ଭୁବନେଶ୍ୱର: ହନିଟ୍ରାପ ମାମଲାରେ ଓଡ଼ିଶାରୁ ପାକିସ୍ତାନ ପାଇଁ ଗୁଇନ୍ଦାଗିରି କରୁଥିବା ଘଟଣାରେ ତିନି ଅଭିଯୁକ୍ତ ଗିରଫ ହୋଇଛନ୍ତି । ପାକିସ୍ତାନୀ ଯୁବତୀଙ୍କ ମାୟାଜାଲରେ ପଡ଼ି ସବୁ ତଥ୍ୟ ପ୍ରେରଣ କରୁଥିଲେ । ଏହା ଭିତରେ ଗିରଫ ତିନି ଅଭିଯୁକ୍ତଙ୍କର ପାସ୍ପୋର୍ଟ ଭେରିଫିକେସନ୍ ମଧ୍ୟ କରାଯାଉଛି। ଗତ ବର୍ଷକ ମଧ୍ୟରେ ସେମାନେ କେଉଁ କେଉଁ ସ୍ଥାନକୁ ଯାଇଥିଲେ ତାହାର ଲୋକେସନ୍ ଯାଞ୍ଚ କରାଯାଉଥିବା ବେଳେ ହ୍ବାଟସ୍ଆପ୍ ଠାରୁ ଆରମ୍ଭ କରି ଟେଲିଗ୍ରାମ, ଇନ୍ଷ୍ଟା, ଫେସ୍ବୁକ ଭଳି ସେମାନେ ବ୍ୟବହାର କରିଥିବା ସମସ୍ତ ସୋସିଆଲ୍ ମିଡିଆର ତଥ୍ୟ ମଧ୍ୟ ଯାଞ୍ଚ କରାଯାଉଛି। ଏଥିପାଇଁ ସମସ୍ତ ସୋସିଆଲ୍ ମିଡିଆ ମୁଖ୍ୟ କାର୍ୟ୍ୟାଳୟକୁ ଏସ୍ଟିଏଫ୍ ତଥ୍ୟ ମାଗିଛି। ସେହିପରି ଫ୍ଲିପ୍କାର୍ଟ, ଆମାଜନ୍ ଭଳି ଅନ୍ଲାଇନ୍ ସପିଂ ସଂସ୍ଥାରୁ ବହୁ ଜିନିଷ ଆତଙ୍କବାଦୀଙ୍କୁ ପଠାଯାଇଥିଲା। ତେଣୁ ସେମାନେ କେଉଁ ଠିକଣାରେ ଜିନିଷ ପଠାଉଥିଲେ ତାର ମଧ୍ୟ ଖୋଳତାଡ଼ ହେଉଛି।
ତିନିଜଣଙ୍କଠାରୁ ମିଳିଥିବା ମୋବାଇଲ୍ ଏବଂ ବିପୁଳ ପରିମାଣ ସିମ୍ର ମଧ୍ୟ ଯାଞ୍ଚ ଆରମ୍ଭ ହୋଇଛି। ଯେହେତୁ ସେମାନେ ଅନେକ ତଥ୍ୟ ଡିଲିଟ୍ କରିଦେଇଛନ୍ତି, ତେଣୁ ଏହାର ଯାଞ୍ଚ ପାଇଁ ଜବତ ହୋଇଥିବା ଲ୍ୟାପ୍ଟପ ଓ ମୋବାଇଲ୍ ଗୁଡ଼ିକୁ ଖୁବ୍ ଶୀଘ୍ର ରାଜ୍ୟ ଫରେନ୍ସିକ୍ ଲ୍ୟାବକୁ ପଠାଯିବ। ଅଭିଯୁକ୍ତମାନେ ଏକାଧିକ ବ୍ୟାଙ୍କରେ ଆର୍ଥିକ କାରବାର କରିଥିଲେ। ସେମାନଙ୍କ ଠାରୁ ୬୧ଟି ଏଟିଏମ୍ କାର୍ଡ ମଧ୍ୟ ଜବତ କରାଯାଇଥିଲା। ସେମାନଙ୍କ ବ୍ୟାଙ୍କ ଆକାଉଣ୍ଟ ତଥ୍ୟ ଯାଞ୍ଚ କରାଯାଉଥିବା ବେଳେ ଅଧିକାଂଶ ଟ୍ରାଞ୍ଜାକସନ୍ ଫୋନ୍ ପେ’ ଏବଂ ଗୁଗୁଲ ପେ’ ମାଧ୍ୟମରେ ହୋଇଥିବା ଜଣାପଡ଼ିଛି। ଅନ୍ୟପଟେ ଘଟଣାର ତଦନ୍ତ ପ୍ରକ୍ରିୟାକୁ ଅଧିକ ସୁଦୃଢ଼ କରିବା ପାଇଁ ଏସ୍ଟିଏଫ୍ ଓ ଏନ୍ଆଇଏ ପଶ୍ଚିମବଙ୍ଗ ପୁଲିସ ସହ ଯୋଗାଯୋଗ କରିଛି।
