ପହଲଗାମ ହମଲା ପରେ ଆକ୍ରମଣାତ୍ମକ ମୁଦ୍ରାରେ ଭାରତ, ଶତ୍ରୁ ରାଷ୍ଟ୍ରକୁ ହାତରେ ନୁହେଁ ଭାତରେ ମାରିବା ପାଇଁ ରଣନୀତିକୁ ପ୍ରମୁଖ ଯୁଦ୍ଧାସ୍ତ୍ର ଭାବେ ଆପଣାଇଛନ୍ତି ମୋଦୀ ସରକାର । ସିନ୍ଧୁ ଜଳଚୁକ୍ତି ବାତିଲ, ଡିଜିଟାଲ ଷ୍ଟ୍ରାଇକ ପରେ ପାକିସ୍ତାନ ସହ ବ୍ୟବସାୟିକ ସମ୍ପର୍କରେ ପୂର୍ଣ୍ଣଛେଦ୍ଦ ପଡ଼ିଛି । ପଡ଼ୋଶୀ ଦେଶ ସହ ସମସ୍ତ ପ୍ରକାରର ଆମଦାନୀ ଓ ରପ୍ତାନୀ ବନ୍ଦ ହୋଇଛି । ଦେଶରେ ଥିବା ବନ୍ଦର ଗୁଡ଼ିକୁ ପାକିସ୍ତାନ ଜାହାଜର ପ୍ରବେଶ ଉପରେ କଟକଣା ଲଗାଯାଇଛି । ପାକିସ୍ତାନ ସହ ଡାକ ଓ ପାର୍ସଲ ଆଦାନ ପ୍ରଦାନ ଉପରେ ଲାଗିଲା ରୋକ୍ । ଏହାପୂର୍ବରୁ ପାକିସ୍ତାନ ଏୟାରସ୍ପେଶକୁ ମଧ୍ୟ ବାରଣ କରିସାରିଛନ୍ତି କେନ୍ଦ୍ର ସରକାର ।
ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣ ପରେ, ସୁରକ୍ଷା ଏଜେନ୍ସିଗୁଡ଼ିକ ଅଧିକ ସଜାଗ ଅଛନ୍ତି । ସନ୍ଦିଗ୍ଧ ଆତଙ୍କବାଦୀଙ୍କୁ ଧରିବା ପାଇଁ ଯଥାସମ୍ଭବ ପ୍ରୟାସ କରୁଛନ୍ତି। ତେବେ ଭାରତରୁ ମିଳିଥିବା ସୂଚନା ପରେ ଆଜି କଲମ୍ବୋ ବିମାନବନ୍ଦରରେ ଏକ ବଡ଼ ଧରଣର ତଲାସୀ କରାଯାଇଥିଲା। ଭାରତରୁ ମିଳିଥିବା ଆଲର୍ଟ ସୂଚନା ପରେ ଏହି ତଦନ୍ତ କରାଯାଇଛି। ଚେନ୍ନାଇରୁ କଲମ୍ବୋ ବିମାନବନ୍ଦରରେ ପହଞ୍ଚିବାପରେ ବିମାନର ତଲାସୀ କରାଯାଇଥିଲା । ରିପୋର୍ଟ ଅନୁସାରେ, ଶ୍ରୀଲଙ୍କା ଏୟାରଲାଇନ୍ସର ବିମାନଟି ଆଜି ବନ୍ଦରାନାଇକେ ଅନ୍ତର୍ଜାତୀୟ ବିମାନବନ୍ଦରରେ ପହଞ୍ଚିଥିଲା, ସୁରକ୍ଷା ବାହିନୀ ବିମାନକୁ ଘେରି ରହିଥିଲେ। ଏହାପରେ ବିମାନ ଏବଂ ଏଥିରେ ଥିବା ଲୋକଙ୍କ ଯାଞ୍ଚ କରାଯାଇଥିଲା।
ଖବରମୁତାକ, ଶ୍ରୀଲଙ୍କାକୁ ଭାରତରୁ ଏକ ସତର୍କ ସୂଚନା ମିଳିଥିଲା ଯେ, ବିମାନ 4R-ALS ଦ୍ୱାରା ପରିଚାଳିତ UL 122 ବିମାନରେ ପହଲଗାମ ଆତଙ୍କବାଦୀ ଆକ୍ରମଣ ସହିତ ଜଡିତ ସମ୍ଭାବ୍ୟ ସନ୍ଦିଗ୍ଧ ବ୍ୟକ୍ତିମାନେ ଏହି ବିମାନରେ ଅଛନ୍ତି । ବିମାନଟି ସକାଳ ୧୧:୫୯ ରେ କଲମ୍ବୋରେ ଅବତରଣ କରିଥିଲା । ଏହାପରେ ସ୍ଥାନୀୟ କର୍ତ୍ତୃପକ୍ଷଙ୍କ ସହ ସମନ୍ୱୟ ରଖି ବିମାନର ଏକ ବ୍ୟାପକ ଯାଞ୍ଚ କରାଯାଇଥିଲା । କିନ୍ତୁ ସେମାନେ କୌଣସି ସନ୍ଦିଗ୍ଧ ବ୍ୟକ୍ତିଙ୍କୁ ପାଇନଥିଲେ ।