ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ଲାଗିଲା ଶକ୍ତ ଝଟ୍କା, ଟାରିଫ୍କୁ ବେଆଇନ୍ କହିଲେ ଆମେରିକା କୋର୍ଟ
ନୂଆଦିଲ୍ଲୀ: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ଶକ୍ତ ଝଟ୍କା । ଟ୍ରମ୍ପଙ୍କ ଟାରିଫ୍କୁ ବେଆଇନ୍ କହିଲେ ଆମେରିକା କୋର୍ଟ । ଆମେରିକାର ଅପିଲ୍ସ କୋର୍ଟଙ୍କ ଗୁରୁତ୍ବପୂର୍ଣ୍ଣ ରାୟ । ଟାରିଫ୍ କିମ୍ବା ଟିକସ ଲଗାଇବାର କ୍ଷମତା ରାଷ୍ଟ୍ରପତିଙ୍କ ନାହିଁ ବୋଲି କହିଲେ କୋର୍ଟ । ତେବେ ଅକ୍ଟୋବର ୧୪ ଯାଏଁ ଟାରିଫ୍ ଜାରି ରଖିବାକୁ କୋର୍ଟଙ୍କ ଅନୁମତି ରହିଛି । ସେପଟେ କିନ୍ତୁ କୋର୍ଟଙ୍କ ଫଇସଲାକୁ ପକ୍ଷପାତପୂର୍ଣ୍ଣ କହି ସମାଲୋଚନା କଲେ ଟ୍ରମ୍ପ । ଟାରିଫ୍ ଦେଶର ହିତ ପାଇଁ । ଏଭଳି ଫଇସଲା ଦେଶକୁ ବରବାଦ୍ କରିଦେବ । ଆମେ ସୁପ୍ରିମକୋର୍ଟ ଯିବୁ, ଆଗକୁ ବି ଟାରିଫ୍ ଜାରି ରଖିବୁ ବୋଲି କହିଛନ୍ତି ଟ୍ରମ୍ପ ।
ବିଭିନ୍ନ ଦେଶ ଖାସ୍ କରି ଭାରତ ଉପରେ ୫୦% ଟାରିଫ୍ ଘୋଷଣା ପରେ ଏବେ ତାଙ୍କୁ କଡ଼ା ଜବାବ ମିଳିଛି । ଶୁକ୍ରବାର ଦିନ ଆମେରକାର ଏକ ଅପିଲ୍ କୋର୍ଟ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଟାରିଫକୁ ବେଆଇନ ଘୋଷଣା କରିଛନ୍ତି । ଆମେରିକାର ଅପିଲ୍ କୋର୍ଟ ଫେଡେରାଲ୍ ସର୍କିଟ୍ କହିଛନ୍ତି ଯେ, ରାଷ୍ଟ୍ରପତିଙ୍କ ପାଖରେ ଜରୁରୀକାଳୀନ କ୍ଷମତା ଅଛି, କିନ୍ତୁ ତାଙ୍କ ପାଖରେ ଶୁଳ୍କ କିମ୍ବା ଟିକସ ଲଗାଇବାର ଅଧିକାର ନାହିଁ । ଏହି ନିଷ୍ପତ୍ତିକୁ ଟ୍ରମ୍ପଙ୍କ ଅର୍ଥନୈତିକ ନୀତି ପାଇଁ ଏକ ବଡ଼ ଆଘାତ ବୋଲି ବିବେଚନା କରାଯାଉଛି । କୋର୍ଟ ଅକ୍ଟୋବର ୧୪ ପର୍ଯ୍ୟନ୍ତ ଶୁଳ୍କ ବଳବତ୍ତର ରଖିବାକୁ ଅନୁମତି ମଧ୍ୟ ଦେଇଛନ୍ତି, ଯାହା ଟ୍ରମ୍ପ ପ୍ରଶାସନକୁ ଏହି ମାମଲାକୁ ସୁପ୍ରିମକୋର୍ଟକୁ ନେବା ପାଇଁ ସୁଯୋଗ ଦେଇଛି ।
ଅନ୍ୟପଟେ କୋର୍ଟର ଏହି ନିଷ୍ପତ୍ତି ଉପରେ ଟ୍ରମ୍ପ ଦୁଃଖ ପ୍ରକାଶ କରିଛନ୍ତି । କୋର୍ଟର ଏହା ପକ୍ଷପାତିତା ବୋଲି ମଧ୍ୟ ସେ କହିଛନ୍ତି । ଏଥି ସହ ସୋସିଆଲ ମିଡିଆରେ ଲେଖିଛନ୍ତି ଯେ, ଯଦି ଶୁଳ୍କ ହଟାଯାଏ ତେବେ ଦେଶ ପାଇଁ ବିନାଶକାରୀ ହେବ । ପୂର୍ବାନୁମାନ କରି ଆହୁରି ମଧ୍ୟ ସେ କହିଛନ୍ତି ଯେ, ସୁପ୍ରିମକୋର୍ଟଙ୍କ ଦ୍ବାରା ଶୁଳ୍କ ଦେଶ ପାଇଁ ଲାଭଦାୟକ ହେବ ବୋଲି ଆଶା କରୁଛନ୍ତି ।