ନୂଆଦିଲ୍ଲୀ-: ପାକିସ୍ତାନୀ ପତ୍ନୀଙ୍କ ପାଇଁ ଜଣେ ସିଆରପିଏଫ୍ ଯବାନଙ୍କ ଚାକିରୀ ଯାଇଛି । ଏନେଇ ସିଆରପିଏଫ୍ ପକ୍ଷରୁ ଜାରି ବିବୃତିରେ କୁହାଯାଇଛି ଯେ ସିଆରପିଏଫ୍ର ୪୧ ବାଟାଲିଅନର ସିଟି/ଜିଡି ମୁନିର ଅହମ୍ମଦ ଜଣେ ପାକିସ୍ତାନୀଙ୍କୁ ବିବାହ କରିଥିବା ଖବର ଲୁଚାଇଥିବାରୁ ତାଙ୍କୁ ତତ୍କାଳ ସେବା ନିବୃତ୍ତ କରାଯାଉଛି । ସର୍ଭିସ ରୁଲ ଉଲ୍ଲଙ୍ଘନ ଏବଂ ଜାତୀୟ ସୁରକ୍ଷା ପ୍ରତି ବିପଦ ଦର୍ଶାଇ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି । କେନ୍ଦ୍ରୀୟ ରିଜର୍ଭ ପୋଲିସ ଫୋର୍ସ (ସିଆରପିଏଫ୍) ଶନିବାର ଯବାନଙ୍କୁ ଚାକିରୀରୁ ବହିଷ୍କାର କରିଛି । ମୁନିରଙ୍କ ବିରୋଧରେ ନିଜ ବିବାହ ତଥ୍ୟକୁ ଲୁଚାଇବା ଏବଂ ପାକିସ୍ତାନୀ ସ୍ତ୍ରୀଙ୍କ ଭିସାର ବୈଧତା ଶେଷ ହେବା ପରେ ମଧ୍ୟ ତାଙ୍କୁ ଭାରତରେ ଆଶ୍ରୟ ଦେବାର ଅଭିଯୋଗ ରହିଛି ।
ସୂଚନା ଅନୁସାରେ, ମୁନିର ଅହମ୍ମଦ ଜମ୍ମୁ ଏବଂ କାଶ୍ମୀରରେ ସିଆରପିଏଫ ଭାବେ ନିୟୋଜିତ ହୋଇଥିଲେ । ମୁନିରଙ୍କ ଅନଲାଇନ ସୋସିଆଲ୍ ମିଡିଆ ସାଇଟ୍ ମାଧ୍ୟମରେ ପାକିସ୍ତାନ ପଞ୍ଜାବ ବାସିନ୍ଦା ମିନାଲ ଖାନଙ୍କ ସହ ପ୍ରେମ ସମ୍ପର୍କ ଗଢ଼ି ଉଠିଥିଲା । ସେ ୨୦୨୩ ମସିହାରେ ମିନାଲଙ୍କୁ ବିବାହ କରିବା ପାଇଁ ସିଆରପିଏଫ୍ ଠାରୁ ଅନୁମତି ମାଗିଥିଲେ, କିନ୍ତୁ ସେ ଅନୁମତି ପାଇବା ପୂର୍ବରୁ ମେ’ ୨୪, ୨୦୨୪ ରେ ଭିଡିଓ କନଫରେନ୍ସିଂ ମାଧ୍ୟମରେ ତାଙ୍କୁ ବିବାହ କରିଥିଲେ । ତା’ପରେ ସେ ଭିସାରେ ଭାରତରେ ପହଞ୍ଚି ମୁନିର ଅହମ୍ମଦଙ୍କ ସହିତ ରହିବା ଆରମ୍ଭ କଲେ । କିନ୍ତୁ ଆତଙ୍କବାଦୀ ଆକ୍ରମଣ ପରେ ଯେତେବେଳେ ତାଙ୍କର ଭିସା ବାତିଲ ହୋଇଗଲା ଏବଂ ତାଙ୍କୁ ଭାରତ ଛାଡିବା ପାଇଁ ଜମ୍ମୁକୁ ଅଟାରୀ ସୀମାକୁ ପଠାଗଲା, ସେତେବେଳେ ସିଆରପିଏଫ୍ ଯବାନ ଜମ୍ମୁ ଏବଂ କାଶ୍ମୀର ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ । ଏବଂ ମିଛ କହିଥିଲେ ଯେ ତାଙ୍କ ପତ୍ନୀଙ୍କର ଲଙ୍ଗ୍ ଟର୍ମ ଭିସା ଲାଗି ଆବେଦନ କରାଯାଇଛି । କିନ୍ତୁ ଯାଞ୍ଚରୁ ଆଦୌ ଆବେଦନ କରାଯାଇନଥିବା ଜଣାପଡିବା ସହିତ ପୁରା ଘଟଣା ସାମନାକୁ ଆସିଥିଲା ।
ସିଆରପିଏଫ ଏହି ମାମଲାକୁ ବହୁତ ଗମ୍ଭୀରତାର ସହ ନେଇଥିଲା ଏବଂ କହିଥିଲା ସିଆରପିଏଫ୍ରେ କାର୍ଯ୍ୟରତ ଯେକୌଣସି କର୍ମଚାରୀ ସଚ୍ଚୋଟତାର ସହ ସେବା ସର୍ତ୍ତାବଳୀ ପାଳନ କରିବେ ବୋଲି ଆଶା କରାଯାଏ,ବିଶେଷକରି ମାମଲାଟି ଯେତେବେଳେ ଜାତୀୟ ସୁରକ୍ଷା ସହିତ ଜଡିତ ଥାଏ । ଅଧିକାରୀମାନେ ଏହା ମଧ୍ୟ ସୂଚିତ କରିଛନ୍ତି ଯେ, ଏପରି କ୍ଷେତ୍ରରେ ‘ଶୂନ୍ୟ ସହନଶୀଳତା’ ନୀତି ଗ୍ରହଣ କରାଯାଉଛି ।