍ରିୟ କରାଯିବ। ସମ୍ବେଦନଶୀଳ ସ୍ଥାନ, ଧାର୍ମିକ ପୀଠ, ବଜାର ଓ ଯାତାୟାତ କେନ୍ଦ୍ରଗୁଡ଼ିକରେ ପୋଲିସର କଡ଼ା ନଜର ରହିବ।
ଏହି ଅବସରରେ ଜନସାଧାରଣଙ୍କୁ ପୋଲିସର ନିୟମ ଓ ପରାମର୍ଶ ମାନିବା ସହ ସୁରକ୍ଷା କର୍ମୀଙ୍କୁ ସହଯୋଗ କରିବାକୁ ଆଇଜି ଡକ୍ଟର ସତ୍ୟଜିତ ନାୟକ ଅପିଲ୍ କରିଛନ୍ତି। କୌଣସି ସନ୍ଦେହଜନକ କାର୍ଯ୍ୟକଳାପ କିମ୍ବା ଆଇନଶୃଙ୍ଖଳା ସମସ୍ୟା ଦେଖିଲେ ତୁରନ୍ତ ନିକଟସ୍ଥ ଥାନା କିମ୍ବା ପୋଲିସ କର୍ମଚାରୀଙ୍କୁ ଜଣାଇବାକୁ ସେ କହିଛନ୍ତି।
ପାର୍ବଣ ଋତୁରେ ଶାନ୍ତି, ସୁରକ୍ଷା ଓ ଅପରାଧମୁକ୍ତ ପରିବେଶ ସୁନିଶ୍ଚିତ କରିବା ପାଇଁ କେନ୍ଦ୍ରାଞ୍ଚଳ ପୋଲିସ ପକ୍ଷରୁ ଏହି ବ୍ୟାପକ ପଦକ୍ଷେପ ନିଆଯାଇଛି।