ନୂଆଦିଲ୍ଲୀ: ବିଶ୍ବର ବିଭିନ୍ନ ଦେଶରେ ମାନ୍ଦାବସ୍ଥା ଓ ଦରବୃଦ୍ଧି ସମସ୍ୟା ଲାଗି ରହିବାର ସିଧାସଳଖ ପ୍ରଭାବ ଭାରତ ଉପରେ ପଡ଼ିଛି। ଚଳିତ ଆର୍ଥିକ ବର୍ଷର ପ୍ରଥମ ତ୍ରୈମାସିକରେ ଗାଡ଼ି ରପ୍ତାନି ୨୮ ପ୍ରତିଶତ ହ୍ରାସ ପାଇଛି। ସୋସାଇଟି ଅଫ୍ ଇଣ୍ଡିଆନ ଅଟୋମୋବାଇଲ୍ ମାନୁଫାକଚରର୍ସ ତଥ୍ୟ ଅନୁସାରେ ୨୦୨୩ ଏପ୍ରିଲରୁ ଜୁନ୍ ମଧ୍ୟରେ ୧୦ ଲକ୍ଷ ୩୨ ହଜାର ୪୪୯ ଗାଡ଼ି ରପ୍ତାନି କରାଯାଇଛି ଯାହା ପୂର୍ବବର୍ଷର ଏହି ତିନି ମାସରେ ହୋଇଥିବା ୧୪ ଲକ୍ଷ ୨୫ ହଜାର ୯୬୭ ତୁଳନାରେ କମ୍ ହୋଇଛି । ସବୁ ପ୍ରକାର ଗାଡ଼ି ରପ୍ତାନି ହ୍ରାସ ପାଇଛି।
ଆଫ୍ରିକା ଓ ଅନ୍ୟାନ୍ୟ ବିକାଶଶୀଳ ଦେଶକୁ ଗାଡ଼ି ବିକ୍ରି କମିଛି। କାରଣ ଏହି ସବୁ ଦେଶଗୁଡ଼ିକର ବୈଦେଶିକ ମୁଦ୍ରା ଭଣ୍ଡାରରେ କମ୍ ପରିମାଣର ବିଦେଶୀ ମୁଦ୍ରା ରହିଛି। ତେଣୁ ସେମାନେ କେବଳ ଅତ୍ୟାବଶ୍ୟକ ସାମଗ୍ରୀ ଆମଦାନି ଉପରେ ମନୋନିବେଶ କରୁଛନ୍ତି। ୨୦୨୩ ଏପ୍ରିଲ୍-ଜୁନ୍ ତ୍ରୈମାସିକରେ ୧,୫୨,୧୫୬ ଯାତ୍ରୀବାହୀ ଗାଡ଼ି ରପ୍ତାନି ହୋଇଛି ଯାହା ଗତବର୍ଷ ତୁଳନାରେ ୫ ପ୍ରତିଶତ କମ୍। କାର୍ ରପ୍ତାନି ୯୪,୭୯୩କୁ ହ୍ରାସ ପାଇଛି। ଗତବର୍ଷ ଏପ୍ରିଲ୍-ଜୁନ୍ରେ ଏକ ଲକ୍ଷରୁ ଅଧିକ କାର୍ ରପ୍ତାନି ହୋଇଥିଲା। ଦୁଇଚକିଆ ରପ୍ତାନି ୩୧ ପ୍ରତିଶତ ହ୍ରାସ ପାଇ ୭,୯୧,୩୧୬ ହୋଇଛି। କମର୍ସିଆଲ୍ ଗାଡ଼ି ରପ୍ତାନି ୧୪,୬୨୫ ହୋଇଛି ଯାହା ଗତବର୍ଷ ତୁଳନାରେ ୨୫ ପ୍ରତିଶତ କମ୍। ତିନିଚକିଆ ଯାନ ରପ୍ତାନି ୨୫ ପ୍ରତିଶତ ହ୍ରାସ ପାଇ ୭୩,୩୬୦ ହୋଇଛି। ୟୁଟିଲିଟି ଯାନ ରପ୍ତାନି ୫୫,୪୧୯କୁ ହ୍ରାସ ପାଇଛି।