ପୁରୀ: ପୁରୀର ଶ୍ରୀ ଜଗନ୍ନାଥ ମନ୍ଦିର ରତ୍ନଭଣ୍ଡାରରେ ରହିଥିବା ମହାପ୍ରଭୁଙ୍କ ରତ୍ନ ଅଳଙ୍କାର ଗଣତି-ମଣତି ପାଇଁ ପ୍ରସ୍ତୁତ ଏସଓପିକୁ ରାଜ୍ୟ ସରକାର ଅନୁମୋଦନ କରିଛନ୍ତି। ଏହି ନିୟମାବଳୀ ଅନୁସାରେ ସମସ୍ତ ରତ୍ନ ଅଳଙ୍କାରକୁ ନିର୍ଦ୍ଧିଷ୍ଟ ପ୍ରକ୍ରିୟାରେ ଗଣନା ଓ ଯାଞ୍ଚ କରାଯିବ। ଏ ସମ୍ପର୍କରେ ଶ୍ରୀମନ୍ଦିର କାର୍ଯ୍ୟାଳୟରେ ମୁଖ୍ୟ ପ୍ରଶାସକ Aravind Padheeଙ୍କ ଅଧ୍ୟକ୍ଷତାରେ ବୈଠକ ହୋଇଥିଲା। ଗଣତି-ମଣତି କେମିତି କରାଯିବ ଓ କାହାର କେଉଁ ଦାୟିତ୍ୱ ରହିବ, ସେଥିପାଇଁ ସ୍ପଷ୍ଟ ବିଭାଜନ କରାଯାଇଛି।
ଏହି କାର୍ଯ୍ୟ ପାଇଁ ଦୁଇଟି ଟିମ୍ ଗଠନ ହେବ— ସୁପରଭାଇଜିଂ ଟିମ୍ ଓ କାର୍ଯ୍ୟନିର୍ବାହୀ ଟିମ୍। ସୁପରଭାଇଜିଂ ଟିମ୍ରେ ୩ ଜଣ ସଦସ୍ୟ ରହିବେ, ଯେଉଁମାନେ ସମଗ୍ର ପ୍ରକ୍ରିୟା ଉପରେ ନଜର ରଖିବେ। କାର୍ଯ୍ୟନିର୍ବାହୀ ଟିମ୍ରେ ୧୦ ଜଣ ସଦସ୍ୟ ରହିବେ, ଯେଉଁମାନେ ଅଳଙ୍କାର ବାହାର କରି ଗଣନା କରିବେ। ମୋତି ଓ ମାଣିକ୍ୟ ଭଳି ମୂଲ୍ୟବାନ ରତ୍ନର ଯାଞ୍ଚ ପାଇଁ ଏକ୍ସପର୍ଟମାନେ ନିଯୁକ୍ତ ହେବେ। ଗଣତି ସମୟରେ ଫଟୋ ଓ ଭିଡିଓଗ୍ରାଫି କରାଯିବ ଏବଂ ସମସ୍ତ ତଥ୍ୟର ଡିଜିଟାଲ ରେକର୍ଡ ତିଆରି ହେବ। ସିସିଟିଭି ସୁବିଧା ଓ ଅନ୍ୟାନ୍ୟ ସୁରକ୍ଷା ବ୍ୟବସ୍ଥା ମଧ୍ୟ ରହିବ। ଗଣତି ଦିନଗୁଡ଼ିକରେ ଭକ୍ତମାନଙ୍କ ଦର୍ଶନ ବ୍ୟବସ୍ଥାରେ କିଛି ପରିବର୍ତ୍ତନ ହେବ। ନିର୍ଦ୍ଧିଷ୍ଟ ସେବାୟତ ବ୍ୟତୀତ ଅନ୍ୟ କାହାକୁ ରତ୍ନଭଣ୍ଡାର ନିକଟକୁ ପ୍ରବେଶ ଅନୁମତି ମିଳିବ ନାହିଁ। ସରକାରଙ୍କ ଲକ୍ଷ୍ୟ ହେଉଛି ନିର୍ଦ୍ଧାରିତ ସମୟ ସୀମା ମଧ୍ୟରେ ସମସ୍ତ ରତ୍ନ ଅଳଙ୍କାରର ଗଣତି-ମଣତି କାର୍ଯ୍ୟ ସମ୍ପୂର୍ଣ୍ଣ କରିବା।