ନୂଆଦିଲ୍ଲୀ: କିଏ ହେବେ ଦଲାଇଲାମା ଉତ୍ତରାଧିକାରୀ ? ଏହା ଉପରେ ଯେ କେବଳ ଭାରତ ତାହା ନୁହେଁ ବରଂ ସମଗ୍ର ବିଶ୍ବର ନଜର ରହିଛି । କିନ୍ତୁ ସବୁଠାରୁ ଅଧିକ ସତର୍କ ରହିଛି ଚୀନ । ଏହାରି ଭିତରେ ଏବେ ଖୋଦ ଦଲାଇଲାମା ନିଜର ଉତ୍ତରାଧିକାରୀ ଚୟନ ସମ୍ପର୍କରେ ଏକ ବଡ଼ ଘୋଷଣା କରିଛନ୍ତି । ଧର୍ମଗୁରୁ ଦଲାଇଲାମା ନିଜ ବହିରେ ସଙ୍କେତ ଦେଇଛନ୍ତି କି ଯେତେବେଳେ ସେ ୯୦ ବର୍ଷର ହୋଇଯିବେ, ସେତେବେଳେ ଉତ୍ତରାଧିକାରୀ ବିଷୟରେ ନିଜେ ସୂଚନା ଦେବେ। ତେବେ ସବୁଠାରୁ ବଡ କଥା ହେଲା ଯେ ଆସନ୍ତା ଜୁଲାଇ ୬ରେ ଦଲାଇଲାମାଙ୍କୁ ପୁରିବ ୯୦ ବର୍ଷ । ତେଣୁ ସେ ଏହି ଦିନ ଉତ୍ତରାଧିକାରୀ ଘୋଷଣା କରିପାରନ୍ତି ବୋଲି ଆଶା କରାଯାଉଛି ।
ପୁସ୍ତକ ‘ଭଏସ୍ ଫର ଦ ଭଏସଲେସ୍’ରେ ଦଲାଇଲାମା ଲେଖିଛନ୍ତି ଯେ, ତାଙ୍କ ଉତ୍ତରାଧିକାରୀ ଚୀନ୍ ବାହାରେ ଜନ୍ମ ହେବ। ଗୋଦେନ ଫୋଦରାଙ୍ଗ ଫାଉଣ୍ଡେସନର ଅଧିକାରୀଙ୍କ ପାଖରେ ଉତ୍ତରାଧିକାରୀଙ୍କୁ ଖୋଜିବା ଓ ଚିହ୍ନଟ କରିବାର ଦାୟିତ୍ବ ରହିବ।ଦଲାଇଲାମା କହିଛନ୍ତି ଯେ ଆଗକୁ ବି ଦଲାଇଲାମା ଅନୁଷ୍ଠାନ ଜାରି ରହିବ । ନୂଆ ଦଲାଇ ଲାମା ଚୟନ ପାଇଁ ସେ ତିବ୍ବତୀୟ ସଂଗଠନ ଗାଦେନ ଫୋଡରଙ୍ଗ ଟ୍ରଷ୍ଟକୁ ଦାୟିତ୍ବ ପ୍ରଦାନ କରିଛନ୍ତି । ସେ ମଧ୍ୟ ଏହା ସ୍ପଷ୍ଟ କରିଛନ୍ତି ଯେ ତିବ୍ବତୀୟ ଲୋକମାନଙ୍କ ଦ୍ବାରା ନୂଆ ଦଲାଇଲାମାଙ୍କ ଚୟନ ହେବ । ଏଥିରେ ଚୀନର କୌଣସି ଭୂମିକା ରହିବ ନାହିଁ ।