ନରସିଂହପୁର ଥାନା ହାଜତ ମୃତ୍ୟୁ ଘଟଣାର ୧୦ ବର୍ଷ ପରେ ଗିରଫ ହୋଇଛନ୍ତି ୬ ଜଣ ପୋଲିସ କର୍ମଚାରୀ । ୨୦୧୬ ମସିହାରେ ଘଟିଥିବା ଚର୍ଚ୍ଚିତ ହାଜତ ମୃତ୍ୟୁ ଘଟଣାରେ ସମ୍ପୃକ୍ତ ଥିବା ୬ ଜଣ ପୋଲିସ କର୍ମଚାରୀଙ୍କୁ ନରସିଂହପୁର ପୋଲିସ ଗିରଫ କରି କୋର୍ଟଚାଲାଣ କରିଛି । ଗିରଫ ଅଭିଯୁକ୍ତ ହେଉଛନ୍ତି ଅବସରପ୍ରାପ୍ତ ଏଏସ୍ଆଇ ଭଗବାନ ସାହୁ, ଅବସରପ୍ରାପ୍ତ ହାବିଲଦାର ପ୍ରମୋଦ କୁମାର ପାତ୍ର, ଅବସରପ୍ରାକ୍ତ ହୋମ୍ଗାର୍ଡ ଭିକାରି ନାୟକ, ଅବସରପ୍ରାପ୍ତ ହୋମ୍ଗାର୍ଡ ଯୋଗୀ ନାୟକ, ହୋମ୍ଗାର୍ଡ ମହେଶ୍ୱର ଦେବତା ଏବଂ ହୋମ୍ଗାର୍ଡ ଧର୍ମରାଜ ରଣା ।
ଘଟଣା ଅନୁଯାୟୀ ୨୦୧୬ ମସିହାରେ ନରସିଂହପୁର ଥାନା ଅନ୍ତର୍ଗତ ମାଳିସାହିର ଚୈତନ୍ୟ ନାଏକଙ୍କ ଝିଅ ରେବତୀ ନାଏକଙ୍କ ପରିବାର ସହିତ ତାଙ୍କ ପଡ଼ୋଶୀ ସରୋଜ ସେନାପତି ଓରଫ ଆକୁଳଙ୍କର କୌଣସି କାରଣରୁ ଗଣ୍ଡଗୋଳ ହୋଇଥିଲା । ଏହାକୁ ନେଇ ରେବତୀ ୨୦୧୬ ଡିସେମ୍ବର ୫ରେ ସରୋଜଙ୍କ ନାମରେ ନରସିଂହପୁର ଥାନାରେ ଲିଖିତ ଅଭିଯୋଗ କରିଥିଲେ। ଅଭିଯୋଗ ଆଧାରରେ ନରସିଂହପୁର ଥାନା କେସ୍ ନମ୍ବର ୧୨୮/୨୦୧୬ ରେ ପୋଲିସ ମାମଲା ରୁଜୁ କରିବା ସହିତ ସରୋଜଙ୍କୁ ଗିରଫ କରିବା ପାଇଁ ମାଳିସାହି ଗ୍ରାମକୁ ଯାଇଥିବା ବେଳେ ସେ ସମୟର ତଦନ୍ତକାରୀ ଅଫିସର ଏଏସ୍ଆଇ ଭଗବାନ ସାହୁଙ୍କ ସହିତ ଅଭିଯୁକ୍ତ ସରୋଜଙ୍କର ଧସ୍ତାଧସ୍ତି ହୋଇଥିଲା । ଯେଉଁ ଥିରେ ଏଏସ୍ଆଇ ଓ ଅଭିଯୁକ୍ତ ଉଭୟ ଆହତ ହୋଇଥିଲେ । ଏହାପରେ ଏଏସ୍ଆଇ ଙ୍କ ଅଭିଯୋଗ ଆଧାରରେ ନରସିଂହପୁର ଥାନାରେ ଆଉ ଏକ ମାମଲା ରୁଜୁ କରାଯାଇ ସରୋଜଙ୍କୁ ଗିରଫ କରି ଥାନାରେ ରଖାଯାଇଥିଲା । ହାଜତରେ ଥିବା କିନ୍ତୁ ସମୟରେ ସରୋଜଙ୍କ ସ୍ବାସ୍ଥ୍ୟ ଅବସ୍ଥା ଗୁରୁତର ହେବାରୁ ତାକୁ ନରସିଂହପୁର ଡାକ୍ତରଖାନାକୁ ନିଆଯାଇଥିଲା ଓ ପରେ କଟକ ବଡ଼ଡାକ୍ତରଖାନାକୁ ସ୍ଥାନାନ୍ତର କରାଯାଇଥିଲା । ଚିକିତ୍ସାଧୀନ ଅବସ୍ଥାରେ ୨୦୧୬ ଡିସେମ୍ବର ୧୧ରେ ତାଙ୍କର ମୃତ୍ୟୁ ହୋଇଥିଲା ।
ଘଟଣାକୁ ନେଇ ସରୋଜଙ୍କ ଶ୍ବଶୁର ନରସିଂହପୁର ଥାନାରେ ହାଜତ ମୃତ୍ୟୁ ଅଭିଯୋଗ କରିଥିଲେ । ଅଭିଯୋଗ ଆଧାରରେ ନରସିଂହପୁର ଥାନା ପୋଲିସ ମାମଲା ରୁଜୁ କରି ତଦନ୍ତ ଜାରି ରଖିଥିଲା । ତଦନ୍ତ ବେଳେ ୬ ପୋଲିସ କର୍ମଚାରୀଙ୍କ ବିରୋଧରେ ପ୍ରମାଣ ମିଳିବାରୁ ସେମାନଙ୍କୁ ଗିରଫ କରାଯାଇ ମଙ୍ଗଳବାର ସନ୍ଧ୍ୟାରେ ନରସିଂହପୁର କୋର୍ଟରେ ହଜାର କରାଯାଇଥିଲା । କୋର୍ଟରେ ସେମାନଙ୍କ ଜାମିନ ନାମଞ୍ଜୁର ହେବାରୁ ସମସ୍ତଙ୍କୁ ବିଚାର ବିଭାଗୀୟ ହଜାତକୁ ପଠା ଯାଇଛି ।