ଭାରତ-ପାକିସ୍ତାନ ବିଶ୍ଵକପ୍ ମ୍ୟାଚକୁ ନେଇ ସନ୍ଦେହ, ICC ସମ୍ମୁଖରେ ୩ଟି ସର୍ତ୍ତ ରଖିଲା ପାକିସ୍ତାନ
ନୂଆଦିଲ୍ଲୀ: ICC ପୁରୁଷ T20 ବିଶ୍ୱକପ୍ 2026ର ସବୁଠାରୁ ଆକର୍ଷଣୀୟ ଭାରତ ବନାମ ପାକିସ୍ତାନ ମ୍ୟାଚ୍କୁ ନେଇ ଏବେ ଅନିଶ୍ଚିତତା ସୃଷ୍ଟି ହୋଇଛି। ପାକିସ୍ତାନ ଏହି ଟୁର୍ଣ୍ଣାମେଣ୍ଟରେ ଭାରତ ବିପକ୍ଷରେ ଖେଳିବାକୁ ମନା କରିଥିବା ବେଳେ, ପାକିସ୍ତାନ କ୍ରିକେଟ୍ ବୋର୍ଡ (PCB) ଏପର୍ଯ୍ୟନ୍ତ ଏନେଇ ଅନ୍ତର୍ଜାତୀୟ କ୍ରିକେଟ୍ ପରିଷଦ (ICC) କୁ କୌଣସି ଲିଖିତ ସୂଚନା ଦେଇନାହିଁ। ଏହି କାରଣରୁ ଫେବୃଆରୀ ୧୫ ତାରିଖରେ ଭାରତ-ପାକିସ୍ତାନ ମ୍ୟାଚ୍ ହେବାର ସମ୍ଭାବନା ଏଯାବତ୍ ରହିଛି। ICC ଟୁର୍ଣ୍ଣାମେଣ୍ଟର ସବୁଠାରୁ ବଡ଼ ମ୍ୟାଚ୍ ଭାରତ ବନାମ ପାକିସ୍ତାନ ସୁନିଶ୍ଚିତ କରିବା ପାଇଁ ସମସ୍ତ ପ୍ରୟାସ ଜାରି ରଖିଛି। ଏହି କ୍ରମରେ ରବିବାର, ୮ ଫେବୃଆରୀରେ ICC ଓ PCB ମୁଖ୍ୟ ମୋହସିନ୍ ନକଭିଙ୍କ ମଧ୍ୟରେ ଏକ ଗୁରୁତ୍ୱପୂର୍ଣ୍ଣ ବୈଠକ ଅନୁଷ୍ଠିତ ହୋଇଥିଲା। ଏହି ବୈଠକରେ ବାଂଲାଦେଶ କ୍ରିକେଟ୍ ବୋର୍ଡ (BCB)ର ସଭାପତି ମଧ୍ୟ ଉପସ୍ଥିତ ଥିଲେ।
ଟେଲିକମ୍ ଏସିଆ ସ୍ପୋର୍ଟର ଏକ ରିପୋର୍ଟ ଅନୁଯାୟୀ, PCB ମୁଖ୍ୟ ମୋହସିନ୍ ନକଭି ଭାରତ ବିପକ୍ଷରେ ମ୍ୟାଚ୍ ଖେଳିବା ପାଇଁ ବୟକଟ ଡାକରା ସମାପ୍ତ କରିବା ନିମନ୍ତେ ICC ସମ୍ମୁଖରେ ତିନୋଟି ପ୍ରମୁଖ ସର୍ତ୍ତ ରଖିଛନ୍ତି। ପାକିସ୍ତାନର ଏହି ତିନିଟି ଦାବି ହେଲା, ICC ଠାରୁ ପାକିସ୍ତାନ ଅଧିକ ରାଜସ୍ୱ ଅଂଶ ଚାହୁଁଛି, ଭାରତ ସହିତ ଦ୍ୱିପାକ୍ଷିକ କ୍ରିକେଟ୍ ସିରିଜ୍ ପୁନଃଆରମ୍ଭ କରାଯାଉ ଏବଂ 2026 T20 ବିଶ୍ୱକପ୍ରେ ଭାରତୀୟ ଓ ପାକିସ୍ତାନୀ ଖେଳାଳିମାନେ ପରସ୍ପର ସହିତ ମିଶିବା ଉଚିତ। ତେବେ ଏହି ତିନୋଟି ଦାବି ମଧ୍ୟରୁ ଦ୍ୱିତୀୟ ଦାବି, ଭାରତ ସହିତ ଦ୍ୱିପାକ୍ଷିକ ସିରିଜ୍ ପୁନଃଆରମ୍ଭ ଉପରେ ଭାରତ କେବେ ମଧ୍ୟ ରାଜି ହେବା ସମ୍ଭାବନା ନାହିଁ। ଭାରତ ଓ ପାକିସ୍ତାନ ମଧ୍ୟରେ ଶେଷ ଦ୍ୱିପାକ୍ଷିକ ସିରିଜ୍ ୨୦୧୨ ମସିହାରେ ଖେଳାଯାଇଥିଲା। ଗତ ୧୬ ବର୍ଷ ଧରି ଦୁଇ ଦେଶ କେବଳ ICC ଟୁର୍ଣ୍ଣାମେଣ୍ଟରେ ମାତ୍ର ପରସ୍ପର ସମ୍ମୁଖୀନ ହେଉଛନ୍ତି।