ନୂଆଦିଲ୍ଲୀ: ଭାରତ–ଆମେରିକା ମଧ୍ୟବର୍ତ୍ତୀକାଳୀନ ବାଣିଜ୍ୟ ଚୁକ୍ତି ଘୋଷଣା ସମୟରେ ଆମେରିକା ପକ୍ଷରୁ ଭାରତର ଏକ ସରକାରୀ ମାନଚିତ୍ର ଜାରି କରାଯାଇଛି। ଏହି ମାନଚିତ୍ରରେ ଜମ୍ମୁ–କାଶ୍ମୀର, ପାକିସ୍ତାନ ଅଧିକୃତ କାଶ୍ମୀର (PoK) ସହିତ ଲଦାଖ ଓ ଅକ୍ସାଇ ଚୀନକୁ ମଧ୍ୟ ଭାରତର ଅଂଶ ଭାବେ ଦର୍ଶାଯାଇଛି।ଏହାକୁ କୌଣସି ଟେକନିକାଲ୍ ଭୁଲ୍ କିମ୍ବା ଗ୍ରାଫିକ୍ ଡିଜାଇନ ତ୍ରୁଟି ବୋଲି କହିବା ସମ୍ଭବ ନୁହେଁ। ବରଂ ଏହା ପାକିସ୍ତାନ ଓ ଚୀନ ପାଇଁ ଏକ ସିଧାସଳଖ କୂଟନୈତିକ ସନ୍ଦେଶ ବୋଲି ଧରାଯାଉଛି।ଭାରତ–ଆମେରିକା ସମ୍ପର୍କ ନୂଆ ଉଚ୍ଚତାକୁ ପହଞ୍ଚୁଥିବା ସମୟରେ ଏହା ପ୍ରଥମ ଥର, ଯେତେବେଳେ ଆମେରିକା ଏତେ ସ୍ପଷ୍ଟ ଭାବରେ ଭାରତର ଆଞ୍ଚଳିକ ସାର୍ବଭୌମତ୍ୱକୁ ସ୍ୱୀକାର କରିଛି।
ସମ୍ପ୍ରତି ‘କାଶ୍ମୀର ସଂହତି ଦିବସ’ ଅବସରରେ ପାକିସ୍ତାନ ପ୍ରଧାନମନ୍ତ୍ରୀ ଶେହବାଜ ଶରିଫ PoK ବିଧାନସଭାରେ ଭାଷଣ ଦେଇ କହିଥିଲେ ଯେ କାଶ୍ମୀର ପାକିସ୍ତାନର “ଶିରା”। କିନ୍ତୁ ଆମେରିକା ପକ୍ଷରୁ ଜାରି ହୋଇଥିବା ଏହି ମାନଚିତ୍ର ଏହି ଦାବିକୁ ସମ୍ପୂର୍ଣ୍ଣ ଭାବେ ଖଣ୍ଡନ କରିଛି। ଏହା ସ୍ପଷ୍ଟ କରୁଛି ଯେ ଜମ୍ମୁ–କାଶ୍ମୀର ଓ ଲଦାଖ ଭାରତର ଅଭିନ୍ନ ଅଂଶ ଥିଲା, ଅଛି ଏବଂ ରହିବ।ଏହି ପଦକ୍ଷେପ ପାକିସ୍ତାନର ସେଇ ଦୀର୍ଘକାଳୀନ ରଣନୀତିକୁ ମଧ୍ୟ ଭାରି ଆଘାତ ଦେଇଛି, ଯେଉଁଥିରେ ସେ ପ୍ରତ୍ୟେକ ଅନ୍ତର୍ଜାତୀୟ ମଞ୍ଚରେ କାଶ୍ମୀରକୁ ‘ବିବାଦୀୟ ଅଞ୍ଚଳ’ ଭାବେ ଉଠାଇ ଧରିଥାଏ। ମାନଚିତ୍ରରେ ଅକ୍ସାଇ ଚୀନକୁ ଭାରତର ଅଂଶ ଭାବେ ଦର୍ଶାଯିବା ଚୀନ ପାଇଁ ମଧ୍ୟ ଏକ ବଡ଼ କୂଟନୈତିକ ଆଘାତ। ଚୀନ ଦୀର୍ଘଦିନ ଧରି ଏହି ଅଞ୍ଚଳ ଉପରେ ନିଜ ଅଧିକାର ଦାବି କରୁଥିବା ବେଳେ, ଭାରତ ଏହାକୁ ଅବୈଧ ଦଖଲ ବୋଲି କହିଆସୁଛି।